PAGBASA I 

Huk 2:11-19

Pagbasa tikang han Basahan han Mga Maghurukom.

Niyan nakasala han Ginoo an mga tawo han Israel ngan nag-alagad na hira han mga Baal. Hinunong hira hin pagsingba han Ginoo nga Dyos han ira mga ginikanan, an Dyos nga nagkuha ha ira ha Ehipto, ngan nagsingba na hira hin iba nga kadiyosan han mga tawo nga naglibot ha ira. Ginyukboan nira ini nga kadiyosan; sanglit nasina ha ira an Ginoo. Hinunong hira hin pagsingba han Ginoo ngan gin-alagad nira an mga Baal ngan an mga Astarte.

Sanglit napungot han Israel an Ginoo ngan itinugot han Ginoo nga sulongon ngan panikasan hira; nga marikopo hira han ira mga kaaway, ngan an mga Israelita waray na gud makakapanalipod ha ira ngahaw. Ha kada pagkakadto nira ha pag-awayan, an Ginoo an nakikig-away ha ira sumala han iya iginsiring. Nag-antos hira hin dako nga kakurian. Niyan tinagan han Ginoo an mga Israelita hin mga maghurukom nga amo an magtatalwas ha ira tikang han mga parapanikas. Kundi waray la mamati an mga Israelita han ira mga maghurukom. Waray na an mga Israelita magmatinumanon han Ginoo ngan nagsingba hira hin iba nga kadiyosan. Nagsugot an ira mga ginikanan han mga sugo han Ginoo, kundi waray magsugot ini nga bag-o nga katulinan. Kada pagtatagi han Ginoo hin maghurukom an Israel, binubuligan hiya han Ginoo ngan gintatalwas an mga tawo tikang han ira mga kaaway samtang buhi pa ito nga maghurukom. Kinalolooyan hira han Ginoo kay naghaharoy man hira tungod han ira pag-antos ngan pagtalumpigos ha ira. Kundi kon patay na an maghurukom nabalik an mga tawo ngadto han kadaan nga labaw pa kamaraot an ira ginbubuhat kay han una nga katulinan. Nag-aalagad ngan nagsisingba hira hin iba nga kadiyosan, ngan tinutuyo gud nira hin pagpadayon han ira magraot nga mga binuhatan.

An Pulong han Ginoo.

SALMO RESPONSORIO

Sal 106:34-35, 36-37, 39-40, 43ab & 44

(b) Ayaw kami hingalimti, Ginoo, tungod han imo gugma han imo bungto.

1. Mga Hentil waray nira pamataya,

sugad han ginsugo han Ginoo ha ira.

Kundi lugod ha ira nakig-aragsawa,

ngan nagsubad han mga ginawian nira.

(b) Ayaw kami hingalimti, Ginoo, tungod han imo gugma han imo bungto.

2. Mga ladawan ginsingba han katawhan,

natinikangan ini han ira kabungkagan.

Ira iginhalad an ira kabataan,

ngadto han kadiyosan han Canaan.

(b) Ayaw kami hingalimti, Ginoo, tungod han imo gugma han imo bungto.

3. Nahugawan liwat an ira mga binuhatan,

han pagsirbe han Dyos waray hira makagtuman.

Sanglit an Ginoo duro hin kasina,

iya ginsalikway an katawhan niya.

(b) Ayaw kami hingalimti, Ginoo, tungod han imo gugma han imo bungto.

4. Nakadamo hira han ira Dyos pagtalwasa,

kundi an pag-ato asay an ginpili nira.

Kundi pinamatian han Ginoo pa,

an ira pagsangpit, ira pangaraba;

ngan ginpanimangno an kakurian nira.

(b) Ayaw kami hingalimti, Ginoo, tungod han imo gugma han imo bungto.

EBANGHELYO          

Mt 19:16-22

Pagbasa tikang han santos nga ebanghelyo sumala kan Mateo.

May hadto usa ka tawo nga dinaop kan Jesus. Nagpakiana hiya, “Magturutdo, ano an maupay nga butang nga kinahanglan ko buhaton basi maangkon ko an kinabuhi nga dayon?” Binaton hi Jesus, “Kay ano nga napakiana ka man ha akon kon ano in maupay? An Dyos la an maupay. Tumana an mga sugo kon buot ka makasulod ha kinabuhi.” “Ano nga mga sugo?” nagpakiana hiya. Nagbaton hi Jesus, “Diri ka magpatay; diri ka manlibog; diri ka mangawat; diri ka magbuwa; tahora an amay ug iroy nimo, ngan higugmaa an imo igkasi tawo sugad ha imo ngahaw.”

Binaton an batan-on, “Gintuman ko na ini ngatanan nga mga sugo, ano pa man an akon sadang buhaton?” Nagsiring ha iya hi Jesus, “Kon karuyag mo mahingpit, kadto na, ngan ipamaligya an ngatanan nga imo mga butang, ngan ihatag an kwarta ha mga kablas, ngan maaangkon mo in mga manggad ha langit; ngan kahuman, balik ngan sunod ha akon.” Han pakabati hini han batan-on, linakat hiya nga mabidoon, kay riko hiya.

An Ebanghelyo han Ginoo.