PAGBASA I 

1 Tes 1:1-5, 8b-10

Pagbasa tikang han Syahan nga Surat ni San Pablo ngadto han mga taga Tesalonica.

Tikang kan Pablo, Silas ug Timoteo—Ngadto han mga kaapi han singbahan ha Tesalonica, nga mga sakop han Dyos nga Amay ngan han Ginoo Jesu-Cristo: Maiyo unta an grasya ngan an kamurayaw.

Dayuday nagpapasalamat kami han Dyos tungod ha iyo ngatanan, ngan dayuday ilinalakip kamo namon dida ha amon mga pag-ampo. Kay gindudumdom namon ha atubangan han aton Dyos ngan Amay an ginpapakita han iyo mga mag-upay nga buhat tungod han iyo pagtoo, an kamaduruto niyo tungod han mapaso niyo nga gugma, ngan an karig-on han iyo paglaom dida han aton Ginoo Jesu-Cristo. Kabugtoan, maaram kami nga an Dyos nahigugma ha iyo ngan ginpili kamo nga magin iya kalugaringon. Kay gindara namon ha iyo an Maupay nga Sumat, diri pinaagi hin mga pulong la, kundi pinaagi liwat hin gahom ngan han Espiritu Santo, ngan upod an bug-os nga pagsarig han iya kamatuoran. Maaram kamo kon ginunan-o namon hin pag-ukoy han nakada pa kami ha iyo; para adto han iyo kaupayan. Nahibantog liwat ha ngatanan nga dapit an sumat mahitungod han iyo pagtoo han Dyos. Sanglit, diri na kinahanglan nga magyakan pa kami hini. Nagsusumat an mga tawo ngahaw kon ginunan-o niyo pagkarawat ha amon han pagduaw namon ha iyo, ngan pagbaya niyo tikang han mga diyosdiyos ngadto han Dyos, pag-alagad han matuod ngan buhi nga Dyos. Nagsusumat liwat hira nga naghuhulat kamo han iya Anak nga makanhi tikang ha langit—an iya Anak nga hi Jesus, nga ginbanhaw niya, ngan amo an naglulukat ha aton tikang han tiarabot nga kapungot han Dyos.

An Pulong han Ginoo.

SALMO RESPONSORIO

Sal 149:1b-2, 3-4, 5-6a & 9b

(b) Nalilipay an Ginoo han iya mga tawo.

1. Pagkantahi an Dyos hin bag-o nga kanta.

Didto an matinumanon katawhan n'ya,

ha ira katirok pagdayawa hiya!

O Israel, magmalipayon na kamo,

tungod hadton Dyos nga iyo Maghirimo.

Katawhan han Sion magrayhak na kamo,

nga tungod man liwat hadton hadi niyo.

(b) Nalilipay an Ginoo han iya mga tawo.

2. Adton iya ngaran iyo pagdayawon,

pinaagi man hin mga sarayawon.

Mga bumbo, mga arpa pagtokaron,

dida han pagdayaw ha iya gihapon.

An kanan Ginoo gud nalilipayan,

amo gud adton iya mga katawhan.

An mapaubsanon ginpapasidunggan,

hin paghatag ha ira hin pagdarag-an.

(b) Nalilipay an Ginoo han iya mga tawo.

3. Papagrayhaka ha ira kadaogan

adton kanan Dyos gud mga katawhan.

Ngan papagkantaha nga may kalipayan,

ha bug-os nga gab-i nga may kombite man.

Hin dagko nga tingog papaggogliata,

samtang ira gindadayaw an Dyos nira.

Pagdarag-an ini han iya katawhan.

(b) Nalilipay an Ginoo han iya mga tawo.

EBANGHELYO    

Mt 23:13-22

Pagbasa tikang han santos nga ebanghelyo sumala kan Mateo.

Nagsiring hi Jesus ha mga tawo ngan iya mga tinun-an, “Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Ginsasadhan niyo an porta ngadto han Ginhadian han langit ha atubangan han mga tawo, kundi diri kamo ngahaw nasulod, ngan gindidid-an pa niyo an mga tawo hin pagsulod!

“Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Nasingabot kamo han mga balo nga kababayen-an ngan nagtitikas kamo han ira mga puroy-anan, ngan katapos, napasangil kamo pamatbat hin higlaba nga mga pangadion. Tungod hini, makalilisang an ihahatag nga sirot ha iyo!”

“Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Ginsasakay niyo an kadagatan ngan ginlalatas an katunaan pagkabig hin usa la ka tawo. Ngan kon nakakabig na niyo, ginhihimo niyo nga labi hin ka takos han impyerno kay ha iyo ngahaw!

“Kamakaharadlok para ha iyo, mga buta nga magturugway! Igintututdo niyo, ‘Kon magsumpa in tawo pinaagi han Templo, diri hiya mapipirit hin pagtuman han iya saad; kundi kon magsumpa hiya pinaagi han bulawan nga aada han Templo, mapipirit hiya hin pagtuman.’ Mga buta ngan mga lurong! Hain labaw ka importante, an bulawan, o an Templo ba nga nagsasantos han bulawan? Igintututdo liwat niyo, ‘Kon magsumpa in tawo pinaagi han altar diri hiya mapipirit pagtuman han iya saad; kundi kon magsumpa hiya pinaagi han halad nga aada ha altar, kinahanglan magtuman hiya.’ Pagkabuta gud niyo! Hain in labaw ka importante, an halad, o an altar ba nga naguuray han halad? Sanglit kon nagsusumpa in tawo pinaagi han altar, nagsusumpa hiya pinaagi hini, ngan pinaagi han ngatanan nga halad nga aada hini nga altar; ngan kon nagsusumpa in tawo pinaagi han Templo, nagsusumpa hiya pinaagi hito ngan pinaagi han Dyos nga nag-uokoy dida han Templo; ngan kon nagsusumpa in tawo pinaagi han langit, nagsusumpa hiya pinaagi han trono han Dyos ngan pinaagi ha iya nga nalingkod dida hini nga trono.”

An Ebanghelyo han Ginoo.