PAGBASA I 

1 Tes 2:1-8

Pagbasa tikang han Syahan nga Surat ni San Pablo ngadto han mga taga Tesalonica.

Kabugtoan, maaram kamo ngahaw nga waray makawang an amon pagduaw ha iyo. Sayod kamo nga ginpakurian ngan ginpakaalohan na kami didto ha Filipos, san-o kami pumakadto ha iyo ha Tesalonica. Kundi gindasig kami han Dyos hin pagwali ha iyo han Maupay nga Sumat nga natikang ha iya, bisan kon damo gud an mga natipa. Diri sayop an amon pagwali ug diri maraot an amon hangyo ha iyo, ngan waray kami maglimbong bisan kan kanay. Lugod, dayuday nagyayakan kami sugad han kanan Dyos karuyag, tungod kay pagbuot man niya nga itapod niya ha amon an Maupay nga Sumat. Diri amon tuyo an paglipay hin mga tawo, kundi han Dyos nga sayod kon ano an panuyo han amon kasingkasing. Maaram na man kamo nga waray kami pakada hin pag-ulog-ulog ha iyo, ngan waray kami gamit hin mga pulong nga basi la katabonan an amon kahalot. An Dyos amo an amon saksi! Waray kami pagtinguha nga pagdayawon kami han mga tawo, ma tikang ha iyo o ma tikang han iba, bisan kon may katungod man ngani kami nga pagdayawon kami niyo kay mga apostoles man kami ni Cristo. Kundi han nakada pa kami ha iyo, mga buotan kami sugad hin iroy nga nagmamangno han iya mga anak. Tungod han gugma namon ha iyo, andam kami pagpaangbit ha iyo diri la han Maupay nga Sumat nga tikang ha Dyos, kundi bisan pa han amon kalugaringon nga mga kinabuhi, kay labis gud an amon pagmahal ha iyo.

An Pulong han Ginoo.

SALMO RESPONSORIO

Sal 139:1-3, 4-6

(b) Ginoo, nagbibiling ka ha akon

ug nakilala ka ha akon.

1. O Ginoo, gin-usisa mo ako,

ngan kinikilala mo ako.

Maaram ka han ngatanan nga akon binubuhat,

nasasabtan mo tikang hin hirayo

an ngatanan nga akon panhunahuna.

Kinikita mo ako, kon nagbubuhat

o kon napahuway ba ako;

maaram ka han ngatanan

nga akon mga ginawian.

(b) Ginoo, nagbibiling ka ha akon

ug nakilala ka ha akon.

2. Maaram ka na ngadaan

han akon igsisiring bisan diri pa ako nagyayakan.

Gin-aalirongan mo ako, ha kada ligid;

pinananalipdan mo ako han imo gahom.

Urosahon kaupay an imo pagkilala ha akon;

uraura ito hin kahilarom nga di' ko matugkad.

(b) Ginoo, nagbibiling ka ha akon

ug nakilala ka ha akon.

EBANGHELYO    

Mt 23:23-26

Pagbasa tikang han santos nga ebanghelyo sumala kan Mateo.

Nagsiring hi Jesus, “Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Ihinahatag niyo sa Dyos an ikanapulo nga bahin bisan han mga panakot, sugad han herbabuyna, han anis ngan han kanila, kundi ginpapabay-an niyo an labaw pa ka importante nga mga pagturon-an han Balaod, sugad han katadongan, pagkalooy ngan pagkatangkod. Angay niyo pagbuhata ini ngan diri pagpasibay-an an iba. Buta nga mga magturugway! Ginsasara niyo an langaw tikang han iyo irimnon kundi gintutulon niyo in kamelyo!

“Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Ginlilinisan niyo an gawas han iyo tasa ug plato, samtang mga puno ini han mga butang nga iyo naagaw pinaagi hin panlupig ngan kahalot. Mga buta nga Parisiyo! Linisi anay an sulod han tasa, ngan magmamalinis liwat an gawas!

An Ebanghelyo han Ginoo.