PAGBASA I 

Ex 16:1-5, 9-15

Pagbasa tikang han Basahan han Exodo.

Nagkalakat tikang ha Elim an bug-os nga bungto han mga Israelita ngan inabot hira ngadto han kamingawan han Sin nga butnga han Elim ug Sinai dida han ikanapulo kaglima (15) nga adlaw han ikaduha nga bulan katapos nira bumaya han Ehipto. Didto han kamingawan nagngurutob hira ngatanan kontra kanda Moises ug Aaron ngan nagsiring hira, “Maupay pa kon ginpatay nala kami han Ginoo didto ha Ehipto. Didto nakakalingkod ngan nakakakaon pa kami hin karne ngan hin iba nga pagkaon sugad han amon karuyag. Kundi ginpagawas mo kami nganhi hini nga kamingawan basi mamatay kami ngatanan hin gutom.”

Nagsiring kan Moises an Ginoo, “Yana pauuranon ko tikang ha langit in pagkaon para ha iyo ngatanan. Kinahanglan gumawas kada adlaw an mga tawo ngan magtirok hira hin igo nga pagkaon para hito nga adlaw. Pinaagi hini, makakasabot na ako kon magsusunod ba hira han akon mga tugon. Dida han ikaunom nga adlaw, kinahanglan doblehon an ira pagtirok hin pagkaon, ngan andamon ini.”

Nagsiring kan Aaron hi Moises, “Pakanhia an bug-os nga bungto ngan patindoga hira ha atubangan han Ginoo, kay hinbatian niya an ira mga pagngurutob.” Han naghihimangraw hi Aaron ngadto han bug-os nga katilingban, inatubang hira ngadto han kamingawan, ngan ha gilayon pinakita didto hin usa nga dampog an himaya han Ginoo. Nagsiring an Ginoo, “Hinbatian ko an mga pagngurutob han mga Israelita. Sumati hira nga ha pagkakulopay magkakamay-ada hira karne nga kakaonon, ngan ha pagkaaga magkakamay-ada hira han ngatanan nga tinapay nga ira karuyag. Niyan mahibabaro hira nga ako amo an Ginoo nga ira Dyos.”

Dida han pagkagab-i nagkaabot in dako nga panon hin katamsihan nga sugad hin mga tukmo nga nakalukop han kampo, ngan han pagkaaga may-ada yamog nga nakaluob han kampo. Han kapara na han tun-og, nahibilin dida ha bawbaw han tuna in magnipis, magbusag, ngan mahumok nga butang nga sugad hin matapok nga bagtik nga yamog. Han paghikit-i la hini han mga Israelita, waray hira pakasabot kon ano ini, ngan may hinparupakiana ha hira, “Ano ini?”

An Pulong han Ginoo.

SALMO RESPONSORIO

Sal 78:18-19, 23-24, 25-26, 27-28

(b) Tinagan hira han Ginoo han tinapay nga tikang ha langit.

1. An pagsari han Dyos ira gintuyo,

an ira karuyag nga pagkaon hira nangaro.

Siring nira, “Makakahimo an Dyos nga Ginoo,

ha kamingawan pag-andam hin sasaro? (b)

2. Kundi ngadto ha langit nagsangpit hiya,

ngan nagsugo pagbukas han mga porta.

Pagkaon ha langit ginhatag ha ira,

han pagpaurani ha ira hin mana. (b)

3. Tinapay hin anghel an ira pinangaon,

iginhatag ha ira hin patakas an kada malon.

Hangin ha sinirangan ginpahuyop niya,

tungod han iya gahom, timog an ginpaguwa. (b)

4. Damo nga mga tamsi an iya ginpahugdon,

sugad hin kadamo han baras ha baybayon.

Ginpahugdon ini ha butnga han ginkampohan,

palibot han mga tulda han kapatagan. (b)

EBANGHELYO    

Mt 13:1-9

Pagbasa tikang han santos nga ebanghelyo sumala kan Mateo.

Hito manta nga adlaw binaya hi Jesus han balay, ngan kinadto ha tabi han lanaw, diin liningkod hiya hin pagtutdo. Duro hin kadamo han mga tawo nga nag-alirong ha iya, sanglit sinmakay hiya hin sakayan ngan didto liningkod hiya, samtang an mga tawo nagkatukdaw ha baybayon. Ginamit hiya hin mga pananglitan hin pagtutdo ha ira. “May usa ka tawo nga kinadto ha uma hin pagsabod. Han pagsabod niya han binhe, may-ada nahulog ha dalan, ngan inabot in mga tamsi ngan pinanuktok an mga binhe. Nagkahuglog an iba nga binhe ngada hin batoon nga dapit nga manipis la an tuna. Nanurok dayon kay manipis man la an tuna. Kundi han pagsirak na han adlaw, pinasoan adto nga bag-o nga mga tanom, ngan nagkalalaya dayon kay waray man makapanggamot hin maupay. Nagkahuglog an iba nga binhe ngada hin tunokon nga kabanwaan; pagtubo han kabanwaan natabonan an mga tanom. Kundi may nagkahuglog nga mga binhe ngada hin maupay nga tuna, ngan namunga: may-ada namunga hin usa kagatos (100) ka pilo, kaunoman (60) ka pilo an iba, ngan an iba katloan (30) ka pilo.” Ngan siniring hi Jesus, “Sanglit pamati kamo, kon may-ada niyo durunggan!”

An Ebanghelyo han Ginoo.