PAGBASA I 

Ex 12:37-42

Pagbasa tikang han Basahan han Exodo.

Nagbaktas an mga Israelita tikang ha Rameses ngadto ha Sucot. May-ada mga unom kagatos kayokot (600,000) an kalalaken-an, labot han kababayen-an ngan kabataan. Inupod liwat ha ira in damo nga iba nga mga tawo ngan damo nga mga karnero, mga kanding ngan mga baka. Naghudno hira hin tinapay nga waray patubo tikang han dara nira nga daan minasa tikang ha Ehipto, kay tigda la an pagpaiwasa ha ira nga waray na nira panahon hin pag-andam han ira pagkaon o hin minasa nga may-ada patubo.

Nag-ukoy an mga Israelita didto ha Ehipto sulod hin upat kagatos katloan (430) ka tuig. Dida han adlaw han katapos na han upat kagatos katloan (430) ka tuig, binaya han Ehipto an ngatanan nga mga tribo han mga tawo han Ginoo. Gab-i adto nga nag-agma an Ginoo hin pagpagawas ha ira tikang ha Ehipto; ighahalad ini ngahaw nga gab-i ngadto han Ginoo para ha ngatanan nga panahon nga tiarabot sugad nga gab-i nga kinahanglan mag-agma an mga Israelita.

An Pulong han Ginoo.

SALMO RESPONSORIO

Sal 136:1 & 23-24, 10-12, 13-15

(b) An iya gugma waray kataposan.

1. Adton Ginoo pagpasalamatan ta,

kay padayon gud an iya paghigugma.

Pagpasalamatan kay maupay hiya,

kay padayon gud an iya paghigugma.

Bisan dida han ginpirde na gud kita,

kay padayon gud an iya paghigugma.

Ngan iya man nga ginpabuhian kita,

kay padayon gud an iya paghigugma. (b)

2. Mga Ehiptohanon ginpatay niya,

kay padayon gud an iya paghigugma.

Mga suhag nga kalalaken-an nira,

kay padayon gud an iya paghigugma.

Tikang ha Ehipto ginmandoan hira,

kay padayon gud an iya paghigugma.

An katawhan ini han Israel niya,

kay padayon gud an iya paghigugma.

Pinaagi han kusgan nga kamot niya,

kay padayon gud an iya paghigugma.

Han gamhanan nga butkon gindara hira,

kay padayon gud an iya paghigugma. (b)

3. Ginbuhag niya adton Dagat Pula,

kay padayon gud an iya paghigugma.

Dida hin ginpaagi'n katawhan n'ya,

kay padayon gud an iya paghigugma.

An hadi han Ehipto ginlumos niya,

kay padayon gud an iya paghigugma.

Pati an mga kasondalohan niya,

kay padayon gud an iya paghigugma. (b)

EBANGHELYO    

Mt 12:14-21

Pagbasa tikang han santos nga ebanghelyo sumala kan Mateo.

Nagkalakat an mga Parisiyo ngan nagsarabot hin pagpatay kan Jesus. Han pakabati ni Jesus mahitungod hini nga maraot nga hunahuna kontra ha iya, binaya hiya hadto nga dapit ngan sinunod ha iya in damo nga mga tawo. Gintambal niya an ngatanan nga magsakit, ngan gindid-an hira hin pagsumat han iba mahitungod ha iya, basi matuman an ginsiring han Dyos pinaagi kan Isaias nga manaragna:

“Iini an akon surugoon nga akon ginpili, an akon hinigugma nga akon nalilipayan. Ibubutang ko ha iya an akon Espiritu, ngan ipapasangyaw niya an akon paghukom ngadto han ngatanan nga mga nasod. Kundi diri hiya makikiglantugi o magoliat, diri ngani mamumulong hin dako nga tingog dida ha kadalanan. Diri hiya magbabari hin malubay nga tangbo, o maghuhuyop hin tikapaparong nga lampara. Magpapadayon hiya tubtob nga makapadaog hiya han katadongan; ngan paglalaoman hiya han ngatanan nga mga katawhan.”

An Ebanghelyo han Ginoo.