PAGBASA I 

Huk 6:11-24a

Pagbasa tikang han Basahan han Mga Maghurukom.

Niyan inabot an anghel han Ginoo ngadto han baryo han Ofra ngan liningkod hiya ha puno hin tuog nga kahoy nga gintag-iya ni Joas nga sakop han banay ni Abiezer. Naggigiok hin trigo hi Gideon nga iya anak, nga natago didto hin usa nga piriihan hin ubas basi diri hiya hikit-an han mga Madianitanhon. Pinakita ha iya didto an anghel han Ginoo ngan nagsiring, “Aada ha imo an Ginoo, ikaw nga maisog ngan kusgan nga tawo!” Nagsiring ha iya hi Gideon, “Kon lugaring makakapakiana ako ha imo, kay ano man nga nahinabo ha amon ini ngatanan kon aanhi ha amon an Ginoo? Ano an nahinabo han ngatanan nga urosahon nga mga butang nga iginsumat ha amon han amon mga ginikanan, nga ginbuhat han Ginoo—kon gin-unan-o niya hin pagpagawas ha ira tikang ha Ehipto? Ginbayaan na kami han Ginoo ngan igintubyan kami ngadto han gahom han mga Madianitanhon.” Niyan ginsugo hiya han Ginoo, “Lakat ngan gamita an bug-os mo nga kusog ngan talwasa an Israel ha mga Madianitanhon. Ako ngahaw an nagsusugo ha imo.” Binaton hi Gideon, “Kundi, Ginoo, uunanhon ko hin pakatalwas han Israel? An akon banay amo an giluluyahi dida han tribo ni Manases, ngan ako an giuubosi nga sakop han akon panimalay.” Nagbaton an Ginoo, “Makakahimo ka hini kay bubuligan ko ikaw. Dudugmokon mo an mga Madianitanhon sugad kamasayon hin pagdugmok mo hin usa la hira ka tawo.” Binaton hi Gideon, “Kon nalilipay ka ha akon, tagi ako hin tigaman nga ikaw amo an Ginoo. Ayaw gad anay paglakat ngada han pagduroti ko ha imo hin usa nga halad nga pagkaon.” Nagsiring hiya, “Mahulat ako ngada han imo pagbalik.”

Sanglit sinulod hi Gideon han iya balay, ngan nagluto hin nati nga kanding ngan ginamit niya in mga katloan (30) ka kilo nga harina hin paghimo hin tinapay nga waray patubo. Iginsulod niya an karne ha usa nga basket ngan an sabaw ha usa nga daba, gindara ini ngadto han anghel han Ginoo ha puno han tuog nga kahoy, ngan iginhatag ini ha iya. Ginsiring hiya han anghel, “Ibutang an karne ngan an tinapay ha bawbaw hini nga bato, ngan ipisa an sabaw ngada hini nga bato.” Gintuman ini ni Gideon. Niyan ikinuhit han anghel han Ginoo an kataposan han iya tungkod han karne ngan han tinapay.

Ginawas in kalayo tikang han bato ngan gintubod an karne ngan an tinapay. Katapos waray na hikit-i an anghel. Niyan nakasabot hi Gideon nga anghel han Ginoo adto nga iya hinkit-an, ngan nagsiring hiya ha dako nga kahadlok, “O Ginoo nga Dyos! Hinkit-an ko gud an imo anghel ngan nagkaatubang gud kami!” Kundi nagsiring ha iya an Ginoo, “An kamurayaw maada ha imo! Ayaw kahadlok. Diri ka mapatay.” Nagtindog didto hi Gideon hin usa nga altar para han Ginoo ngan ginngaranan ini nga “An Ginoo amo an Kalinaw.”

An Pulong han Ginoo.

SALMO RESPONSORIO

Sal 85:9, 11-12, 13-14

(b) An Ginoo nagpasamwak hin kalinaw ha iya bungto.

1. Namamati ako han kanan Dyos mga pulong,

nga nasaad hin kalinaw ug kadait ha aton;

kon kita diri han maraot nga paagi magpadayon.

(b) An Ginoo nagpasamwak hin kalinaw ha iya bungto.

2. Magtatapo an gugma ug an kamatinumanon,

maghahangkopay an kalinaw ug an kamatadong;

Tikang ha tuna an kamatinumanon,

tikang ha langit an pagpamatadong.

(b) An Ginoo nagpasamwak hin kalinaw ha iya bungto.

3. An Ginoo an magpapauswag ha aton,

ngan mahatag an tuna hin hura nga aranihon.

Mag-uuna han Ginoo an pagkamatadong,

ngan mag-aandam han dalan para ha aton.

(b) An Ginoo nagpasamwak hin kalinaw ha iya bungto.

EBANGHELYO    

Mt 19:23-30

Pagbasa tikang han santos nga ebanghelyo sumala kan Mateo.

Niyan nagsiring hi Jesus han iya mga tinun-an, “Nasiring ako ha iyo, magkukuri in riko hin pagsulod han Ginhadian han Langit. May-ada pa ako lain nga igsisiring ha iyo: mas makuri para hin riko hin pagsulod han Ginhadian han Dyos kay hin kamelyo hin pagsuhot ha taranogan hin dagom.” Han pakabati han iya mga tinun-an, nahipausa hira. Nagpakiana hira, “Hin-o man ngay-an in matatalwas?” Gintutokan hira ni Jesus ngan ginbaton, “Diri ini nahihimo hin mga tawo; kundi para han Dyos, nahihimo an ngatanan.” Niyan nagyakan hi Pedro, “Ginoo, kitaa, ginbayaan namon an ngatanan ngan sinunod kami ha imo. Ano man in amon maangkon?” Nagsiring ha ira hi Jesus, “Nasiring ako ha iyo hini: kon lumingkod na an Anak han Tawo didto han langitnon niya nga trono didto han Bag-o nga kalibutan, malingkod ha trono liwat kamo nga dose nga akon mga tinun-an hin paghukom han dose nga mga tribo han Israel. Ngan an ngatanan nga binaya hin mga balay, kabugtoan o mga kag-anak, o kabataan, o mga uma, tungod ha akon, makarawat hin labaw pa hin usa kagatos (100) ka pilo ngan tatagan pa han kinabuhi nga dayon. Kundi damo in mauorhe nga nag-uuna yana, ngan damo in mauuna nga nauorhe yana.

An Ebanghelyo han Ginoo.