PAGBASA I 

Gen 44:18-21, 23b-29; 45:1-5

Pagbasa tikang han Basahan han Genesis.

Dinaop hi Juda kan Jose ngan nagsiring, “Ginoo, tugoti gad ako hin pakighimangraw ha imo. Ayaw intawon ako kasinahi; sugad ka han hadi ngahaw namon. Ginpakianhan mo kami, ‘May-ada ba niyo amay, o lain nga bugto nga lalake?’ Binaton kami, ‘May-ada pa kami amay nga lagas na ngan hin usa nga manghud nga lalake, nga anak niya dida han lagas na hiya. Patay na an bugto hini nga bata, ngan hiya na la an buhi pa nga anak han iroy niya: hinigugma hiya hin duro han amon amay.’ Ginsiring mo kami hin pagdara ha iya nganhi basi makakita ka ha iya. Niyan nagsiring ka, ‘Diri kamo kakarawaton ha akon atubangan gawas kon umupod ha iyo an iyo gimamanghori nga bugto.’

“Han pagbalik namon ngadto han amon amay, amon hiya ginsumatan han imo iginsiring. Niyan ginpabalik kami niya ngan ginpapalit hin pagkaon. Binaton kami, ‘Diri kami makakakadto; diri kami kakarawaton han tawo gawas kon upod namon an amon gimamanghori nga bugto. Makadto la kami kon bunyog namon an amon gimamanghori nga bugto.’ Nagsiring ha amon an amon amay, ‘Maaram man kamo nga duha la nga mga anak nga lalake an igin-anak namon ngan hi Raquel nga akon asawa. Binayaan na ako han usa ha ira. Bangin ginpikaspikas hiya hin magpintas nga mga mananap, kay waray ko na man hiya hikit-i tikang hiya lumakat. Kon kuhaon niyo ini nga usa tikang ha akon yana, ngan may-ada mahinabo ha iya makakamatay ha akon an kabidoan nga iyo bubuhaton ha akon kay lagas na ako.’”

Waray na pakakapugong hi Jose han iya mga pagbati ha atubangan han iya mga surugoon, sanglit iya ginsugo hira ngatanan hin pagbaya han kwarto. Waray na iba nga kaupod niya han pagpakilala ni Jose ngadto han iya kabugtoan. Nagtangis hiya upod in makusog nga mga pagbakho nga hinbatian hiya han mga Ehiptohanon, ngan gindara an sumat ngadto han palasyo han hadi. Nagsiring hi Jose ngadto han iya kabugtoan, “Amo ako hi Jose. Buhi pa ba an akon amay?” Kundi han pakabati hini han iya kabugtoan, nahadlok hira hin duro nga waray hira pakabaton.

Niyan nagsiring ha ira hi Jose, “Alayon duok kamo ngadi.” Dinuok hira ngan nagsiring hiya, “Amo ako hi Jose nga iyo bugto nga iginbaligya niyo nganhi ha Ehipto. Yana ayaw kamo kabaraka o pagbasol ha iyo ngahaw tungod nga iginbaligya ako niyo nganhi. An Dyos amo gud an nagpadara ha akon hin pag-una ha iyo nganhi hin pagtalwas han mga kinabuhi hin mga tawo.

An Pulong han Ginoo.

SALMO RESPONSORIO

Sal 105:16-17, 18-19, 20-21

(b) Panumdum han mga orosahon nga ginbuhat han Ginoo.

1. Ira nasod gindad-an niya hin gutom,

ginkuha an tanan nira nga pagkaon.

Kundi ginpauna niya in batan-on,

hi Jose nga ginbaligya nga oripon. (b)

2. Mga tiil niya an ginkadinahan,

ngan an iya liog hin puthaw ginhigtan.

Tubtob nga an iya gintagna matuman,

an pulong han Ginoo ginpamatud-an. (b)

3. Hadi han Ehipto h'ya ginpabuhian,

gintalwas h'ya han hadi han kanasoran.

21Hiya ginhimo nga amo'n tinaporan,

han iya gobyerno, iya kagamhanan. (b)

EBANGHELYO    

Mt 10:7-15

Pagbasa tikang han santos nga ebanghelyo sumala kan Mateo.

Nagsiring hi Jesus han iya mga apostoles, “Lakat kamo ngan ipasangyaw nga hirani na an Ginhadian han langit. Tambala an mga magsakit, banhawa an mga minatay, linisi an mga sanlahon, ngan pagawsa an mga yawa. Kinarawat kamo nga waray pabaydi ha iyo, sanglit hatag man kamo nga diri kamo magpapabayad. Ayaw kamo pagdara hin bulawan, salapi, o bronse nga kwarta ha iyo mga bulsa; ayaw liwat kamo pagdara hin kanan makililimos supot ha iyo paglalaktan, o iba nga liliwanan o sandalyas labot han iyo sinusulot o tungkod. Angay tagan an nagkakabudlay han iya mga kinahanglanon. “Pag-abot niyo hin bungto o baryo, pamiling kamo hin mapasaka ha iyo, ngan pabilin kamo dida ha iya ngada han pagbaya niyo hito nga dapit. Pagsaka niyo hin balay siring kamo, ‘Maada unta ha iyo an kamurayaw.’ Kon karawaton kamo han tagbalay mapabilin an kamurayaw dida hito nga balay; kundi kon diri, bawia an igpapabilin nga kamurayaw. Ngan kon may-ada balay kon bungto nga diri kumarawat o diri mamati ha iyo, padpara an tapotapo han iyo mga tiil ngan bayai ito nga dapit. Tigamni ini! Ha Adlaw han Paghukom malolooy pa an Dyos han mga tawo han Sodoma ug Gomora kay han mga tawo hito nga bungto!”

An Ebanghelyo han Ginoo.