PAGBASA I 

Deut 31:1-8

Pagbasa tikang han Basahan han Deuteronomio.

Nagpadayon hi Moises hin paghimangraw ngadto han mga tawo han Israel, ngan nagsiring, “ usa kagatos ug karuaan (120) na yana an akon panuigon ngan diri na ako makakahimo hin pagpangulo ha iyo. Ngan labot pa hini, nagsiring na ha akon an Ginoo nga diri ako matabok han Jordan. An Ginoo ngahaw nga iyo Dyos amo an mag-uuna ha iyo ngan magbubungkag han mga nasod didto, basi makagtag-iya kamo han ira tuna; ngan hi Josue an mahihimo nga pangulo niyo sumala han iginsiring han Ginoo. Pagbubungkagon han Ginoo ito nga mga tawo sugad nga ginpirde niya hira Sihon ngan Og nga mga hadi han mga Amoreohanon, ngan ginbungkag niya an ira nasod. Ihahatag ha iyo han Ginoo an pagdarag-an kontra ha ira, ngan buhata ha ira sumala han akon igintugon ha iyo. Pagmaisog ngan pagpakalalake kamo. Ayaw kamo kahadlok ha ira. An Ginoo ngahaw nga iyo Dyos amo an maupod ha iyo. Diri kamo niya pagkakawangon o pagbabayaan.”

Niyan gintawag ni Moises hi Josue ngan ginsiring hiya ha atubangan han ngatanan nga mga tawo han Israel, “Pagmaisog ngan pagpakalalake; amo ikaw an magmamangulo hini nga mga tawo basi makagtag-iya hira han tuna nga iginsaad han Ginoo han ira kaapoy-apoyan. An Ginoo ngahaw amo an magtututdo ngan maupod ha imo. Diri ka niya pagkakawangon o pababayaan, sanglit ayaw pagtalaw o kahadlok.”

An Pulong han Ginoo.

SALMO RESPONSORIO

Deut 32:3-4ab, 7, 8, 9 & 12

(b) An malon han Ginoo an iya katawhan.

1. Dadayawon ko an ngaran han Ginoo,

ngan igsusumat han iya mga tawo

an iya pagkagamhanan.

“An Ginoo amo an iyo gamhanan nga Bato,

hingpit ngan matadong

ha ngatanan niya nga mga paagi.

Matinumanon ngan matood an iyo Dyos;

matadong ngan maupay an iya buhat.

(b) An malon han Ginoo an iya katawhan.

2. “Hinumdomi niyo an mga naglabay nga panahon;

pakianhi an iyo mga ginikanan

ngan susumatan kamo;

pakianhi an iyo mga katigurang

ngan igsusumat ha iyo an nahinabo.

(b) An malon han Ginoo an iya katawhan.

3. Iginhatag han Gilalabawi

ngadto han kanasoran

an mga tuna nga ira malon;

iginpahimutang niya an pag-uokyan

han mga katawhan.

Gintagan niya hin magbarantay

nga langitnon an tagsa nga nasod.

(b) An malon han Ginoo an iya katawhan.

4. Kundi iya ginpili an mga tulin ni Jacob

para ha iya ngahaw.

An Ginoo la an nagmando han iya mga tawo,

nga waray buligi hiya hin langyaw nga diyos.

(b) An malon han Ginoo an iya katawhan.

EBANGHELYO    

Mt 18:1-5, 10, 12-14

Pagbasa tikang han santos nga ebanghelyo sumala kan Mateo.

Hadto nga takna kinadto kan Jesus an mga tinun-an ngan nagpakiana, “Hin-o man an gidadakoi didto han Ginhadian han langit?” Gintawag ni Jesus in usa nga bata ngan ginpatukdaw niya ha atubangan nira, ngan nagsiring, “Tigamni ini: kon diri kamo magbalhin ngan masugad hin kabataan diri gud kamo makakasulod han Ginhadian han langit. An gidadakoi didto han Ginhadian han langit amo adton nagpapaubos ngan nasusugad hini nga bata. Ngan adton nakarawat hin sugad hini nga bata ha akon ngaran nakarawat man ha akon.

“Bantayi nga diri kamo magtamay han usa hini nga mga gudtiay nga kabataan. Nasiring ako ha iyo nga dayuday aada an ira mga anghel ha atubangan han akon Amay ha langit. “Ha iyo paghunahuna, ano an bubuhaton hin usa ka tawo kon mawad-an hiya hin usa han iya usa kagatos (100) nga mga karnero? Babayaan niya an kasiyaman kagsiyam (99) nga nananabsab ha ligid han pungtod, ngan malakat hin pamiling han nawara. Nasiring ako ha iyo, kon hiagian niya ini, labaw kamalipayon hiya tungod hini nga usa nga karnero kay han kasiyaman kagsiyam  (99) nga waray mawara. Ha amo gud nga pagkaagi, diri karuyag han Amay niyo ha langit nga may mawara hini nga mga gudtiay nga kabataan.

An Ebanghelyo han Ginoo.