PAGBASA I 

Rut 2:1-3, 8-11; 4:13-17

Pagbasa tikang han Basahan ni Ruth.

May-ada hi Naomi uropod nga ginngaranan kan Boos, usa nga riko ngan hinangad nga tawo nga sakop han panimalay ni Elimelec nga iya bana. Usa ka adlaw nagsiring kan Naomi hi Ruth, “Tugoti ako hin pagkadto han kaumhan basi mag-ani ako han mga nalikatan han mga mag-arani. Waray ruhaduha may-ada tawo nga matugot ha akon hin pag-ani.” Binaton hi Naomi, “Kadto na, anak.” Sanglit kinadto hi Ruth han kaumhan, nagsunod han mga mag-arani, ngan nag-ani han ira mga nalikatan. Nahinabo nga nahingadto hiya hin uma nga gintatag-iya ni Boos.

Niyan nagsiring kan Ruth hi Boos, “May-ada ko ha imo igsasagdon. Ayaw na pagkadto hin iba nga uma hin pag-ani. Dinhe na la pag-ani upod han kababayen-an. Inawa hira kon diin hira pag-aani, ngan upod ha ira. Gintugon ko na an akon mga tawo nga diri ka paglabtan. Ngan kon uuhawon ka, pakadto ngan inom han tubig tikang han mga biso nga ira ginsudlan.” Hinapa hi Ruth ngan nagsiring kan Boos, “Kay ano nga nanginginano ka ha akon? Kay ano nga nalolooy ka man hin usa nga taga langyaw?” Binaton hi Boos, “Hinbatian ko an ngatanan nga imo ginbuhat para han imo ugangan nga babaye tikang mamatay an imo bana. Sayod ako han pagbaya nimo han imo iroy ug amay ngan han imo kalugaringon nga tuna, ngan han imo pagkanhi hin pag-ukoy tampo hin mga tawo nga hadto diri nimo kinikilala.

Gindara ha balay ni Boos hi Ruth nga iya asawa. Ginpakaupay hiya han Ginoo, ngan nagburod hiya ngan nag-anak hin lalake. Nagsiring kan Naomi an kababayen-an, “Dayawon an Ginoo! Yana nga adlaw gintagan ka niya hin apo nga maninimangno ha imo. Mabantogan unta ha Israel an bata! Nahigugma ha imo an imo umagad nga babaye, ngan ginbuhat niya para ha imo in labaw pa hin pito nga mga anak nga kalalaken-an. Ngan yana gintagan ka niya hin apo nga maghahatag ha imo hin bag-o nga kinabuhi ngan mahatag ha imo hin kahimyangan ha panahon han imo pagkalagas.” Ginkugos ni Naomi an bata, ginggakos niya, ngan ginmangnoan niya. Ginngaranan han mga amyaw nga kababayen-an hin Obed an bata. Ginsumatan nira an ngatanan, “Natawo kan Naomi in lalake nga bata!” Nahimo hi Obed nga amay ni Isai nga amay ni David.

An Pulong han Ginoo.

SALMO RESPONSORIO

Sal 128:1b-2, 3, 4, 5

(b) Kitaa an pagbendisyon han Ginoo

hadton nahadlok ha iya.

1. Palaran adton nahadlok han Ginoo,

an nagtutuman han iya mga sugo!

Maaangkon mo an ginkinahanglan mo,

may kalipay ngan kauswagan pa nimo.

(b) Kitaa an pagbendisyon han Ginoo

hadton nahadlok ha iya.

2. Magigin-pareho an imo asawa

hin ubas ha balay, damo gud an bunga.

Mga anak mo mapapareho hira,

hin olibo palibot han im' lamesa.

Sugad hini an kaupayan hin tawo,

kon nahahadlok gud hiya an Ginoo.

Paglilipayon gud hiya hin tutoo.

(b) Kitaa an pagbendisyon han Ginoo

hadton nahadlok ha iya.

3. Ha Sion an Dyos maglipay gud ha imo!

Kauswagan hadton Jerusalem unta

tanan nga adlaw mo imo makikita!

(b) Kitaa an pagbendisyon han Ginoo

hadton nahadlok ha iya.

EBANGHELYO    

Mt 23:1-12

Pagbasa tikang han santos nga ebanghelyo sumala kan Mateo.

Niyan nagsiring hi Jesus ha mga tawo ngan ha iya mga tinun-an, “An mga magturutdo han Balaod ngan an mga Parisiyo amo an tinagan hin gahom hin paghubad han balaod ni Moises. Sanglit, kinahanglan tumanon ngan sundon niyo an ngatanan nga iginpapabuhat nira ha iyo; kundi ayaw pagsubda an ira mga buhat, kay diri nira ginbubuhat an ira iginwawali. Nagbubutok hira hin magbug-at nga mga darad-on, ngan ira ini iginpapapas-an han mga tawo, kundi diri ngani nagamit bisan na man la usa han ira tudlo hin pagdara hito nga mga darad-on. Ginbubuhat nira an ngatanan basi la hikit-an hira han mga tawo. Kitaa hin kahalapad nga mga banda diin aada in mga sinurat nga bersikulo han kasuratan nga ibinutang ha ira mga agtang ngan mga butkon! Ngan kitaa hin kahiglaba han mga lagwas han ira mga panapton! Karuyag nira an gimauupayi nga mga lingkoran ha mga kombite ngan an linain nga mga lingkoran ha mga sinagoga; karuyag nira nga yumukbo ha ira an mga tawo didto ha mga taboan, ngan tawgon hira nga ‘Magturutdo.’ Diri kinahanglan tawgon kamo nga ‘Magturutdo,’ kay magburugto la kamo ngatanan, ngan uusa la an iyo Magturutdo. Ngan diri kinahanglan tawgon niyo nga ‘Amay’ an bisan hin-o dinhe ha tuna, kay uusa la an Amay niyo ha langit. Ayaw kamo pagpatawag nga ‘Pangulo,’ kay an Mesiyas la an iyo pangulo. Kinahanglan mahimo nga iyo surugoon an gilalabawi ha iyo. Adton magpahitaas han iya kalugaringon, pauubson; ngan adton magpapaubos, pagpapahitas-on.

An Ebanghelyo han Ginoo.