PAGBASA I 

Gen 32:23-33

Pagbasa tikang han Basahan han Genesis.

Binangon hi Jacob hito manta nga gab-i, gindara an iya duha nga mga asawa, an iya duha nga mga aruasawa, ngan an iya onse nga mga anak, ngan tinmabok hira han Salog han Jaboc. Katapos niya pagpataboka ha ira, iya liwat gindara ngadto ha tabok an ngatanan nga iya mga hiagi, kundi pinabilin hiya nga nag-uusaan la. Niyan inabot in usa ka tawo ngan nakigdulong ha iya tubtob gud han pagpunias han adlaw. Han pakasabot han tawo nga waray man hiya pakakadaog, gin-igo niya an pig-i ni Jacob ngan nalisa ini. Nagsiring an tawo, “Buhii na ako kay mapawa na.” “Diri ko ikaw bubuhian kon diri mo ako pagbendisyonan,” binaton hi Jacob. “Ano an imo ngaran?” pinakiana an tawo. “Jacob,” binaton hiya. Nagsiring an tawo, “Diri na Jacob an imo ngaran. Nakigdulong ka han Dyos ngan han mga tawo, ngan nagdaog ka; sanglit Israel na an imo ngaran.” Nagsiring hi Jacob, “Yana pagsumati ako han imo ngaran.” Kundi binaton hiya, “Kay ano nga karuyag mo mahibaro han akon ngaran?” Ngan ginbendisyonan niya hi Jacob. Nagsiring hi Jacob, “Iginkaatubang ko gud an Dyos ngan buhi pa man gihapon ako;” sanglit iya ginngaranan nga Peniel adto nga dapit.

Nasirang na an adlaw han pagtalikod ni Jacob han Peniel, ngan nag-iingka hiya tungod han kaigo han iya pig-i. Bisan ngada yana nga adlaw diri nakaon an mga tulin ni Israel han ugaton nga unod nga tungod gud han pig-i, kay dida gud hini nga ugat naigo hi Jacob.

An Pulong han Ginoo.

SALMO RESPONSORIO

Sal 17:1b, 2-3, 6-7ab, 8b & 15

(b) Dida han akon pagkamatadong, makita ako han imo bayhon, O Ginoo.

1. Pamatii, O Ginoo,

an akon matadong nga pangamuyo;

tagda an akon pagtawag hin pakibulig!

Pamatii an akon pag-ampo,

kay waray limbong dinhe ha akon. (b)

2. Maghuhukom ka dapig ha akon,

kay maaram ka han matadong.

Maaram ka han akon kasingkasing;

dinuduaw mo ako ha kagab-ihon.

Gin-usisa mo ako hin hingpit

ngan waray mo hin-agian

nga maraot nga ungara didi ha akon;

diri ako nagyayakan hin maraot. (b)

3. Tagoa ako dida han lambong han imo mga pako.

Igkikita ko ikaw, kay matadong ako,

ngan ha akon pagmata,

lilipayon ako han imo pakigkaupod. (b)

PAGBASA II          

Mt 9:32-38

Pagbasa tikang han santos nga ebanghelyo sumala kan Mateo.

Han pagkalakat na han mga tawo, may pira ka tawo nga nagdara ngadto kan Jesus hin tawo nga waray makakayakan kay sinasangkayan hiya hin yawa. Han paghigawas na han yawa, nakayakan dayon an tawo, ngan nahipausa an ngatanan. Nagsiring hira, “Waray pa kita kumita hin sugad hini dinhe ha Israel!” Kundi nagsiring an mga Parisiyo, “An punoan han mga yawa an naghatag ha iya hin gahom hin pagpagawas han mga yawa.”

Ngan ginduaw ni Jesus an ngatanan nga kabungtohan ngan kabaryohan. Nagtutdo hiya didto han ira mga sinagoga, nagwali han Maupay nga Sumat han Ginhadian, ngan gintambal niya an mga tawo han ngatanan nga mga sakit. Han pakakita niya han damo nga mga tawo, nalooy gud hiya ha ira, tungod kay mabidoon ngan makalolooy man hira, sugad hin mga karnero nga waray magmarangno. Sanglit ginsiring niya an iya mga tinun-an, “Damo in aranihon kundi gutiay la in mga mag-arani. Pag-ampo kamo han tag-ada han aranihon nga padad-an niya hin mga mag-arani nga magtitirok han ira gin-ani.”

An Ebanghelyo han Ginoo.