MISA HA KAADLAWAN

PAGBASA I 

Gnp 11:19a; 12:1-6a, 10ab

Pagbasa tikang han basahan han Ginpadayag.

Nabuksan an templo han Dyos didto ha langit, ngan hinkit-an didto an Kahon han Ginsaaran.

Niyan hinkit-an didto ha langit in dako nga orosahon: may-ada usa nga babaye nga nagbabado han adlaw, ngan natamak han bulan, ngan an iya ulo ginkoronahan hin dose nga mga bitoon. Tipag-aranak na hiya, ngan iginuliat niya an kaul-ol ngan an kasakit han pag-anak. May-ada lain nga urosahon nga hinkit-an didto ha langit. May dako nga pula nga dragon, nga pito an iya mga ulo ngan napulo an iya mga sungay, ngan may-ada korona an kada ulo. Gindanas han iya ikog an ikatulo ka bahin han mga bitoon ha langit ngan pinanlabog niya ha tuna. Tinukdaw hiya ha atubangan han babaye nga tipag-aranak nga andam hin pagkaon han bata kon matawo na. Ngan nag-anak an babaye hin lalake nga maghahadi hin mahigpit hin duro han ngatanan nga mga nasod. Kundi gin-agaw an bata ngan gindara ngadto han Dyos ngan han iya trono. Kinalagiw an babaye ngadto ha kamingawan, ngadto hin dapit nga gin-andam han Dyos para ha iya.

Niyan hinbatian ko in dako nga tingog didto ha langit nga nasiring, “Yana inabot na an katalwasan tikang han Dyos! Yana iginpakita na han Dyos an iya gahom hin ka Hadi!

An Pulong han Ginoo.

SALMO RESPONSORIO

Sal 45:10, 11, 12, 16

(b) An reyna natukdaw ha too han hadi, bulawan an bado.

1. Tampo han im’ korte han kababayen-an,

Didto’n mga anak hadton kahadian;

rayna ha im’ tuo rinayan-dayanan,

han gimamahali nga mga bulawan.

(b) An reyna natukdaw ha too han hadi, bulawan an bado.

2. Karaslon han hadi, ako pamatii,

katawhan, kauropdan mo hingalimti:

(b) An reyna natukdaw ha too han hadi, bulawan an bado.

3. Kahusay mo uungaraon han hadi,

Hiya’n agaron mo, hiya an yukboi.

(b) An reyna natukdaw ha too han hadi, bulawan an bado.

4. Upod adton rayhak ngan an kalipayan,

upod an kalipay ngan rayhak han tanan;

hira naabot ngatanan minandoan

palasyo han hadi ira sinusudlan.

(b) An reyna natukdaw ha too han hadi, bulawan an bado.

PAGBASA II

1 Cor 15:20-27

Pagbasa tikang han Syahan nga Surat ni San Pablo ngadto han mga taga Corinto.

Mga kabugtoan: Kundi ha kamatuoran ginbanhaw gud hi Cristo, ngan amo ini an pinasisikaran nga pagbabanhawon man an mga minatay. Kay sugad nga may-ada kamatayon pinaagi hin usa ka tawo, ha amo man nga paagi may-ada pagkabanhaw pinaagi hin usa ka tawo. Kay sugad nga nagkamatay an ngatanan tungod han ira paghiusa kan Adan, ha amo man nga paagi, pagbabanhawon an ngatanan tungod han ira paghiusa kan Cristo. Kundi an kada usa sugad han pagkasunodsunod ha iya igo nga panahon: hi Cristo anay an una han ngatanan; masunod an mga sakop ni Cristo kon bumalik hiya nganhi. Ngan maabot an kataposan ngan pagdadag-on ni Cristo an ngatanan nga espirituhanon nga ginhadian, pamunoan, ug kagamhanan, ngan itutubyan niya an Ginhadian ngadto han Dyos nga Amay. Kay kinahanglan maghadi hi Cristo tubtob nga dag-on han Dyos an ngatanan nga kaaway, ngan himoon hira nga taramakan han iya mga tiil. An kataposan nga kaaway nga pagdadag-on amo an kamatayon. Kay nasiring an Kasuratan, “Iginbutang han Dyos an ngatanan nga mga butang nga taramakan han iya mga tiil.” Klaro nga diri upod an Dyos dida hini nga mga pulong, “ngatanan nga mga butang,” kay hiya an nagbutang han ngatanan nga mga butang nga taramakan ni Cristo.

An Pulong han Ginoo.

EBANGHELYO

Lc 1:39-56  

Pagbasa tikang han santos nga ebanghelyo sumala kan Lucas.

Waray pag-iha, nag-andam hi Maria ngan nagdagmit hin pagkadto ha usa nga bungto ha sagkahon nga tuna han Judea. Kinadto hiya ha balay ni Zacarias ngan naghatag hin katalahoran kan Isabel. Han pakabati la ni Isabel han mga pulong ni Maria, nagkiwa an bata ha sulod han iya tiyan. Napuno hi Elisabet han Espiritu Santo, ngan nagyakan hin dako nga tingog, “Ikaw an labi kabaraan han ngatanan nga kababayen-an, ngan baraan an bata nga gindadara nimo ha imo tiyan! Kay ano nga itinugot man ini nga makanhi hin pagduaw ha akon an iroy han akon Ginoo? Kay han pakabati ko han imo nga pulong, linukso hin kalipay an bata ha akon tiyan. Hin kabaraan niya nga natoo nga matutuman an ginpamulong ha iya han Ginoo!”

Nagsiring hi Maria, “Nagdadayaw an akon kalag han Ginoo; naglilipay an akon kasingkasing dida han Dyos nga akon Manunubos, kay nahinumdoman ako niya, an iya ubos nga surugoon! Tikang yana tatawgon ako nga baraan han ngatanan nga katulinan, tungod han dagko nga mga butang nga ginbuhat para ha akon han Makagarahum nga Dyos. Baraan an iya ngaran; nagpapakita hiya hin kalooy hadton mga nahadlok ha iya, tikang ha usa ngadto han sunod nga katulinan. Ginpakita niya an kusog han iya butkon, ngan ginpasarang niya an mga mapahitas-on ha kasingkasing. Ginpukan niya in gamhanan nga mga hadi tikang han ira mga trono, ngan ginpahitaas niya an mga mapainubsanon. Ginbusog niya hin mag-upay nga mga butang an mga gutom, ngan ginpalakat niya an mga riko nga waray dara. Gintuman niya an iya iginsaad ha aton mga kaapoy-apoyan, ngan binuligan niya an Israel nga iya surugoon; nahinumdom hiya hin pagkalooy kan Abraham ngan ha ngatanan nga iya katulinan ha kadayonan!”

Linungon hi Maria kan Isabel sulod hin mga tulo ka bulan, ngan katapos, inoli hiya.

An Ebanghelyo han Ginoo.