PAGBASA I 

Num 20:1-13

Pagbasa tikang han Basahan han Numero.

Dida han syahan nga bulan inabot an bug-os nga bungto han Israel ngadto ha kamingawan han Zin ngan nagkampo hira didto ha Cades. Didto namatay hi Miriam ngan iginlubong.

Waray tubig didto han ira ginkampohan, sanglit gin-alirongan han mga tawo hira Moises ug Aaron, ngan nagsumbong: “Maupay pa ada kon nagkamatay na la kami ha atubangan han Tulda han Ginoo upod han amon mga igkasi Israelita. Kay ano nga gindara kami niyo nganhi hini nga kamingawan? Basi la magkamatay kami dinhe upod han amon mga kahayopan? Kay ano nga ginpagawas kami niyo ha Ehipto nganhi hini nga makalolooy nga dapit nga waray bisan ano nga naturok? Waray mga pugas, waray mga igos, waray mga ubas, waray mga granada. Waray ngani bisan tubig nga irimnon!” Hinirayo tikang han mga tawo hira Moises ug Aaron ngan tinindog dida han agian han Tulda. Hinapa hira ha tuna, ngan pinmakita ha ira an himaya han Ginoo.

Nagsiring kan Moises an Ginoo, “Kuhaa an tungkod nga aadto ha atubangan han Kahon han Ginsaaran ngan tiroka niyo ngan hi Aaron an bug-os nga bungto. Didto ha atubangan nira ngatanan sidnga an bato nga aadto didto nga humatag hin tubig, ngan mabugwak in tubig tikang han bato para han mga tawo, basi uminom hira ngan an ira mga kahayopan.” Kinadto hi Moises ngan ginkuha niya an tungkod sumala han iginsugo han Ginoo. Gintirok niya ngan hi Aaron an bug-os nga bungto ha atubangan han bato ngan nagsiring hi Moises, “Pamati, kamo nga mga magsinupilon! Makakuha ba kami hin tubig para ha iyo tikang hini nga bato?” Niyan inalsa ni Moises an tungkod ngan ginbalbag niya an bato hin makaduha, ngan binugwak in dako nga sapa hin tubig, ngan nanginom an ngatanan nga mga tawo ngan mga hayop. Kundi ginbusaan han Ginoo hira Moises ug Aaron. Nagsiring hiya, “Tungod nga kulang kamo hin pagtoo nga makakapakita ako han akon baraan nga gahom ha atubangan han mga tawo han Israel, diri kamo magpapangulo ha ira ngadto han tuna nga akon iginsaad hin paghatag ha ira.”

Nahinabo ini didto ha Meriba, diin nagnginurutob an mga tawo han Israel kontra han Ginoo ngan diin iginpakita niya ha ira an iya pagkabaraan.

An Pulong han Ginoo.

SALMO RESPONSORIO

Sal 95:1-2, 6-7, 8-9

(b) Kun yana nga adlaw namamati la kamo han iya tingog! Ayaw patig-aha an iyo kasingkasing.

1. Kadi, an Ginoo aton pagdayawon!

Magkanta, magrayhak kit' hin malipayon;

ngadto han Dyos hiya'n panalipod naton,

hiya nga magtaralwas ta an pagdaygon.

Hin pagpasalamat ngadto kit' ha iya,

magrugya hin mga pagdayaw nga kanta,

(b) Kun yana nga adlaw namamati la kamo han iya tingog! Ayaw patig-aha an iyo kasingkasing.

2. Kadi, yukbo kita, aton pagsingbahon,

luhod ha Ginoo, naghimo ha aton!

Kay amo man ada hiya an Dyos naton,

kita katawhan, gin-ataman nga panon.

(b) Kun yana nga adlaw namamati la kamo han iya tingog! Ayaw patig-aha an iyo kasingkasing.

3. Pamati hiya nagyayakan yana:

“Kasingkasing niyo ayaw patig-aha;

sugad kaapoyan niyo ha Meriba,

sugad didto han kamingawan ha Masa.

Didto ak’ ginsulay, ira ginsarihan,

Bis’ ak’ mga buhat ira nakita na.”

(b) Kun yana nga adlaw namamati la kamo han iya tingog! Ayaw patig-aha an iyo kasingkasing.

PAGBASA II          

Mt 16:13-23

Pagbasa tikang han santos nga ebanghelyo sumala kan Mateo.

Niyan kinadto hi Jesus ha katunaan hirani han bungto han Cesarea Filipo, ngan didto ginpakianhan niya an iya mga tinun-an, “Sumala han siring han mga tawo, hin-o man kono an Anak han Tawo?” Nagbaton hira, “May nasiring nga hiya amo hi Juan nga Parabunyag; nasiring an iba nga hiya amo hi Elias; ngan nasiring na man liwat an iba nga hiya amo hi Jeremias o usa han mga manaragna.” Nagpakiana hi Jesus ha ira, “An ha iyo, hin-o man ako?” Binaton hi Simon Pedro, “Ikaw amo an Mesiyas, an Anak han Dyos nga buhi.” Ginsiring hiya ni Jesus, “Palaran ka, Simon nga anak ni Juan, kay waray umabot ha imo ini nga kamatuoran tikang hin bisan hin-o nga tawo, kundi iginhatag ini ha imo han akon Amay ha langit. Sanglit nasiring ako ha imo: ikaw hi Pedro ngan ha bawbaw hini nga bato titindogon ko an akon singbahan, ngan diri makakadaog hini an gahom han kamatayon. Ihahatag ko ha imo an mga yawi han Ginhadian han Langit; an imo diri hubaran dinhe ha tuna diri man liwat huhubaran dinhe ha langit; ngan an imo hubaran dinhe ha tuna huhubaran man liwat didto ha langit.”

Niyan gintugon ni Jesus an iya mga tinun-an nga diri magsumat bisan kan kanay nga hiya amo an Mesiyas.

Tikang hadto ginsiring ni Jesus an iya mga tinun-an: “Kinahanglan kumadto ako ha Jerusalem ngan mag-antos hin damo nga mga kakurian tikang ha kamot han katigurangan, mga puno han kapadian, ngan mga magturutdo han Balaod. Papatayon ako, kundi mababanhaw liwat ako ha ikatulo ka adlaw.” Ilinain anay hiya ni Pedro han iba, ngan sidngon hiya, “Diri unta itugot han Dyos nga mahinabo ini ha imo!” Liningi hi Jesus ngan sidngon hi Pedro, “Iwas dida, Satanas! Nakakaulang ka ha akon, kay an imo hunahuna, hunahuna la hin tawo, diri kanan Dyos!”

An Ebanghelyo han Ginoo.