PAGBASA I 

Deut 34:1-12

Pagbasa tikang han Basahan han Deuteronomio.

Tikang ha kapatagan han Moab sinagka hi Moises ha Bukid Nebo, ngadto ha sampaw han Bukid Pisga ha sinirangan han Jerico, ngan didto iginpakita ha iya han Ginoo an bug-os nga tuna: an katunaan han Galaad tubtob han bungto han Dan didto ha amihanan; an bug-os nga katunaan han Neftali; an mga katunaan han Efraim ug Manases; an katunaan han Juda tubtob han Dagat Mediterraneo didto ha katundan; an timogan nga bahin han Juda; ngan an kapatagan nga naabot tikang ha Zoar ngadto ha Jerico nga syudad hin kakahoyan nga palmera. Niyan nagsiring an Ginoo kan Moises, “Amo ini an tuna nga akon iginsaad kanda Abraham, Isaac, ug Jacob nga akon ihahatag ngadto han ira mga tulin. Ginpakita ko ikaw hini, kundi diri ko ikaw tutugotan hin pagkadto hini nga katunaan.” Sanglit namatay hi Moises nga surugoon han Ginoo didto han tuna han Moab, sumala han iginsiring han Ginoo. Iginlubong hiya han Ginoo didto hin usa nga Kahamub-an ha Moab, nga tugbang han bungto han Betpeor, kundi ngada yana nga adlaw waray maaram han dapit nga ginlubngan ha iya. Usa kagatos ug karuhaan (120) an panuigon ni Moises han kamatay niya; makusog la gihapon hiya ngan maupay pa an iya pagkita. Nagmabidoon an mga tawo han Israel tungod ha iya sulod hin katloan (30) ka adlaw didto han kapatagan han Moab.

Napuno hin kinaadman hi Josue nga anak ni Nun, kay gintudlok hiya ni Moises nga iya saliwan. Nagsugot kan Josue an mga tawo han Israel ngan nagtuman han mga sugo nga iginhatag ha ira han Ginoo pinaagi kan Moises.

Waray gud manaragna han Israel nga sugad kan Moises; nga suok kaupay han Ginoo. Waray na gud iba nga manaragna nga nagbuhat hin mga milagro ngan mga orosahon sugad hadton ipinapagbuhat han Ginoo kan Moises kontra han hadi han Ehipto, han iya mga opisyal ngan han bug-os nga nasod. Waray na iba nga manaragna nga nakagbuhat han dagko ngan magpakaharadlok nga mga butang nga ginbuhat ni Moises ha atubangan han bug-os nga Israel.

An Pulong han Ginoo.

SALMO RESPONSORIO

Sal 66:1-3a, 5 & 8, 16-17

(b) Dayawa an Dyos nga nagpadasig han akon kasingkasing.

1. Ngadto ha Dyos goliat hin malipayon,

tanan nga katawhan, hiya pagdayawon!

Pasidungog han iya ngaran kantahon,

halari hin pagdayaw nga malipayon!

Siring ngadto ha Dyos, “Pagkaurosahon!

hadton mga butang nga im' buruhaton!

(b) Dayawa an Dyos nga nagpadasig han akon kasingkasing.

2. Kadi kitaa kanan Dyos binuhatan,

dagkong mga buhat dida han katawhan.

Pagdayaw han Dyos, kamo nasod ngatanan,

Himoa’n iyo pagdayaw nga hidunggan.

(b) Dayawa an Dyos nga nagpadasig han akon kasingkasing.

3. Kamo ngatanan nga ha Dyos matahoron,

kadi ha akon ngan iyo pamation;

kay akon igsasaysay an susumaton,

han ngatanan nga ginbuhat n’ya ha akon.

Nagsangpit ak’ hin pakibulig ha iya,

ngan ak’ hiya gindayaw hin mga kanta.

(b) Dayawa an Dyos nga nagpadasig han akon kasingkasing.

ebanghelyo    

Mt 18:15-20

Pagbasa tikang han santos nga ebanghelyo sumala kan Mateo.

Nagsiring hi Jesus ha iya mga tinun-an, “Kon makasala ha imo in imo bugto, kadtoa ngan sumati hiya han iya sayop. Kundi buhata ini hin hilom, nga kamo la nga duha. Kon mamati hiya ha imo, mahibabalik an iyo nga duha maupay nga kaburut-on. Kundi kon diri hiya mamati ha imo, pagdara hin duha o tulo ka tawo, basi an tagsa nga sumbong pagmatuoron pinaagi hin duha o tulo nga mga testigo sumala han iginsiring han kasuratan. Kon diri hiya mamati ha ira, igsumat na ngahaw an ngatanan ngadto han singbahan. Ngan kon diri pa hiya mamati han singbahan, hunahuna na hiya sugad nga usa nga diri natoo han Dyos o usa nga parasukot hin buhis. “Sanglit nasiring ako ha iyo ngatanan: kon ano an iyo igdiri ha tuna igdidiri didto ha langit; kon ano an iyo itugot ha tuna itutugot didto ha langit. “Ngan igsisiring ko pa ha iyo: kon in duha ha iyo dinhe ha tuna magka-uyon hin pangaro hin bisan ano nga butang, ihahatag ito ha iyo han akon Amay ha langit. Kay kon may duha o tulo nga magkatirok hin pag-ampo ha akon ngaran, aadto ako upod ha ira.”

An Ebanghelyo han Ginoo.