PAGBASA I 

Ex 19:1-2, 9-11, 16-20b

Pagbasa tikang han Basahan han Exodo.

Binaya han Refidim an mga tawo han Israel ngan inabot hira ngadto ha kamingawan han Sinai dida han syahan nga adlaw han ikatulo nga bulan katapos nira bumaya han Ehipto. Didto nagkampo hira ha ubos han Bukid Sinai.

Nagsiring kan Moises an Ginoo, “Mapakada ako ha imo dida hin madakmol nga dampog, basi makabati an mga tawo nga nakikighimangraw ako ha imo ngan basi tumoo na hira ha imo.” Ginsumatan ni Moises an Ginoo han iginbaton han mga tawo, ngan nagsiring ha iya an Ginoo, “Kadtoa an mga tawo ngan papaglinisa hira han ira kalugaringon yana ngan buwas para hin pagsingba. Kinahanglan pagbunakan nira an ira mga panapton, ngan maandam hira para sangbuwas nga adlaw. Dida hito nga adlaw malusad ako ngada ha Bukid Sinai diin hikikit-an ako han ngatanan nga mga tawo.

Dida han pagkaaga na han ikatulo ka adlaw nagdalugdog ngan nagkikidlat, pinakita in usa nga madakmol nga dampog ha bawbaw han bukid, ngan hinbatian in makusog hin duro nga tunog hin trompeta. Nangurog hin kahadlok an ngatanan nga mga tawo didto han kampo. Gin-unhan hira ni Moises paggawas han kampo hin pakigkita han Dyos, ngan tinindog hira didto han ubos han bukid. Naputos hin aso an bug-os nga Bukid Sinai, kay linusad an Ginoo dida hin kalayo. Inusbok an aso sugad hin tikang hin usa nga hudno, ngan nangurog hin duro an ngatanan nga mga tawo. Nagtikadako an tunog han trompeta. Nagyakan hi Moises ngan ginbaton hiya han Dyos pinaagi hin dalugdog. Linusad an Ginoo ngadto han bawbaw han Bukid Sinai ngan ginpakadto hi Moises ha bawbaw han bukid.

An Pulong han Ginoo.

SALMO RESPONSORIO

Dan 3:52, 53, 54, 55, 56

(b) Ha imo an himaya ug pagdayaw ha kadayonan.

1. Gindadayaw ka namon,

O Ginoo nga Dyos han amon kaapoy-apoyan.

Pagpasidunggan ngan pagtahoron unta ha kadayonan

an imo harangdon ngan baraan nga ngaran. (b)

2. Pagkantahon unta in mga imno

ha paghimaya ha imo ha kadayonan

ngan pagdayawon unta ikaw

nga baraan nga aadto hito nga Templo, (b)

3. Pagdayawon ka unta samtang nalingkod ka

ha hadianon mo nga trono.

Pagkantahon unta in mga imno

ha pagdayaw ha imo ha kadayonan. (b)

4. Diin nalingkod ka ha imo langitnon nga trono

ha igbaw han mga kerubin

ngan natan-aw ka ngadto ha tuna han mga minatay.

Pagdayawon nga pagsidunggan ka unta ha kadayonan. (b)

5. Pagdayawon ka unta didto ha kahitas-an.

Pagkantahon unta in mga imno

ha pagdayaw ha imo ha kadayonan. (b)

EBANGHELYO    

Mt 13:10-17

Pagbasa tikang han santos nga ebanghelyo sumala kan Mateo.

Dinaop kan Jesus an mga tinun-an ngan nagpakiana ha iya, “Kay ano ngan nagamit ka man hin mga pananglitan kon nagyayakan ka ha ira?” Binaton hiya, “Iginhatag ha iyo an paghibaro han mga tinago han Ginhadian han langit, kundi waray ini ihatag ha ira. Kay an may-ada na tatagan pa, basi mamay-ada niya labaw pa han iya kinahanglan; kundi an tawo nga waray, kukuhaon, bisan ngani an gutiay nga aada ha iya. Amo ini an katadongan han akon paggamit hin mga pananglitan kon nagyayakan ako ha ira: kay natan-aw hira, kundi diri nakakakita, ngan namamati hira, kundi diri nakakabati o nakakasabot. Sanglit iginpahinungod ha ira an panagna ni Isaias:

‘Bisan unanhon niyo hin pamati; diri kamo makakasabot; bisan unanhon niyo pagtinan-aw, diri kamo makakakita, kay matig-a an ulo hini nga mga tawo, ngan ira ginsagpo an ira mga talinga, ngan ginpiyong an ira mga mata. Kay diri hira buot makakita, ngan diri hira buot makabati, kay bangin kon makasabot hira, makabalik hira ha akon, nasiring an Dyos, ngan tatambalon ko hira.’

“Kundi kamo, hin kapalaran niyo! Kay nakakakita an iyo mga mata ngan nakakabati an iyo mga durunggan. Tigamni ini: damo nga mga manaragna ngan damo nga mga tawo han Dyos in karuyag pagkita han iyo kinikita, kundi waray hira makakita, ngan karuyag pagbati han iyo hinbatian kundi waray hira makabati.

An Ebanghelyo han Ginoo.