PAGBASA I 

Ex 32:15-24, 30-34

Pagbasa tikang han Basahan han Exodo.

Linug-song han bukid hi Moises nga nakakadara han duha nga mga papan nga bato nga sinuratan paluyoluyo han mga sugo. Ginhimo han Dyos ngahaw an mga papan ngan igingguhit ngada hini an mga sugo. Hinbatian ni Josue nga nanggogogliat an mga tawo ngan nagsiring hiya kan Moises, “Hinbabatian ko an aringasa hin araway didto han kampo.”

Nagsiring hi Moises, “Diri ito goliat hin pagdarag-an o hin pagtangis hin kapakyasan, kundi aringasa ito tungod hin karibhong.” Han hiraniay na gud han kampo hi Moises nga hinkit-an na niya an nati nga baka ngan an nagsasarayaw nga mga tawo, nasina hiya hin duro. Ipinusdak niya ngadto ha ubos han bukid an mga papan nga bato ngan napusak ini. Ginkuha niya an nati nga baka nga ira ginhimo, gintunaw ini, ginpulbos hin pino, ngan ginsaktan hin tubig. Katapos ginpainom niya hini an mga tawo han Israel. Nagsiring hiya kan Aaron, “Ano an ginbuhat ha imo hini nga mga tawo nga imo man hira pinapagbuhat hin sugad ka makaharadlok nga sala?” Binaton hi Aaron, “Ayaw gad ako kasinahi; maaram ka man nga karuyag hini nga mga tawo an pagbuhat hin magraot. Nagsiring hira ha akon, ‘Diri kami maaram kon ano na an nahinabo hini nga tawo nga Moises nga nagpagawas ha amon ha Ehipto, sanglit ighimo kami hin usa nga diyos nga magmamando ha amon.’ Ginhangyo ko hira nga dad-on nira ngadi ha akon an ira mga alahas nga bulawan, ngan adton mga may-ada hini, ginkuha nira ini ngan iginhatag nira ha akon. Ipinilak ko an mga alahas ngadto han kalayo ngan ginawas ini nga nati nga baka.”

Han pagkabuwas nagsiring hi Moises ha mga tawo, “Nakabuhat kamo hin makaharadlok nga sala. Kundi yana, masagka na liwat ako han bukid ngadto han Ginoo; bangin makapatangdo ako han Ginoo hin pagpasaylo han iyo mga sala.” Sanglit binalik hi Moises ngadto han Ginoo ngan nagsiring, “Nakabuhat ini nga mga tawo hin makaharadlok nga sala. Naghimo hira hin usa nga diyos nga bulawan ngan ira ginsingba ini. Pasayloa intawon an ira mga sala; kundi kon dumiri ka, paraa nala an akon ngaran dida han basahan nga ginsuratan mo han mga ngaran han imo mga tawo.” Binaton an Ginoo, “An mga maaram la hadton mga nakasala ha akon an paparaon ko dida han akon basahan. Kadto na, dad-a an mga tawo ngadto han dapit nga akon iginhimangraw ha imo. Hinumdomi nga mag-uuna ha iyo an akon anghel, kundi maabot an panahon nga pagkakastigohon ko ini nga mga tawo tungod han ira sala.”

An Pulong han Ginoo.

SALMO RESPONSORIO

Sal 106:19-20, 21-22, 23

(b) Pasalamati an Ginoo, kay maupay hiya.

1. Ha Horeb naghimo hin nati nga bulawan,

ngan ginsingba nira ini nga ladawan.

An kaanyag han Dyos ginbalyoan nira,

ladawan hin hayop nga nakaon hin banwa.

(b) Pasalamati an Ginoo, kay maupay hiya.

2. Nalimot hira han Dyos nga nagtalwas ha ira,

ha Ehipto pinaagi han dagko nga buhat niya;

ha Lusayon nga Dagat ginbuhat niya,

mga urosahon, makatitingala!

(b) Pasalamati an Ginoo, kay maupay hiya.

3. Sanglit, siring han Dyos, hira pagpupuohon,

kon diri pa hi Moises, an iya surugoon;

inatubang han Dyos basi hin pagpugong,

han iya kapungot nga diri ipadayon.

(b) Pasalamati an Ginoo, kay maupay hiya.

 PAGBASA II          

Mt 13:31-35

Pagbasa tikang han santos nga ebanghelyo sumala kan Mateo.

Naghimangraw liwat hi Jesus ha ira hin lain nga pananglitan: “An Ginhadian han langit sugad hin liso hin mustasa. Kinukuha ini hin usa ka tawo ngan iginpupugas ha iya uma. Amo ini an gigutiayi han ngatanan nga liso, kundi kon natubo na, nahihimo nga gidadakoi han ngatanan nga mga tanom. Nahihimo ini nga kahoy, ngan napakada an katamsihan ngan nagsasalag dida han iya mga sanga.”

Naghimangraw liwat hi Jesus ha ira hin lain pa nga pananglitan: “An Ginhadian han langit sugad hin patubo. Kinukuha ini hin babaye ngan iginmamasa ha usa ka takos nga harina, tubtob han pagtubo han bug-os nga minasa.”

Gimamit hi Jesus hin mga pananglitan pagsumat hini ngatanan nga mga butang ha mga tawo; waray hiya maghimangraw hin bisan ano ha ira nga diri pinaagi hin pananglitan. Ginbuhat niya ini basi matuman an iginsiring han manaragna: “Magamit ako hin mga pananglitan kon magyayakan ako ha ira, pagsusumatan ko hira hin mga butang nga waray pa nira hibaroi tikang mahimo an kalibutan.”

An Ebanghelyo han Ginoo.