PAGBASA I

Kin 18:6-9

Pagbasa tikang han Basahan han Kinaadman.

Daan ginsumatan an amon kaapoy-apoyan kon ano an mahinanabo hito nga gab-i, basi hira malipay ngan madasig hin matapod nga pagsarig han imo mga saad ha ira. Maaram na an imo mga tawo nga imo pagtatalwason an matadong nga nasod ngan pagpupuohon an ira mga kaaway. Pinaagi han amo ngahaw nga buhat imo ginkastigo an amon mga kaaway ngan imo kami ginpasidunggan nga malipayon ngan gintawag mo kami ngada ha imo ngahaw. Ha ngatanan hini nga panahon an mainampoon nga mga tawo tikang hini nga matadong nga nasod daan na naghalad hin hilom hin mga tinubod nga hayop, ngan nagkasarabot hira nga ira pagtutumanon an balaod han Dyos ngan mag-iinangbitay hira han ira mga kaupayan ngan mga kataragman. Daan na hira nagkanta hadto nga mga imno hin pagdayaw.

An Pulong han Ginoo.

SALMO RESPONSORiO          

Sal 33:1 & 12, 18-19, 20-22

(b) Malipayon adton bungto nga ginpili han Ginoo nga iya kalugaringon.

1. Ngatanan nga magtadong, paglipay kamo,

tungod hadton mga ginbuhat han Ginoo;

kamo ngatanan, dayawa hiya niyo,

ngatanan nga masinugtanon nga tawo.

Palaran an nasod nga Dyos an Ginoo,

sugad man an pinili nga mga tawo.

(b) Malipayon adton bungto nga ginpili han Ginoo nga iya kalugaringon.

2. An mga ginbabantayan han Ginoo,

An natahod ha iya nga mga tawo.

An may paglaom natoo ha iya,

an nasarig han iya dayon nga gugma.

Ira mga kalag iya tatalwason,

tikang han kaoripon han kamatayon;

ngan iya ini hira pagbubuhion,

ha mga panahon nga may-ada katgutom.

(b) Malipayon adton bungto nga ginpili han Ginoo nga iya kalugaringon.

3. An Ginoo an amon ginlalaoman,

amon panalipod ngan amon katabang.

Hiya an surok han amon kalipayan,

natapod kami han iya mahal nga ngaran.

Sanglit, O Ginoo, hinaot pa unta,

nga maamon an dayuday mo nga gugma;

samtang ibinubutang namon an paglaom,

dida ha imo, Ginoo nga Dyos namon.

(b) Malipayon adton bungto nga ginpili han Ginoo nga iya kalugaringon.

PAGBASA II

Heb 11:1-2, 8-19

[Heb 11:1-2, 8-12]

Pagbasa tikang han Surat ngadto han mga Hebreo.

[Mga kabugtoan: An pagtoo amo an marig-on nga pagsarig han mga butang nga aton ginlalaoman, ngan han mga butang nga diri naton kinikita. Pinaagi han ira pagtoo an mga tawo hadton una nga panahon ginpakaupay han Dyos.

Tungod hin pagtoo, nagsugot hi Abraham han pagtawga ha iya han Dyos, ngan napakadto hiya han tuna nga iginsaad han Dyos nga ihahatag ha iya. Binayaan niya an iya kalugaringon nga tuna ug diri maaram hiya kon tikain hiya. Tungod hin pagtoo nag-ukoy hiya sugad hin usa nga lumalangyaw didto han tuna nga iginsaad ha iya han Dyos. Nag-ukoy hiya didto hin mga tulda sugad kanda Isaac ngan Jacob, nga kinarawat liwat han amo ngahaw nga saad tikang han Dyos. Kay ginhulat ni Abraham an syudad nga an Dyos amo an nagplano, naglarang ngan nagtukod, kanay patukoranan diri gud mapupukan.

Tungod hin pagtoo nahimo hi Abraham nga amay, bisan kon lagas na hiya hin duro ngan baw-as hi Sara. Tinapod hiya nga an Dyos magtutuman han iya saad. Bisan kon patay na hiya, ini nga usa nga tawo amo an tinikangan han damo nga katulinan, sugad kadamo han mga bitoon ha langit, sugad kadamo han diri maiihap nga baras ha baybayon.]

Nagkamatay ini ngatanan nga mga tawo dida han ira pagtoo. Waray nira makarawat an mga iginsaad han Dyos, kundi bisan kon hirayo pa ini kaupay, nakita na nira ngan ira ginpaabot, ngan kinilala hira nga lumalangyaw ngan lumalabay la ngay-an hira ha tuna. Adton naghimangraw hin sugad, nagpapasabot nga nagbibiling hira hin tuna nga ira kalugaringon. Waray na hira mangandoy han tuna nga ira tinalikdan; kon naghunahuna pa hira, may-ada pa unta nira higayon hin pagbalik. Lugod namulat hira hin mauruopay nga tuna, an langitnon nga tuna. Sanglit waray an Dyos naawod ha ira nga magtawag hira ha iya nga ira Dyos, kay nag-andam hiya hin syudad para ha ira.

Tungod hin pagtoo nakahimo hi Abraham hin paghalad han iya anak nga hi Isaac, nga usa nga unong nga tinubod dida han pagsarihi ha iya han Dyos. Amo hi Abraham an ginsaaran han Dyos, kundi andam hiya hin paghalad han iya usa la nga anak nga usa nga unong nga tinubod. Nagsiring an Dyos kan Abraham, “Magkakamay-ada ka mga tulin pinaagi kan Isaac.” Nagtoo hi Abraham nga makakabanhaw an Dyos kan Isaac—ngan makakasiring kita nga kinarawat manggud ni Abraham hi Isaac tikang han kamatayon.

An Pulong han Ginoo.

EBANGHELYO

Lc 12:32-48

[Lc 12:35-40]

Pagbasa tikang han santos nga ebanghelyo sumala kan Lucas.

Nagsiring hi Jesus ha iya mga tinun-an, “Ayaw kamo kahadlok, gutiay nga panon, kay nalilipay an Amay niyo hin paghatag ha iyo han Ginhadian. Ibaligya an ngatanan niyo nga mga garamiton, ngan ihatag an kwarta ha mga kablas. Pag-arog kamo para ha iyo ngahaw hin mga supot nga diri nadudumog, ngan tiroka an iyo mga manggad didto ha langit, diin diri gud ini maiibanan, kay waray kawatan nga makakakuha hini nga manggad ngan waray tangkob nga makakakutkot ha ira. Kon hain an imo mga manggad dayuday aadto man an imo kasingkasing.

[“Pag-andam dayuday kamo han bisan ano nga maabot, nga daan hinugtan ha hawak an iyo mga panapton, ngan daan dinagkotan an iyo mga suga, sugad hin mga surugoon nga naghuhulat han ira agaron pagbalik tikang hin kombite han pagkasal. Aabrehan nira dayon an porta para ha iya, kon umabot ngan magtuktok hiya. Palaran adton mga surugoon nga hiabtan han agaron nga nagmamata ngan andam han iya pagbalik! Susumatan ko kamo, magbabakos hiya, palilingkoron niya hira ha pangaraonan, ngan pagdudurotan hira. Palaran hira kon hiabtan hira nga andam, bisan kon umabot hiya ha katutnga, o ha kaagahon na! Ngan tigamni ini: kon maaram la an tagbalay han takna han pag-abot han kawatan, diri gud hiya matugot nga sudlon an iya balay. Ngan pag-andam man liwat kamo, kay maabot an Anak han Tawo ha takna nga diri niyo ginpapamulat hiya.”]

Nagsiring hi Pedro, “Ginoo, iginsusumat mo ba ini nga pananglitan para la ha amon, o para ba ini han ngatanan?” Binaton an Ginoo, “Hin-o man ngay-an an matinumanon ngan may-ada aram nga surugoon? Amo hiya an tataporan han iya agaron pagdumara han panimalay ngan paghatag ha iba nga mga surugoon han ira bahin han pagkaon, ha igo nga panahon. Palaran adto nga surugoon nga hiabtan han iya agaron ha iya pagbalik, nga nagbubuhat hini! Susumatan ko kamo hin tinuod, itatapod han agaron hadto nga surugoon an ngatanan nga iya mga manggad. Kundi kon sumiring ha iya ngahaw adto nga surugoon, ‘Maiha pa bumalik an akon agaron,’ ngan magtikang hiya pagpinanlatob han iba nga surugoon nga kalalaken-an ug kababayen-an, ngan pagkinaon, pag-ininom, ngan paghinubog, niyan maoli an agaron ha adlaw nga diri hiya ginpapamulat han surugoon, ngan ha takna nga diri niya hinbabaroan. Pagkakastigohon hiya han iya agaron, ngan paaangbiton hiya han sirot han mga diri magsinugtanon. “An surugoon nga maaram han karuyag igpabuhat ha iya han iya agaron, kundi diri nag-aandam ngan diri nagbubuhat han karuyag han iya agaron, pagkakastigohon hin damo nga paglatob; kundi an surugoon nga diri maaram han karuyag han iya agaron, ngan nagbubuhat hin butang nga angay hin paglatob, pagkakastigohon hin diri damo nga paglatob. An tawo nga gintagan hin damo aaroan hin damo; ngan an tawo nga gintagan hin darudamo aaroan liwat hin darudamo.

An Ebanghelyo han Ginoo.