PAGBASA I 

Ex 11:10—12:14

Pagbasa tikang han Basahan han Exodo.

Ginbuhat nira Moises ug Aaron ini ngatanan nga mga milagro ha atubangan han hadi, kundi ginpatig-a han Ginoo an kasingkasing han hadi, ngan waray gud niya tugoti hin pagbaya han iya nasod an mga Israelita.

Naghimangraw an Ginoo kanda Moises ug Aaron didto ha Ehipto: “Amo ini an syahan nga bulan han tuig para ha iyo. Ighatag ini nga mga tugon ngadto han bug-os nga bungto han Israel: Dida han ikanapulo nga adlaw hini nga bulan kinahanglan magpili an kada tawo hin usa nga nati nga karnero o nati nga kanding para han iya panimalay. Kon diri damo an sakop han iya panimalay nga diri makakaubos hin bug-os nga nati nga karnero, mahihimo nga in usa nga karnero pagsaroan niya ngan han iya sapit nga amyaw, sumala han kadamo han mga tawo ngan sumala han kadamo nga makakaon han kada tawo. Makakagpili kamo hin karnero o kanding, kundi kinahanglan lalaki ini, usa ka tuig an panuigon, ngan waray gud mga karat-an. Laminga ini tubtob han ikanapulo kag-upat (14) nga adlaw han bulan, diin dida hiton gab-i pag-iihawon han bug-os nga bungto han Israel an hayop. Makuha hira han dugo ngan igpapahid ini dida han mga harigi han porta ngan han baybayon nga igbaw han porta han kabalayan diin kakaonon an mga hayop. Hito nga gab-i pag-aaslon an inihaw, ngan kakaonon ini upod hin magpait nga mga panakot ngan hin tinapay nga waray patubo. Ayaw kamo pagkaon hin bisan ano nga bahin han gin-ihaw nga hilaw o linaga, kundi kaona ini nga gin-asal hin bug-os, lakip an ulo, an mga tiil, ngan an mga sulod han ginhawa. Kinahanglan diri kamo magsalin hin bisan ano hini ngada han pagkaaga; kon may mahisalin, kinahanglan pagsunogon ini.

Kinahanglan kaonon ini niyo hin kadagmitan, nga nakabado na kamo nga daan, andam para hin paglakat, nga may sandalyas na an iyo mga tiil ngan tungkod ha iyo kamot. Amo ini an Paglabay nga pagbubuhaton niyo hin pagpasidungog ha akon nga Ginoo. “Dida hito nga gab-i maglalatas ako han tuna han Ehipto ngan papatayon ko an ngatanan nga suhag nga lalake, ma tawo ug ma mananap, ngan kakastigohon ko an ngatanan nga kadiyosan han Ehipto. Ako amo an Ginoo. Mahihimo nga tigaman han kabablayan nga iyo inuokyan an dugo dida ha mga harigi han porta. Kon hikit-an ko an dugo, lalabyan ko la kamo, ngan diri ko kamo paglalabtan kon kastigohon ko na an mga Ehiptohanon.

Kinahanglan pagsaurogon niyo ini nga adlaw nga usa nga pyesta para han Ginoo hin pagpahinumdom ha iyo han ginbuhat nakon nga Ginoo. Pagsauroga niyo ini ha ngatanan nga tiarabot nga panahon.”

An Pulong han Ginoo.

SALMO RESPONSORIO

Sal 116: 12-13, 15 & 16bc, 17-18

(b) Babayawon ko an irimnan han katalwasan; matawag ako han ngaran han Ginoo.

1. Ano an ak’ igbabalos han Ginoo,

han ngatanan niya nga kaupayan ko?

Pagdadad-an ko h’ya hin halad nga bino,

nga pasalamat nga gintalwas n'ya ako. (b)

2. Ha pagtan-aw han Ginoo

mahal gudman an kamatayon

han ‘ya mga baraan.

Imo ako surugoon, O Ginoo,

ngan nag-aalagad gud ako ha imo;

sugad gud han ginbuhat hadton nanay ko,

tikang hin kamatay gintalwas mo ako. (b)

3. Ighahalad, ighahatag ko ha imo,

halad nga tinubod nga pasalamat ko;

ngan maghahalad ak' han akon pag-ampo,

ngan matatawag han ngaran han Ginoo.

Ha katirok han tanan mo nga katawhan,

ha Templo han Jerusalem nga bungsaran,

akon ighahatag an ak' ginsumpaan. (b)

EBANGHELYO    

Mt 12:1-8

Pagbasa tikang han santos nga ebanghelyo sumala kan Mateo.

Waray pag-iha, naglatas hi Jesus han kaumhan hin trigo ha Adlaw nga Iparahuway. Ginutom an iya mga tinun-an, sanglit nagtikang hira pangutos han mga uhay han trigo ngan pangaon han mga tipasi. Han pakakita hini han mga Parisiyo, nagsiring hira kan Jesus, “Kitaa daw, supak ha aton Balaod an ginbubuhat han imo mga tinun-an ha Adlaw nga Iparahuway!” Binaton hi Jesus, “Waray ba kamo makabasa han ginbuhat ni David dida nga ginutom hiya ngan an iya mga kaupod? Sinulod hiya han balay han Dyos ngan kinaon hiya ngan an iya mga kaupod han tinapay nga iginhalad sa Dyos, bisan kon supak han Balaod nga mangaon hira hadto nga tinapay kay an mga padi la an tinutugotan hin pagkaon hini nga halad. Waray ba niyo mabasa ha Balaod ni Moises nga ha kada iparahuway nga adlaw nagtatalapas an mga padi han Templo han balaod mahitungod han Adlaw nga Iparahuway, kundi diri man hira nakakasala? Nasiring ako ha iyo nga may-ada dinhe labaw pa han Templo. Nasiring an kasuratan, ‘Diri ko karuyag in mga mananap nga halad, kundi an pagkalooy.’ Kon nakasabot la kamo han karuyag sidngon hini, diri konta niyo ginhuhukman an mga tawo nga waray sala. Kay Ginoo han Adlaw nga Iparahuway an Anak han Tawo.”

An Ebanghelyo han Ginoo.