PAGBASA I 

Lev 23:1, 4-11, 15-16, 27, 34b-37

Pagbasa tikang han basahan han Levitico.

 Iginhatag han Ginoo kan Moises inin masunod nga mga turumanon, Igsangyaw niyo an masunod nga mga pyesta dida han igintalaan nga mga panahon. An Pyesta han Paglabay nga ginsasaurog ha pagpasidungog han Ginoo, natikang dida hiton katunod han adlaw han ikanapulo kag-upat (14) nga adlaw han syahan nga bulan. Dida han ikanapulo kaglima (15) nga adlaw natikang an Pyesta han Tinapay nga Waray Patubo, ngan sulod hin pito ka adlaw kinahanglan diri kamo kumaon hin tinapay nga may-ada patubo. Dida han syahan hini nga mga adlaw magtitirok kamo hin pagsingba ngan diri kamo magbubuhat han iyo kada adlaw nga mga buruhaton. Ighalad niyo ha Ginoo an iyo mga halad nga pagkaon sulod han pito ka adlaw. Dida hiton ikapito ka adlaw magtitirok na liwat kamo hin pagsingba, ngan diri kamo magbubuhat han iyo kada adlaw nga mga buruhaton.

Kon sumulod na kamo han tuna nga iginhahatag ha iyo han Ginoo ngan mag-ani na kamo han iyo mga abot, dad-a niyo an syahan nga upong ngadto han padi. Ighahalad ini niya nga usa nga linain nga halad ngadto han Ginoo basi karawaton kamo. Ighahalad ini han padi dida han adlaw nga sunod gud la han Adlaw nga Iparahuway.

“Pag-ihap ma pito ka bug-os nga semana kahuman han Adlaw nga Iparahuway diin gindara niyo an usa ka upong nga inani ngan ginhalad niyo ngadto han Ginoo. Dida han ikakalim-an (50) ka adlaw, an adlaw kahuman han ikapito nga Adlaw nga Iparahuway, paghalad ngadto han Ginoo hin lain nga bag-o nga halad nga pagkaon.

An ikanapulo (10) nga adlaw han ikapito nga bulan amo an adlaw diin pagtutumanon an ikinatuig nga seremonyas hin pagkuha han mga sala han mga tawo. Dida hito nga adlaw ayaw gud kamo pagkaon hin bisan ano; pagtirok kamo hin pagsingba ngan paghalad kamo hin usa nga halad nga pagkaon ngadto han Ginoo.

Natikang an Pyesta han mga Payagpayag dida han ikanapulo kaglima (15) nga adlaw han ikapito nga bulan ngan nagpapadayon ini sulod hin pito ka adlaw. Dida han syahan hini nga mga adlaw pagtirok kamo hin pagsingba ngan ayaw kamo pagbuhat han iyo kada adlaw nga mga buruhaton. Ha kada adlaw sulod han pito ka adlaw maghahalad kamo hin usa nga halad nga pagkaon. Dida han ikawalo nga adlaw pagtirok liwat kamo hin pagsingba ngan paghalad kamo hin usa nga halad nga pagkaon. Adlaw ini hin pagsingba, ngan ayaw gud kamo pagbuhat hin bisan ano nga buruhaton.

“Amo ini an mga pyesta nga siringbahon diin ginpapasidunggan niyo an Ginoo pinaagi hin pagtirok niyo hin pagsingba ngan hin paghalad hin mga halad nga pagkaon, mga halad nga tutuboron, mga halad nga inani, mga unong nga hayop, ngan mga halad nga bino, sumala han ginkikinahanglan adlaw-adlaw.”

An Pulong han Ginoo.

SALMO RESPONSORIO

Sal 81:3-4, 5-6, 10-11ab

(b) Goliat hin kalipay sa Dyos

nga aton mananalipod.

1. Tikangi an tokar ngan tokari an mga tamborin,

pagtokar hin matahom nga tokar

ha mga arpa ngan mga salteryo.

Huypa an budyong para han pyesta;

kon bag-o an bulan ngan kon kadayaw ito.

(b) Goliat hin kalipay sa Dyos

nga aton mananalipod.

2. Amo ini an balaod ha Israel,

usa nga sugo tikang han Dyos ni Jacob.

Iginsugo niya ito ha mga tawo han Israel,

han pagsulonga niya han tuna han Ehipto.

(b) Goliat hin kalipay sa Dyos

nga aton mananalipod.

3. Kinahanglan diri gud kamo

mag-alagad hin langyaw nga diyos,

o magsingba kan bisan hin-o gawas ha akon.

Amo ako an Ginoo nga imo Dyos

nga nagpagawas ha imo han tuna han Ehipto.

(b) Goliat hin kalipay sa Dyos

nga aton mananalipod.

PAGBASA II          

Mt 13:54-58

Pagbasa tikang han santos nga ebanghelyo sumala kan Mateo.

Inuli ngadto han iya kalugaringon nga bungto. Nagtutdo hiya didto ha ira sinagoga, ngan nahipausa an nagpakabati ha iya, “Diin man niya kuhaa in sugad nga kinaadman?” nagpakiana hira. “Gin-unan-o niya hin pagbuhat han mga milagro? Diri ba hiya an anak han panday? Diri ba hi Maria an iroy niya ngan diri ba hira Santiago, Jose, Simon, ug Judas an iya kabugtoan? Diri ba nag-uukoy dinhe an iya kabugtoan nga kababayen-an? Diin man kuhaa niya ini ngatanan?” Sanglit ginsalikway hiya nira. Nagsiring hi Jesus ha ira: “Gintatahod in manaragna bisan diin gawas han iya kalugaringon nga bungto ngan han iya kalugaringon nga panimalay.” Waray hiya pagbuhat didto hin damo nga mga milagro kay waray man nira pagtoo.

An Ebanghelyo han Ginoo.