PAGBASA I 

Kanta 3:1-4b

Pagbasa tikang han Kanta han mga Kanta.

Nasiring an karaslon nga babaye: Ha akon pagkaturog ha kada gab-i, gin-inop ko an akon higugmaon; ginbiling ko hiya, kundi waray ko hiya hiagii. Ginsinudoysudoy ko an syudad, ha kakalsadahan ngan mga kasuoksuokan. Ginbiling ko an akon higugmaon. Ginbiniling ko, kundi waray ko hiya hiagii. Hinkit-an ako han nagsusudoy nga mga magbarantay han syudad. Ginpakianhan ko hira, “Waray ba kamo makakita han akon higugmaon?” Ha akon gudla pagbaya ha ira, hin-agian ko hiya.

An Pulong han Ginoo.

Kon di’ man, ini

2 Cor 5:14-17

Pagbasa tikang han Ikaduha nga Surat ni San Pablo ngadto han mga taga Corinto.

Mga kabugtoan: Naghahadi ha amon an gugma ni Cristo yana nga nasayod na kami nga usa ka tawo in namatay para han ngatanan, nga an karuyag sidngon, an ngatanan nga mga tawo nakaangbit han iya kamatayon. Namatay hi Cristo para han ngatanan nga mga tawo basi adton may-ada kinabuhi diri la mabuhi para ha ira, kundi para la ha iya nga namatay ngan ginbanhaw tungod ha ira.

Sanglit diri na kami naghuhukom bisan kan kanay pinaagi hin mga suruklan nga hinimo la hin tawo. Bisan kon ha usa nga panahon ginhukman namon hi Cristo sumala hin kanan tawo nga mga suruklan, kundi waray na kami magbuhat hini yana. Adton nakikig-usa na kan Cristo nahihimo nga bag-o nga tawo; waray na an daan, liniwanan na hin bag-o.

An Pulong han Ginoo.

SALMO RESPONSORIO

Sal 63:2,3-4,5-6,8-9

(b) An akon kalag nauuhaw ha imo, Ginoo nga akon Dios.

1. O Dyos, ikaw amo gudla an Dyos nakon,

ngan pirme ko ikaw nga pangangandoyon;

ngan an bug-os gud nga pagkatawo nakon,

nag-uungara ha imo hin padayon.

Kauhaw han kalag ko para ha imo,

sugad hin tuna nga uga na hin duro;

nga waray gud tubig bis' usa ka turo,

akon unod nangangandoy gud ha imo. (b)

2. Sanglit pakitaa gudman ak' ha imo,

didto hadton ruwang hadton imo Templo;

pakitaa ako kon matiunan-o,

an pagkagamhanan, pagkaharangdon mo.

Kay han kinabuhi mauruupay pa,

adton imo dayuday nga paghigugma;

sanglit akon mga im-im nagkakanta,

ngan akon gudman nga pagdadayawon ka. (b)

3. Magpapasalamat gud ako ha imo,

samtang nga iini ngan buhi pa ako;

akon mga kamot aalsahon ngadto,

ngadto ha imo para gud hin pag-ampo.

Akon kalag akon gud pakakaonon,

ngan mabusog ini ngan di' na gutomon;

ngan magkakanta gud ak' hin malipayon,

pagdayaw ha imo an ak' kakantahon. (b)

4. Kay dayuday nagin kabulig ka nakon.

Tungod hin kalipay ako nagkakanta,

ha lambong han imo mga pako manta.

Ha imo an akon kalag pahangkopa,

tuo mo nga kamot ha ak' patalwasa. (b)

EBANGHELYO

Jn 20:1-2,11-18

Pagbasa tikang han santos nga ebanghelyo sumala kan Juan.

Temprano pa han aga han Domingo, samtang masirom pa, kinadto hi Maria Magdalena ha lubnganan, ngan hinkit-an niya nga kinuha na an bato nga ginsada han lubnganan. Nagdalagan hiya ngadto kanda Simon Pedro ngan han tinun-an nga hinigugma ni Jesus, ngan ginsumatan hira, “Ginkuha nira ha lubnganan an Ginoo, ngan diri kita maaram kon diin nira ibutang hiya!”

Nagtitinangis hi Maria nga natukdaw ha gawas han lubnganan. Nagtitinangis pa hiya han pag-ubo niya hin paghiling han lubnganan, ngan hinkit-an niya didto in duha nga mga anghel nga nakakabado hin busag, ngan nagkakalingkod ha dapit nga ginpahigdaan kan Jesus, usa ha ulohan, ngan an usa ha tiilan. Nagpakiana hira ha iya, “Babaye, kay ano nga nagtitinangis ka?” Nagbaton hiya, “Ginkuha nira an akon Ginoo ngan diri ako maaram kon diin nira igbutang hiya.” Han pakayakan niya hini, tinalikod hiya ngan hinkit-an niya hi Jesus nga natukdaw didto, kundi waray hiya makakilala nga hi Jesus adto. Nagpakiana hi Jesus ha iya, “Babaye, kay ano nga nagtitinangis ka? Hin-o an imo ginbibiling?” Naghunahuna hiya nga an magmarangno adto han tanaman, sanglit ginsiring niya, “Mano, kon ikaw man lugaring an nagkuha ha iya, sumati ako kon diin mo igbutang hiya, ngan kukuhaon ko hiya.” Nagsiring hi Jesus ha iya, “Maria!” Inatubang hi Maria ngan nagsiring ha iya ha Hebreo,  “Raboni!” (“Magturutdo” an kahulogan hini.) Nagsiring hi Jesus ha iya, “Ayaw ako pagkapti, kay waray pa ako saka ngadto han Amay. Kadtoa lugod an akon kabugtoan ngan sumati hira nga masaka ako ngadto han akon Amay ngan iyo Amay, han akon Dyos ngan iyo Dyos.” Sanglit linakat hi Maria Magdalena ngan ginsumatan niya an mga tinun-an nga hinkit-an niya an Ginoo ngan amo ini an iginsiring han Ginoo ha iya.

An Ebanghelyo han Ginoo.