PAGBASA I

Gen 18:20-32

Pagbasa tikang han Basahan han Genesis.

Niyan nagkalakat an mga tawo ngan kinadto hira hin usa nga dapit nga hintatamdan nira an Sodoma, ngan binunyog ha ira hi Abraham hin pagpagikan ha ira. Ngan nagsiring ha iya la ngahaw an Ginoo, “Diri ko pagtatagoon kan Abraham an akon nahuhunahunaan hin pagbuhat. Mahihimo nga dako ngan gamhanan nga nasod an iya mga tulin, ngan pinaagi ha iya pagbebendisyonan ko an ngatanan nga mga nasod. Ginpili ko hiya basi pagsugoon unta niya an iya mga anak nga kalalaken-an ngan an iya mga tulin hin pagsugot ha akon ngan pagbuhat han matadong ngan kaangayan. Kon pagbuhaton nira ini, pagtutumanon ko para ha iya an ngatanan nga akon iginsaad.” Niyan nagsiring an Ginoo kan Abraham, “May-ada magpakaharadlok nga mga sumbong kontra han Sodoma ug Gomora, ngan dako na hin duro an ira sala. Kinahanglan lumusad ako hin pag-usisa kon matuod ba o diri an mga sumbong nga akon hinbatian.”

Niyan nagkalakat an duha ka tawo ngan nagtipakadto ha Sodoma, kundi pinabilin an Ginoo upod kan Abraham. Gindaop ni Abraham an Ginoo ngan ginpakianhan, “Tinuod ba nga pagpupuohon mo an mga waray sala upod han mga salaan? Kon may-ada kalim-an (50) nga magtadong nga mga tawo didto han syudad, pagpupuohon ba nimo an bug-os nga syudad? Diri mo ba pasasayloon an syudad basi matalwas an kalim-an (50)? Maaram ako nga diri mo pamamatayon an magtadong upod han mga salaan. Diri gud ini mahihimo! Diri gud ini pagbubuhaton nimo. Kon pagbuhaton mo ini, makakastigo an mga magtadong upod han mga salaan. Diri gud mahihimo ito! Kinahanglan magbuhat hin matadong an Maghurukom han bug-os nga tuna.” Binaton an Ginoo, “Kon hiagian ko didto ha Sodoma in kalim-an (50) nga magtadong nga mga tawo, pasasayloon ko an bug-os nga syudad tungod ha ira.” Nagyakan liwat hi Abraham, “Pasayloa intawon, O Ginoo, an akon pagpangahas hin pagpadayon hin pakighimangraw ha imo. Tawo man la ako, ngan waray ko gud katungod hin pagyakan hin bisan ano. Kundi bangin may-ada la kap-atan kaglima (45) nga magtadong nga mga tawo, kulang hin lima nga mag kalim-an (50). Pagpupuohon mo ba an bug-os nga syudad tungod nga nagkulang hin lima an magtadong?” Binaton an Ginoo, “Diri ko pagbubungkagon an syudad kon hiagian ko didto in kap-atan kaglima (45) nga magtadong nga mga tawo.” Nagyakan na liwat hi Abraham, “Bangin may-ada la kap-atan (40).” Binaton hiya, “Diri ko pagbubungkagon an syudad kon may-ada kap-atan (40).” Nagsiring hi Abraham, “Ayaw gad kasina, O Ginoo, kundi kinahanglan magyakan na liwat ako. Ano man kon may-ada la katloan (30)?” Nagsiring hiya, “Diri ko pagbubungkagon ini kon hiagian ko in katloan (30).” Nagsiring hi Abraham, “Pasayloa gad an akon pagpangahas hin pagpadayon hin pakighimangraw ha imo, O Ginoo. Pananglit karuhaan (20) la in hiagian?” Nagsiring hiya, “Diri ko pagbubungkagon an syudad kon hiagian ko in karuhaan (20).” Nagsiring hi Abraham, “Ayaw gad kasina, O Ginoo, ngan magyayakan ako hin makausa na gudla. Ano man kon napulo (10) la an hiagian?” Nagsiring hiya, “Diri ko pagbubungkagon ini kon may-ada napulo (10).”

An Pulong han Ginoo.

SALMO RESPONSORIO    

Sal 138:1-2, 2-3, 6-7, 7-8

(b) Ginoo, ha adlaw nga nasangpit ako ha imo, pinamatian mo ako.

1. Nagpapasalamat ak’ ha im’, Ginoo,

tikang gud han bug-os nga kasingkasing ko.

Nagkakanta ako pagdayaw ha imo,

atubangan han kadiyosan nga palso.

Gin-atubang ko baraan mo nga Templo,

nayukbo nga nadayaw han ngaran nimo.

(b) Ginoo, ha adlaw nga nasangpit ako ha imo, pinamatian mo ako.

2. Tungod han imo gugma nga kadayonan,

ngan han imo pagkamatinumanon man.

Imo ginpakita nga labaw han tanan,

an im’ mga sugo ngan an imo ngaran.

Han akon pagtawag imo ginbaton man,

im’ ak’ ginpakusog han imo kakusgan.

(b) Ginoo, ha adlaw nga nasangpit ako ha imo, pinamatian mo ako.

3. Bisan kon an Ginoo hitaas gudman.

Hiya napaid han ubos an kahimtang,

han mapahitas-on di’ h’ya katagoan.

Kon ginlilibotan ak’ hin kakurian,

Im’ gintatalwas han mga kataragman.

Mga kaaway ko im’ inaatohan.

(b) Ginoo, ha adlaw nga nasangpit ako ha imo, pinamatian mo ako.

4. Gintatalwas ako han im’ kagamhanan.

Tanan mo nga saad im' pagtutumanon,

O Ginoo, an im' gugma an padayon.

Hingpita gad adton imo gintikangan,

gintikangan nga buhat, di' mo talikdan.

(b) Ginoo, ha adlaw nga nasangpit ako ha imo, pinamatian mo ako.

PAGBASA II

Col 2:12-14

Pagbasa tikang han Surat ni San Pablo ngadto han mga taga Colosas.

Mga kabugtoan: Han pagbunyagi ha iyo, nahilubong kamo upod kan Cristo, ngan dida ha pagbunyag, ginbanhaw man liwat kamo upod kan Cristo, pinaagi han iyo pagtoo han gahom han Dyos, nga nagbanhaw ha iya tikang ha kamatayon. Hadto anay, mga patay kamo ha espiritu tungod han iyo mga sala, ngan tungod kay mga Hentil kamo nga diri sakop han Balaod. Kundi yana, ginbuhi na kamo han Dyos upod kan Cristo. Ginpasaylo kita han Dyos han ngatanan naton nga mga sala. Ginpara niya an ngatanan naton nga mga utang, upod an naggagapos hini nga mga turumanon, ngan ginkuha gud niya ini ngatanan pinaagi hin pagraysangan hini dida ha kros.

An Pulong han Ginoo.

EBANGHELYO

Lc 11:1-13

Pagbasa tikang han santos nga ebanghelyo sumala kan Lucas.

Usa ka panahon nag-ampo hi Jesus didto hin usa nga dapit. Kahuman na niya, nagsiring ha iya in usa han iya mga tinun-an, “Ginoo, tutdoi daw kami hin pag-ampo, sugad gud nga nagtutdo hi Juan han iya mga tinun-an.” Ginsiring hira ni Jesus, “Sugara hini an iyo pag-ampo: ‘Amay: Pagdayawon unta an imo baraan nga ngaran; maghadi ka unta ha amon. Tagi kami adlaw-adlaw han pagkaon nga amon kinahanglan. Pasayloa kami han amon nga sala, kay napasaylo man kami hadton mga makakasala ha amon. Ngan ayaw itugot nga mahingadto kami hin makuri nga pagsulay.’”

Nagsiring pa hi Jesus ha iya mga tinun-an, “Kon pananglitan usa ha iyo makadto ha balay hin sangkay ha katutnga hin gab-i, ngan masiring ha iya, ‘Sangkay, pahudma daw ako hin tulo ka bug-os nga tinapay. Inabot ha akon balay in usa ko nga sangkay nga naglalakaton, ngan waray ko sadang igdurot ha iya!’ Ngan kon pananglit magbaton an imo sangkay tikang ha sakob, ‘Ayaw na ako pagsamoka! Trangkado na an porta, ngan nangangahigda na an akon kabataan ug ako. Diri na ako makakabuhat hin paghatag ha imo hin bisan ano.’ Niyan, ano man an imo bubuhaton? Susumatan ko kamo, bisan kon waray niya tuyo hin pagbuhat ngan paghatag ha imo hin tinapay, tungod nga sangkay ka man niya, kundi mabuhat na la hiya, ngan mahatag han ngatanan nga imo ginkikinahanglan, kay diri ka man naawod hin pagpadayon hin pag-inaro. Sanglit nasiring ako ha iyo: pangaro, ngan makarawat kamo; pamiling, ngan nakakaagi kamo; pagtuktok, ngan aabrehan an porta ha iyo. Kay makarawat an nangangaro, ngan makakaagi an namimiling, ngan aabrehan an porta ha iya nga nagtutuktok. May-ada ba usa ha iyo nga mga amay, nga mahatag han iya anak hin halas kon mangaro hiya hin isda? O tatagan ba niyo hiya hin bungad kon mangaro hiya hin bonay? Bisan kon magraot kamo, maaram kamo humatag hin mag-upay nga mga butang han iyo mga anak. Sanglit labaw pa gud nga mahatag an Amay niyo ha langit han Espiritu Santo, hadton mga maaro ha iya!”

An Ebanghelyo han Ginoo.