PAGBASA I

Is 66:18-21

Pagbasa tikang han Basahan ni Isaias nga manaragna.

Nagsairing an Ginoo: Maaram ako han ira mga hunahuna ngan han ira mga buhat. Makanhi ako hin pagtirok han mga tawo han ngatanan nga mga nasod. Kon magtitirok na hira, makita hira kon ano an nahihimo han akon gahom, ngan mahibabaroan nira nga ako amo an nagkakastigo ha ira. “Kundi tatalwason ko in kapid-an ha ira ngan susugoon ko hira ngadto han kanasoran ngan higrayo nga katunaan nga waray pa makabati han akon kabantogan o makakita han akon pagkadako ngan pagkagamhanan: ngadto ha Espania, Libya, ug Lidia, upod an batid nga mga parapana hini, ngan ngadto ha Tubal ug Grecia. Isasangyaw nira dida hini nga mga nasod an akon pagkagamhanan. Papaulion nira an ngatanan niyo nga igkasi mga nasodnon tikang han kanasoran sugad hin usa nga regalo ha akon. Ira pagdadad-on hira ngadto han akon baraan nga pungtod didto ha Jerusalem nga sakay hin mga kabayo, mga mula, ngan mga kamelyo, ngan hin mga karuwahe ngan mga karomata, sugad nga gindadara han mga Israelita ngadto han Templo in mga halad nga pagkaon dida hin mga surudlan nga maglinis sumala han seremonyas. Hihimoon ko in pipira ha ira nga mga padi ngan mga Levita.

An Pulong han Ginoo.

SALMO RESPONSORiO          

Sal 117:1, 2

(b) Kadto kamo ha bug-os nga kalibutan ngan igwali niyo an Maupay nga Sumat.

1. Dayawa’n Ginoo, tanan kanasoran!

Pagdayawa hiya, tanan nga katawhan!

(b) Kadto kamo ha bug-os nga kalibutan ngan igwali niyo an Maupay nga Sumat.

2. Iya gugma ha aton kadako gudman!

Pagkamatinumanon n'ya kadayonan!

(b) Kadto kamo ha bug-os nga kalibutan ngan igwali niyo an Maupay nga Sumat.

PAGBASA II

Heb 12:5-7, 11-13

Pagbasa tikang han Surat ngadto han mga Hebreo.

Mga kabugtoan: Hinngalimtan na ba niyo an mga pagdasig han Dyos ha iyo, kamo nga iya mga anak? “Anak ko, tigamni kon sawayon ka han Ginoo, ngan ayaw pagturaw kon busaan ka niya. Kay sinasaway han Ginoo an iya hinihigugma, ngan ginkakastigo niya an kinakarawat niya nga iya anak.” Antosa an pagkastigo ha iyo sugad nga tikang ini han iyo amay; kay nagpapakita ini nga gintatagad kamo han Dyos sugad hin iya mga anak. May-ada ba anak nga waray kastigoha han amay niya? Kon ginkakastigo kita usahay nakakapabido ini ha aton ngan diri nakakalipay. Kundi ha orhe nga mga adlaw, adton kinarawat hin sugad nga kastigo, nag-aani hin malinawon nga balos han kinabuhi nga matadong. Sanglit alsaha niyo an iyo kinakapoy nga mga kamot, ngan pakusga an iyo magluya nga mga tuhod! Sulsoga niyo an matadong nga mga dalan, basi may gamit an piay nga tiil ngan maupay dayon.

An Pulong han Ginoo.

EBANGHELYO

Lc 13:22-30

Pagbasa tikang han santos nga ebanghelyo sumala kan Lucas.

Naglatas hi Jesus ha mga bungto ngan mga baryo, ngan nagtutdo samtang tipakadto hiya ha Jerusalem. May nagpakiana ha iya, “Tinuod ba nga gutiay la an matatalwas?” Ginbaton hira ni Jesus, “Tilingohaa niyo hin pagsulod han haligot nga porta, kay susumatan ko kamo nga damo in karuyag sumulod, kundi diri makakahimo. Matukdaw an agaron han balay ngan sasadhan an porta. Ngan kon tumukdaw kamo ha gawas ngan magtikang hin pagtuktok ha porta nga masiring, ‘Abrehi kami!’ Mabaton hiya, ‘Diri ako maaram kon diin kamo tikang!’ Onina mabaton kamo, ‘Nagsasaro ngani kita, ngan nagtutdo ka ngani didto han amon bungto!’ Masiring liwat hiya, ‘Diri gud ako maaram kon diin kamo tikang. Iwas kamo ha akon, kamo ngatanan nga maghuka nga mga tawo!’ Mananangis ngan manliligot kamo han iyo mga ngipon, kon kumita na kamo didto han Ginhadian han Dyos kanda Abraham, Isaac, ug Jacob, ngan han ngatanan nga mga manaragna, samtang ilinabog kamo ha gawas! Maabot in mga tawo tikang ha sinirangan ug katundan, ha amihanan ug timogan, ngan matangka ha lamesa didto han Ginhadian han Dyos. Onina may mauuna nga nauorhe yana, ngan may mauorhe nga nauuna yana.”

An Ebanghelyo han Ginoo.