PAGBASA I 

Rut 1:1, 3-6, 14b-16, 22

Pagbasa tikang han Basahan ni Ruth.

Hadto pa nga mga panahon nga an mga hukom amo pa an nagdumara han Israel, nagkaada gutom han tuna. Sanglit kinadto pag-ukoy la anay didto han nasod han Moab in usa ka tawo nga ginngaranan kan Elimelec nga sakop han banay ni Efrata, nga nag-uokoy didto ha Betlehem han Juda, upod hi Naomi nga iya asawa ngan hira Malon ug Quilion an duha nira nga mga anak nga kalalaken-an. Samtang nakadto hira ha Moab, namatay hi Elimelec ngan nag-usaan na la hi Naomi upod han iya duha nga mga anak nga kalalaken-an. Namatay liwat hira Malon ug Quilion, ngan nag-usaan na gud la hi Naomi nga waray na bana ngan mga anak nga kalalaken-an. Waray pag-iha hinbatian ni Naomi nga ginpakaupay na han Ginoo an iya mga tawo pinaagi hin paghatag ha ira hin mag-upay nga mga abot han uma; sanglit nag-andam hiya hin pagbaya han Moab kaupod niya an iya duha nga mga umagad nga kababayen-an.

Sanglit amo ini an paghibalik ni Naomi tikang ha Moab upod hi Ruth nga iya umagad nga babaye nga taga-Moab. Han pag-abot nira ha Betlehem nagtitikang pala han pag-ani han sebada.

An Pulong han Ginoo.

SALMO RESPONSORIO

Sal 146:5-6ab, 6c-7, 8-9a, 9bc-10

(b) Pagdayawa an Ginoo, kalag ko.

1. Hin pagkapalaran hadton tawo gudman,

ngan an Dyos ni Jacob an iya katabang.

Ngan kon adton iya gud sinasarigan,

amo an Ginoo nga Dyos nga gamhanan.

Amo hiya’n Magturuha han ngatanan,

han langit, han tuna, ngan han kadagatan,

ngan an tanan nga aada ha ira man.

(b) Pagdayawa an Ginoo, kalag ko.

2. Iya gintutuman mga ginsaaran.

Naghuhukom hiya ngan inuogopan,

adton ginsasakit ngan ginlulupigan.

Adton gutom hin pagkaon gintatagan,

mga priso iya gud ginbubuhian.

(b) Pagdayawa an Ginoo, kalag ko.

3. Iya ginpapakita an mga buta,

iya ginbabangon adton natutumba.

Magtadong katawhan iya hinigugma,

mga dumuruong ginmamangnoan n’ya.

(b) Pagdayawa an Ginoo, kalag ko.

4. An Ginoo naugop han mga balo ug mga ilo,

kundi ginpapara an dalan han maghuka.

Hadi gud hin kadayonan an Ginoo,

maghahadi gudman, O Sion, an Dyos mo.

Para han ngatanan nga panahon ito,

pagdayawon, pagdayawon an Ginoo!

(b) Pagdayawa an Ginoo, kalag ko.

EBANGHELYO    

Mt 22:34-40

Pagbasa tikang han santos nga ebanghelyo sumala kan Mateo.

Nagkausa nga hugpo an mga Parisiyo han pakabati nira nga ginpahilom ni Jesus an mga Sadusiyo. Ngan in usa ha ira nga magturutdo han Balaod karuyag magbitik kan Jesus pinaagi hin pakiana. Nagpakiana hiya, “Magturutdo, ano an gidadakoi nga sugo han Balaod?” Binaton hi Jesus, “‘Kinahanglan higugmaon mo an Ginoo nga imo Dyos ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.’ Amo ini an gidadakoi ngan labi ka importante nga sugo. Sugad hini an ikaduha hin ka importante nga sugo: ‘Kinahanglan higugmaon mo an igkasi tawo sugad han imo kalugaringon.’ Dida hini nga duha nga sugo nasandig an bug-os nga Balaod ni Moises ngan an mga pagturon-an han mga manaragna.”

An Ebanghelyo han Ginoo.