PAGBASA I 

Deut 10:12-22

Pagbasa tikang han Basahan han Deuteronomio.

Nagsering han mga tawo hi Moises, “Yana, mga tawo han Israel, pamatii niyo an karuyag han Ginoo nga iyo Dyos nga pagtumanon niyo: Tahora niyo an Ginoo ngan tumana an ngatanan nga iya igsusugo ha iyo. Higugmaa hiya niyo, alagda hiya niyo ha bug-os niyo nga kasingkasing, ngan sugta niyo an ngatanan niya nga mga balaod. Ihahatag ko ini ha iyo yana nga adlaw para han iyo kaupayan. An Ginoo an tag-iya bisan han gihihitaasi nga kalangitan; iya liwat an tuna ngan an ngatanan nga aada hini. Kundi labis an paghigugma han Ginoo han iyo kaapoy-apoyan nga asay kamo an ginpili niya, diri an iba nga mga tawo, ngan kamo pa gihapon an iya pinili nga mga tawo asta ngada yana. Sanglit tikang yana pagsugot kamo han Ginoo ngan ayaw na pagpatig-aha an iyo mga ulo. An Ginoo nga iyo Dyos amo an gilalabawi nga Dyos han ngatanan nga kadiyosan ngan Ginoo han ngatanan nga mga ginoo. Dako, makagarahum, ngan makaaramdok hiya ngan angay hiya pagsugton. Waray hiya pinalabi ngan diri hiya nakarawat hin mga hukip. Gintatalingoha niya nga katagan hin katadongan an mga ilo ngan mga balo nga kababayen-an. Nahigugma hiya han mga lumalangyaw nga nag-uokoy tampo han aton mga tawo, ngan nahatag hiya ha ira hin pagkaon ngan mga panapton. Sanglit higugmaa niyo an mga lumalangyaw, kay mga lumalangyaw kamo hadto anay didto ha Ehipto. Tahora niyo an Ginoo nga iyo Dyos ngan hiya gud la an iyo pagsingbaha. Pagmatinumanon kamo ha iya ngan ha ngaran han Ginoo pagsumpa kamo. Dayawa hiya niyo kay amo hiya an iyo Dyos, ngan hinkit-an niyo han iyo kalugaringon nga mga mata an dagko ngan urosahon nga mga butang nga ginbuhat niya para ha iyo. Han pagkadto ha Ehipto han iyo kaapoy-apoyan, kapitoan (70) la hira ka tawo. Kundi yana ginhimo kamo han Ginoo nga iyo Dyos nga magdamo sugad kadamo han kabiton-an ha langit.

An Pulong han Ginoo.

SALMO RESPONSORIO

Sal 147:12-13, 14-15, 19-20

(b) Jerusalem, pagdayawa an Ginoo.

1. Jerusalem, pagdayawa an Ginoo!

O Sion, pagdayawa adton Dyos nimo!

Ginpaparig-on n’ya mga ganghaan mo,

ginpapakaupay n’ya im’ mga tawo.

(b) Jerusalem, pagdayawa an Ginoo.

2. Gintatalwas n’ya an im’ mga pag-ultan,

tikang han tanan nga mga kataragman.

Ngan iya ka gud ginpapatagusyahan

hadton giuupayi nga katrigohan.

Usa nga pagsugo n’ya ngadto han tuna,

ngan tuman gud dayon an ginyakan niya.

(b) Jerusalem, pagdayawa an Ginoo.

3. Nahatag h’ya’n pulong ha iya katawhan,

kan Israel mga balaod, tugon man.

Waray gudman ini niya pagbuhata

ngadto han mga kanasoran nga iba.

Mga balaod n’ya di’ mag-aram hira.

An Ginoo pagdayawa, pagdayawa!

(b) Jerusalem, pagdayawa an Ginoo.

EBANGHELYO    

Mt 17:22-27

Pagbasa tikang han santos nga ebanghelyo sumala kan Mateo.

Dida nga nagkatirok na an ngatanan nga mga tinun-an didto ha Galilea, nagsiring hi Jesus ha ira, “An Anak han Tawo diri na maiha itutubyan ngadto han mga tawo, nga magpapatay ha iya; kundi mababanhaw hiya ha ikatulo ka adlaw.” Nagmabidoon an mga tinun-an.

Han pag-abot ni Jesus ngan han iya mga tinun-an ha Capernaum, hinmarani kan Pedro an mga parasukot hin buhis han Templo ngan nagpakiana, “Nagbabayad ba an iyo magturutdo han buhis han Templo?” “Oo, nagbabayad!” binaton hi Pedro. Han pagsulod ni Pedro han balay, nag-una hin pagyakan hi Jesus, “Simon, ano man an imo paghunahuna? Hin-o in nagbabayad hin mga kabaraydan o buhis ngadto han mga hadi hini nga kalibutan? An mga bungtohanon ba o an mga lumalangyaw?” “An mga lumalangyaw,” binaton hi Pedro. Nagsiring hi Jesus, “Kon sugad, diri kinahanglan magbayad an mga bungtohanon. Kundi basi diri masina ha aton ini nga mga tawo, kadto ha lanaw ngan pangawil. Butunga an syahan nga isda nga makubit, ngan hiaagian mo ha sulod han iya baba in kwarta nga igo hin pagbayad han akon ngan han imo buhis han Templo; kuhaa ini ngan baydi an aton mga buhis.”

An Ebanghelyo han Ginoo.