PAGBASA I 

1 Jn 4:7-16

Pagbasa tikang han Syahan nga Surat ni San Juan.

Hinigugma ko nga kasangkayan, maghigugmaay kita, kay natikang sa Dyos an gugma, sanglit anak han Dyos ngan nakilala han Dyos an bisan hin-o nga nahigugma. Diri nakilala han Dyos an bisan hin-o nga diri nahigugma, kay gugma an Dyos. Sugad hini an pagpakita han Dyos han iya gugma ha aton: ginsugo niya nganhi ha kalibutan an amo la nga iya Anak, basi magkaada kita kinabuhi pinaagi ha iya. Amo ini an gugma: diri nga kita an naghigugma han Dyos, kundi nga an Dyos an naghigugma ha aton ngan nagsugo han iya Anak, basi pinaagi ha iya mapasaylo an aton mga sala. Hinigugma ko nga kasangkayan, kon sugad hini an paghigugma han Dyos ha aton, kinahanglan maghigugmaay man kita. Waray pa nakakita han Dyos; kon maghigugmaay kita, nag-uokoy an Dyos dinhe ha aton ngan nahihingpit an iya gugma dinhe ha aton.

Maaram kita nga diri kita magsasayop nga nag-uokoy kita dida han Dyos ngan nag-uokoy man an Dyos dinhe ha aton tungod kay ihinatag niya ha aton an iya Espiritu. Ngan aton hinkit-an ngan iginsumat ha iba nga an Amay nagsugo han iya Anak nga magin Magtaralwas han kalibutan. An bisan hin-o nga magpahayag nga hi Jesus amo an Anak han Dyos, nag-uokoy dida ha Dyos ngan nag-uokoy man an Dyos dida ha iya. Ngan makilala ngan matoo kita han kanan Dyos paghigugma ha aton. Gugma an Dyos, ngan an bisan hin-o nga nag-uokoy dida han gugma nag-uokoy dida ha Dyos, ngan nag-uokoy man an Dyos dida ha iya.

An Pulong han Ginoo.

SALMO RESPONSORIO

Sal 34: 2-3, 4-5, 6-7, 8-9, 10-11

(b) Tilawi ngan kitaa an pagkamaupay han Ginoo.

1. Pasalamatan ko pirme an Ginoo,

pagdayaw ha iya di’ maundang ako.

Tungod han iya buhat ak' dadayawon,

an ginsakit mamati, magmalipayon!

(b) Tilawi ngan kitaa an pagkamaupay han Ginoo.

2. An pagkaharangdon han aton Ginoo,

upod ha akon isangyaw na gud niyo;

pagdayaw ha iya mag-urusa kita,

aton pagbayawon adton ngaran niya.

Nag-ampo ak’ ngan ginbaton han Ginoo,

gintalwas niya han tanan kahadlok ko.

(b) Tilawi ngan kitaa an pagkamaupay han Ginoo.

3. Tan-aw ha iya ngan magmalipayon man;

Di’ na mahiawod, di' na maalohan.

Nasangpit an kabos ngan nabaton hiya,

natalwas han tanan kakurian nira.

(b) Tilawi ngan kitaa an pagkamaupay han Ginoo.

4. Anghel han Ginoo bantay, panalipod,

an ha Ginoo nahadlok ngan natahod.

Ha imo ngahaw, Ginoo, usisaha,

makikita mo nga maupay gud hiya;

palaran an tawo, waray kabaraka,

kon iya katalwasan tikang ha iya.

(b) Tilawi ngan kitaa an pagkamaupay han Ginoo.

Sanglit kamo nga mga katawhan niya

iyo pasidunggan gud an Ginoo ta.

An tanan nga masinugtanon ha iya

diri gud kulangan kinahanglan nira.

Bisan mga liyon may'da pagkagutom,

may’da nira pagkukulang hin pagkaon;

kundi an ha Ginoo masinugtanon

hin kaupayan diri gud kukulangon.

(b) Tilawi ngan kitaa an pagkamaupay han Ginoo.

EBANGHELYO

Jn 11:19-27

Pagbasa tikang han santos nga ebanghelyo sumala kan Juan.

Damo nga mga Judiyo an kinadto hin pagliaw kanda Marta ug Maria mahitungod han kamatay han ira bugto. Han pakabati ni Marta nga tiarabot hi Jesus, kinadto hiya hin pagtapo, samtang hi Maria nagpabilin ha balay. Nagsiring hi Marta kan Jesus, “Ginoo, diri unta napatay an akon bugto kon nakanhi ka pa! Kundi maaram ako nga bisan yana, ihahatag ha imo han Dyos an bisan ano nga imo pangaroon ha iya.” Ginsumatan hiya ni Jesus, “Mababanhaw an imo bugto.” Nagbaton hi Marta, “Maaram ako nga mababanhaw hiya ha kataposan nga adlaw.” Nagsiring hi Jesus ha iya, “Hi ako an pagkabanhaw ngan an kinabuhi. Mabubuhi an bisan hin-o nga natoo ha akon, bisan kon mamatay hiya; ngan diri na gud mamamatay an bisan hin-o nga buhi nga natoo ha akon. Natuod ka ba hini?” Nagbaton hiya, “Oo, Ginoo, natoo ako nga amo ka an Mesiyas, an Anak han Dyos, nga makanhi ha kalibutan.”

An Ebanghelyo han Ginoo.

kon di’ man, ini

Lc 10:38-42

Pagbasa tikang han santos nga Ebanghelyo sumala kan Lucas.

Samtang nagpadayon hi Jesus ngan an iya mga tinun-an ha ira paglakaton, inabot hiya ngadto hin usa nga baryo, diin gin-abiabi hiya ngadto ha iya balay hin usa nga babaye nga ginngangaranan kan Marta. May-ada bugto hi Marta nga Maria an ngaran, nga liningkod ha tiilan han Ginoo ngan namati han iya gintututdo. Nalisang hi Marta han iya damo nga mga buruhaton; sanglit dinaop hiya ngan nagsiring, “Ginoo, diri ka ba nababaraka nga ginpapabay-an la ako han akon bugto pagbuhat han ngatanan nga buruhaton ha balay? Sidnga daw nga buligan ako niya!” Binaton ha iya an Ginoo, “Marta, Marta! Naguguol ngan nababaraka ka hin damo nga mga butang, kundi usa la an kinahanglanon. Ginpili ni Maria an labi ka maupay nga butang, ngan diri na ini maaagaw ha iya.”

An Ebanghelyo han Ginoo.