PAGBASA I 

Jos 3:7-10a, 11, 13-17

Pagbasa tikang han basahan ni Josue nga manaragna.

Nagsiring kan Josue an Ginoo, “An akon bubuhaton yana nga adlaw makakaaghat han ngatanan nga mga tawo hin pagpasidungog ha imo nga usa nga dako nga pagkatawo ngan makakasabot hira nga kaupod ako nimo sugad nga hadto kaupod ako ni Moises. Sumati an mga kapadian nga nagpapas-an han Kahon han Ginsaaran nga ha pag-abot nira ha salog, kinahanglan lumugsong hira ha tubig ngan umukoy hira nga natukdaw hirani han pangpang.”

Ngan nagsiring hi Josue han mga tawo, “Pakadi kamo ngan pamati kamo kon ano an ighihimangraw ha iyo han Ginoo nga iyo Dyos. Ha iyo pagsulong, bubukoron gud niya an mga Canaanhon. An Kahon han Ginsaaran han Ginoo han ngatanan nga tuna tumalabok han Jordan una ha iyo. Kon an mga kapadian nga nagpapas-an han Kahon han Ginsaaran han Ginoo han ngatanan nga tuna lumugsong na ngadto ha tubig, maukoy hin pag-awas an Jordan ug an tubig nga tipailawod magpupundok ha usa nga dapit.”

Panahon adto hin kat-ani ngan binaha an salog. Han pagbaya han kampo han mga tawo hin pagtabok han Jordan, nag-una ha ira an mga kapadian nga nagdadara han Kahon han Ginsaaran. Ha paglugsong gud la ha salog han kapadian, inukoy dayon hin pag-awas an tubig ngan nagpundok didto ha may iraya, didto ha Adam, an syudad nga sapit la han Zaretan. Naukoy gud an pag-awas tipailawod ngadto han Patay nga Dagat ngan nakahimo an mga tawo hin pagtalabok harani ha Jerico. Samtang an mga tawo natalabok dida hin mamara nga tuna, tinukdaw an kapadian nga nagpapas-an han Kahon han Ginsaaran dida hin mamara nga tuna ha butnga han Jordan tubtob han pakatabok han ngatanan nga mga tawo.

An Pulong han Ginoo.

SALMO RESPONSORIO

Sal 114:1-2, 3-4, 5-6

(b) Alleluia!

1. Han pagbaya han Israel nga katawhan tikang

Dit’ han Ehipto nga katunaan,

han pag-iwas han kan Jacob kaliwatan

tikang han tuna nga langyaw an yinaknan.

Nahimo an Juda nga amo’n katawhan

nga kanan Ginoo nasod nga baraan;

ngan nahimo an Israel nga iya man

kalugaringon niya nga ginsakopan.

(b) Alleluia!

2. Tinan-aw an dagat dayon dumalagan,

hinunong pag-awas an Salog Jordan.

Linukso daw kanding adton kabukiran,

ngan daw nati’ nga karnero’n kapungtoran.

(b) Alleluia!

3. Ano ini, Dagat, nga dinmalagan ka?

Ngan ikaw man, Jordan, waray umawas na?

Ano, kabukiran, daw kanding naglukso?

Ngan kapungtoran daw nati nga karnero?

(b) Alleluia!

EBANGHELYO    

Mt 18:21–19:1

Pagbasa tikang han santos nga ebanghelyo sumala kan Mateo.

Dinaop hi Pedro kan Jesus ngan nagpakiana, “Ginoo, kon an akon bugto magpinakasala ha akon, makakapira ko ba hiya pasasayloa? Makapito ba?” Binaton hi Jesus, “Diri la makapito, kundi makakapitoan kag pito. Kay an Ginhadian han langit sugad hin hadi nga nakigtuhay han mga utang han iya mga surugoon. Nagtikang pa la hiya pagtuhay, nga dad-on ha iya in usa nga makalilisang kadako han iya utang. Tungod nga waray man hiya igo nga igbarayad han iya utang, nagsugo an iya agaron nga igbaligya hiya sugad nga usa nga oripon, upod an iya asawa ngan an iya kabataan, ngan an ngatanan nga iya hiagi, basi makabayad han utang. Linuhod an surugoon ha atubangan han iya agaron ngan nakimalooy hin pagsiring, ‘Agaron, angan-angana gad ako, ngan babayaran ko ikaw han ngatanan!’ Nalooy ha iya an agaron, sanglit ginpara na la an iya utang, ngan ginpalakat hiya. “Ginawas an tawo ngan iginkita hin iya igkasi surugoon nga nakautang hin pira la ka pesos ha iya. Ginrabot hiya, ginkaptan ha liog, ngan ginsiring, ‘Baydi ako han imo nautang!’ Linuhod ha iya an iya igkasi—surugoon ngan nakimalooy intawon, ‘Angan-angana gad ako ngan babayaran ko ikaw!’ Kundi waray hiya pabaribad; iginpapriso lugod niya ngada han pakabayad han utang. Han pakakita han iba nga mga surugoon han nahinabo, duro an ira kabido, ngan kinadto hira ha ira agaron hin pagsumat han ngatanan nga nahinabo. Sanglit iginpatawag han agaraon an surugoon ngan ginsiring hiya, ‘Waray ka pulos nga oripon! Ginpasaylo ko ikaw han bug-os mo nga utang, kay nakimalooy ka ha akon. Unta imo kinakalooyan an imo igkasi—surugoon sugad nga nalooy ako ha imo.’ Duro gud an kapungot han agaron, ngan iginpapriso an surugoon basi sirotan ngada han pakabayad niya han ngatanan nga iya mga utang.” Ngan gintapos ni Jesus an pananglitan hin pagsiring, “Amo man ini an bubuhaton han akon Amay ha langit ha tagsa ha iyo, kon diri kamo magpasaylo han iyo bugto tikang han iyo kasingkasing.”

Katapos ni Jesus pagyakan hini nga mga butang, binaya hiya han Galilea ngan kinadto han katunaan han Judea, ha tabok han Salog Jordan.

An Ebanghelyo han Ginoo.