PAGBASA I

Gen 18:1-10a

Pagbasa tikang han Basahan han Genesis.

Pinakita an Ginoo kan Abraham didto han baraan nga kakahoyan han Mamre. Han nalingkod hi Abraham dida han porta han iya tulda ha takna nga naudtohan an adlaw, hinangad hiya ngan hinkit-an niya in tulo ka tawo nga natukdaw didto. Han paghikit-i gudla niya ha ira, dinalagan hiya hin pagtapo ha ira. Hinapa hiya ngan nagsiring, “Mga mano, ayaw gad kamo pagpadayon han iyo paglakat, kundi hapit kamo anay madaliay; andam ako hin pagsirbe ha iyo. Tugoti ako hin pagkuha hin tubig para hin panhimsaw niyo; makakapahuway kamo dinhe ha lindong hini nga kahoy. Makuha liwat ako hin gutiay nga pagkaon; makakapakusog ini ha iyo ha pagpadayon han iyo paglakat. Ginpasidunggan ako niyo pinaagi hin pagkanhi ha akon balay, sanglit tugoti gad ako hin pagsirbe ha iyo.” Binaton hira, “Salamat ha imo; buhata an imo karuyag.”

Nagdagmit hi Abraham ngadto han tulda ngan nagsiring kan Sara, “Dali kuha han gimamaupayi mo nga harina ngan paghimo hin tinapay.” Niyan dinalagan hiya ngadto han turil ngan ginpili in usa nga nati nga baka nga bata pa ngan matambok, ngan iginhatag ini ngadto hin usa nga surugoon nga nagdagmit hin pag-andam hini. Kinuha hi Abraham hin kisiyo, gatas, ngan han karne, ngan igindurot ini pagkaon ngadto han mga tawo. Didto ha sirong han kahoy, hiya gud an nagsirbe ha ira, ngan nangaon hira.

Niyan pinakiana kan Abraham an mga tawo, “Hain man hi Sara nga imo asawa?” “Aadto hiya ha sakob han tulda,” binaton hiya. Nagsiring in usa ha ira, “Mabalik ako siyam ka bulan tikang yana, ngan mag-aanak hi Sara nga imo asawa hin usa nga lalake.”

An Pulong han Ginoo.

SALMO RESPONSORiO          

Sal 15:2-3, 3-4, 5

(b) Ginoo, hin-o in makakasakob han imo tulda?

1. An tawo la nga han Dyos masinugtanon,

ha ngatanan nga butang diri masuson;

ngan dayuday nagbubuhat hin matadong,

matuod ug angkod iya mga pulong,

an diri nayubit pagtamay han iba. (b)

2. Diri nagdadaot kasangkayan niya,

diri napasarang hin sumat nga buwa,

ha mga kaamyaw, kahigrani niya.

An nasikway han Dyos iya sinusosnan,

an masinugtanon ginpapasidunggan;

iya mga saad pirme gintutuman,

bisan pa madako iya kabaraydan. (b)

3. Tungod hin kalooy hiya napautang,

hin mga patubo waray kinahanglan;

ngan diri gud hiya nga nahuhukipan,

pagtestigo kontra han diri salaan.

Adton magbuhat hini nga mga butang,

aada pirme hin waray kahadlokan. (b)

PAGBASA II

Col 1:24-28

Pagbasa tikang han Surat ni San Pablo ngadto han mga taga Colosas.

Mga kabugtoan: Yana nalilipay ako han akon mga pag-antos tungod ha iyo. Kay pinaagi han ako lawasnon nga mga pag-antos nabulig ako paghingpit han mga pag-antos nga kinahanglan antoson pa ni Cristo para han iya lawas nga amo an singbahan. Ngan ginhimo ako han Dyos nga surugoon han singbahan, ngan iginhatag niya ha akon ini nga buruhaton para han iyo kaupayan. An buruhaton amo an pagpahayag han bug-os nga mensahe, nga amo an misteryo nga gintago niya ha ngatanan nga mga tawo hadto pa nga nag-agi nga mga panahon, kundi iginpadayag na yana ha iya mga tawo. Amo ini an larang han Dyos: pagpahayag han iya sekreto ngadto han iya mga tawo, ini nga hura ngan mahimayaon nga sekreto nga igin-andam niya para han ngatanan nga mga tawo. Ngan amo ini an sekreto: Aada ha iyo hi Cristo, nga karuyag sidngon, makakaangbit kamo han kinaiya han Dyos. Sanglit, iginwawali namon hi Cristo ha ngatanan nga mga tawo. Ginpapahimangno ngan gintututdoan namon an ngatanan pinaagi han kinaadman nga amon mahihimo, basi madara an tagsatagsa ngadto ha atubangan han Dyos sugad nga hamtong nga tawo ha pakig-usa kan Cristo.

An Pulong han Ginoo.

EBANGHELYO

Lc 10:38-42

Pagbasa tikang han santos nga ebanghelyo sumala kan Lucas.

Samtang nagpadayon hi Jesus ngan an iya mga tinun-an ha ira paglakaton, inabot hiya ngadto hin usa nga baryo, diin gin-abiabi hiya ngadto ha iya balay hin usa nga babaye nga ginngangaranan kan Marta. May-ada bugto hi Marta nga Maria an ngaran, nga liningkod ha tiilan han Ginoo ngan namati han iya gintututdo. Nalisang hi Marta han iya damo nga mga buruhaton; sanglit dinaop hiya ngan nagsiring, “Ginoo, diri ka ba nababaraka nga ginpapabay-an la ako han akon bugto pagbuhat han ngatanan nga buruhaton ha balay? Sidnga daw nga buligan ako niya!” Binaton ha iya an Ginoo, “Marta, Marta! Naguguol ngan nababaraka ka hin damo nga mga butang, kundi usa la an kinahanglanon. Ginpili ni Maria an labi ka maupay nga butang, ngan diri na ini maaagaw ha iya.”

An Ebanghelyo han Ginoo.