PAGBASA I 

Huk 9:6-15

Pagbasa tikang han Basahan han Mga Maghurukom.

Niyan nagtitirok an ngatanan nga mga tawo ha Siquem ug Betmilo ngan kinadto hira han baraan nga kahoy nga tuog didto ha Siquem diin ginhimo nira nga hadi hi Abimelec.

Han pakabati ni Jotam hiunong hini, kinadto ngan tinindog hiya ha sampaw han Bukid Gerizim ngan ginggoliatan hira, “Pamatii ako niyo, mga tawo han Siquem, ngan pamatian unta kamo han Dyos! Usa hadto ka panahon nagkagawas an kakahoyan hin pagpili hin ira hadi. Ginsiring nira an kahoy nga olibo, ‘Paghadii kami.’ Binaton an kahoy nga olibo, ‘Basi ako makaghadi ha iyo, babayaan ko daw an paghimo han akon lana nga ginagamit hin pagpasidungog hin kadiyosan ngan mga tawo.’ Niyan ginsiring han kakahoyan an kahoy nga igos, ‘Kadi ngan paghadii kami.’ Kundi binaton an kahoy nga igos, ‘Basi ako makaghadi ha iyo, diri na daw ako makakahatag han akon magrasa ngan magtam-is nga mga bunga.’ Sanglit ginsiring han kakahoyan an ubas, ‘Kadi ngan paghadii kami.’ Kundi binaton an ubas, ‘Basi makaghadi ako ha iyo, uundangon ko daw an paghatag hin bino nga nakakalipay hin kadiyosan ngan mga tawo.’ Sanglit ginsiring han ngatanan nga kakahoyan an tunukon nga kahoy, ‘Kadi ngan paghadii kami.’ Binaton an tunukon nga kahoy, ‘Kon tinuod nga karuyag niyo nga himoon ako nga iyo hadi, kadi ngan sirong kamo ha akon lindong. Kon dumiri kamo, maglalarab in kalayo tikang han akon tunukon nga mga sanga ngan pag-uugtangon an mga sidro han Libano.’”

An Pulong han Ginoo.

SALMO RESPONSORIO

Sal 21:2-3, 4-5, 6-7

(b) Ginoo, an imo kusog nakakalipay han hadi.

1. An hadi tugob hin kalipay, Ginoo,

kay hin kusog hin pakadaog tinagan mo.

Iginhatag mo an iya karuyagon,

ngan an iya panuyo imo ginbaton.

(b) Ginoo, an imo kusog nakakalipay han hadi.

2. Nagdara ka hin damo nga kaupayan,

ginkoronahan mo hiya hin bulawan.

Hin kinabuhi imo hiya tinagan,

an kinabuhi nga waray katubtoban.

(b) Ginoo, an imo kusog nakakalipay han hadi.

3. Tungod han imo bulig, hiya ginhimaya,

dungog ngan bantog tinagan mo hiya.

Kaupayan nga dayon upod ha iya,

nakapuno hin kalipay kay tampo ka.

(b) Ginoo, an imo kusog nakakalipay han hadi.

EBANGHELYO    

Mt 20:1-16

Pagbasa tikang han santos nga ebanghelyo sumala kan Mateo.

Iginsiring ni Jesus ha iya mga tinun-an ini nga pananglitan, “An Ginhadian han langit sugad han tag-iya hin uma hin mga ubas nga timprano pa ha aga linakat pangita hin mga tawo nga iya susuholan hin pagtrabaho ha iya urubasan. Nakigsabot hiya pagbayad ha ira han nahiaaraan nga suhol nga usa ka salapi an usa ka adlaw, ngan ginsugo hira ngadto han iya urubasan. Ginawas liwat hiya ngadto ha merkado ha may alas nuybe han aga ngan nakakita hiya hin mga tawo nga nagkakatukdaw didto ngan waray mga trabaho. Sanglit ginsiring niya hira, ‘Pagtrabaho man kamo ha akon urubasan, ngan tatagan ko kamo hin angay nga suhol.’ Ngan kinadto hira. Niyan ha pagka-alas dose, ngan liwat ha alas tres, amo gihapon an ginbuhat niya. May mga alas singko na han kulop han pagkadto niya liwat ha merkado. Hinkit-an niya in iba pa nga mga tawo nga nagkakatukdaw la gihapon didto. ‘Kay ano nga kinakaragan niyo an bug-os nga adlaw dinhe nga waray ginbubuhat?’ nagpakiana hiya ha ira. Binaton hira, ‘Kay waray man nagpatrabaho ha amon.’ Ginsiring hira niya, ‘Kon amo ito, kadto liwat kamo pagtrabaho ha akon urubasan.’ “Han pagkakulop na, ginsiring han tag-iya an iya tinaporan, ‘Tawga an mga nagtrabaho ngan tagi hira han ira suhol. Unaha pagbayad adton mga urhe magtrabaho, ngan urhe adton mga una magtrabaho. Gintagan hin tag-usa ka salapi an mga tawo nga nagtrabaho ha alas singko na han kulop. Sanglit han pagdaop na hin pagkarawat han suhol an mga tawo nga una magtrabaho, naghunahuna hira nga darudako an ira kakarawaton, kundi tinagan liwat hira hin tag-usa ka salapi an kada usa. Ginkarawat nira an ira suhol, ngan nagtikang hira hin pagngurutob kontra han tag-iya han urubasan. Nagsiring hira, ‘Iini nga mga tawo nga orhe magtrabaho, nagtrabaho sulod hin usa ka oras la, samtang kami nagtrabaho ha bug-os nga adlaw, ngan nag-antos han kapaso han adlaw. Kay ano nga gintagan mo hira pareho han iginhatag mo ha amon?’ Ngan ginbaton han tag-iya an usa ha ira, ‘Sangkay, pamati daw! Waray ako maglimbong ha imo. Di’ ba inuyon ka hin usa ka salapi nga suhol hin usa ka adlaw nga pagtrabaho? Yana, karawta an imo suhol, ngan oli ha iyo. Karuyag ko tagan an orhe na magtrabaho hin pareho nga suhol han akon iginhatag ha imo. Waray ba ngay-an ako katungod paggamit han akon kwarta sugad han akon karuyag? O nauba ka ba tungod han akon kamahinatagon?’” Ngan gintapos ini ni Jesus hin pagsiring, “Sanglit, mahiuuna adton mga orhe, ngan mauorhe adton mga nahiuna.”

An Ebanghelyo han Ginoo.