PAGBASA I 

Gen 28:10-22a

Pagbasa tikang han Basahan han Genesis.

Binaya hi Jacob han Berseba ngan linmakat hiya tipakadto ha Haran.

Han katunod han adlaw inabot hiya didto hin usa nga baraan nga dapit ngan nagkampo hiya didto. Hinigda hiya hin pagkaturog nga nakakaulon hin bato. Nag-inop hiya nga hinkit-an niya in usa nga hagdan nga naabot tikang ha tuna ngadto ha langit, nga may mga anghel nga nagsisinakalusad dida hini nga hagdan. Ngan hinkit-an niya an Ginoo nga natukdaw ha sapit niya. Nagsiring an Ginoo, “Amo ako an Ginoo nga Dyos nira Abraham ug Isaac. Ighahatag ko ha imo ngan ha imo mga tulin ini nga tuna nga imo hinihigdaan. Magdadamo hira sugad han mga tapotapo han tuna. Pahihiluagon nira an ira katunaan ha ngatanan nga pag-ultan ngan pinaagi ha imo ngan han imo mga tulin pagpapakaupayon ko an ngatanan nga kanasoran. Hinumdomi, maupod ako ha imo ngan mananalipod ako ha imo bisan ngain ka kadto, ngan igbabalik ko ikaw nganhi hini nga tuna. Diri ko ikaw babayaan tubtob nga matuman ko an ngatanan nga akon iginsaad ha imo.”

Nagmata hi Jacob ngan nagsiring, “Aanhi dinhe an Ginoo! Aanhi hiya dinhe hini nga dapit, ngan diri ngani ako maaram hini!” Nahadlok hiya ngan nagsiring, “Hin kamakaaramdok hini nga dapit! An balay gud ini han Dyos; an ganghaan gud ini ngadto ha langit.” Timprano pa han pagkaaga binangon hi Jacob, kinuha niya an bato nga gin-unlan niya, ngan gintindog ini niya sugad nga usa nga hinumdoman. Niyan gin-ipisan ini niya hin lana hin olibo ha paghalad hini nga bato ngadto ha Dyos. Ginngaranan niya nga Betel an dapit. (Kinikilala nga Luz hadto anay ini nga bungto.)

Niyan nagsumpa hi Jacob ngadto han Ginoo: “Kon mag-upod ka ha akon ngan panalipdan mo ako hini nga akon paglakaton, ngan tagan mo ako hin pagkaon ngan panapton, ngan kon makabalik ako nga talwas ngadto han balay han akon amay, niyan magigin Dyos ko gud ikaw. Ini nga bato nga hinumdoman nga akon gintindog, mahihimo nga usa nga dapit diin pagsisingbahon ka.”

An Pulong han Ginoo.

SALMO RESPONSORIO

Sal 91:1-2, 3-4, 14-15ab

(b) Dida ha imo, Dyos ko, ibinubutang ko an akon pagtapod.

1. An napakadto han Ginoo hin pagsalirong,

ngan hin pagsalipod, han Makagarahum,

an makakasiring hini ha Ginoo,

“Amo ikaw an naugop ha akon ug nasalipod,

ikaw an akon Dyos; aada ha imo an akon pagtapod.” (b)

2. Igagawas ako niya ha ngatanan nga kataragman;

ngan han ngatanan nga nakakamatay nga balatian.

Tatahoban ka han iya mga pako,

waray mo kahadlok, ha iya pagmangno. (b)

3. Nasiring man an Dyos, “Akon tatalwason

hira nga nahigugma ha akon;

an ngatanan nga magtug-an

nga ako Ginoo, akon pananalipdan.

Kon magtawag hira akon pamamatian,

uupdan ko hira kon may-ada kakurian. (b)

PAGBASA II          

Mt 9:18-26

Pagbasa tikang han santos nga ebanghelyo sumala kan Mateo.

Han nagyayakan pa hi Jesus hini, hinarani ha iya in usa nga Judiyo, linuhod ha iya atubangan, ngan naghangyo: “Kamamatay pa la yana han akon anak nga babayehay, kundi upod gad ha akon ngan ipadapat an imo kamot ha iya, ngan mabubuhi hiya.” Sanglit, binuhat hi Jesus ngan sinunod ha iya ngan inupod ha iya an iya mga tinun-an. May usa nga babaye nga gindidinogoan sulod hin dose na ka tuig, ngan pinaluyo hiya kan Jesus. Kinamkam niya an sidsid han bado ni Jesus. Nagsiring hiya ha iya kalugaringon, “Kon makakamkam la ako han iya bado, mauupay gud ako.” Liningi hi Jesus ngan hinkit-an niya an babaye, ngan ginsiring niya, “Ayaw kahadlok, anak! Nakaupay ha imo an imo pagtoo.” Ngan dida dayon naupay an babaye.

Sanglit, kinadto hi Jesus ha balay han opisyal. Han pakakita niya han mga magtotokar para han paglubong ngan han nagkarigumok nga mga tawo, nagsiring hiya, “Kagawas kamo ngatanan! Diri patay an bata; nakaturog la hiya!” Ngan gintinawaan hiya nira. Han pagkagawas la han mga tawo, sinulod hi Jesus han kwarto han babayehay, kinaptan ni Jesus an kamot han bata, ngan binuhat an bata. Ngan nahisangyaw ini nga nahinabo ha ngatanan nga dapit didto hito nga tuna.

An Ebanghelyo han Ginoo.