PAGBASA I 

1 Tes 2:9-13

Pagbasa tikang han Syahan nga Surat ni San Pablo ngadto han mga taga Tesalonica.

Kabugtoan, waray ruhaduha nga nahinunumdom pa kamo han amon mga pagkabudlay ngan pagginuol! Nagbudlay kami adlaw—gab-i, basi diri kami makasamok ha iyo samtang nagwawali kami ha iyo han Maupay nga Sumat nga tikang han Dyos. Kamo ug an Dyos amo an mga saksi, nga an amon panggawi ngada ha iyo nga mga magtinuohon putli, matadong, ngan waray sadang ikasuson. Sayod man kamo nga gintagad namon an tagsa ha iyo sugad gud han pagtagad hin usa nga amay han iya mga anak. Gindasig ngan ginliaw kamo namon, ngan ginsagdonan kamo namon pag-ukoy hin kinabuhi nga nakakalipay han Dyos nga amo an nagtatawag ha iyo basi kamo makaangbit han iya Ginhadian ngan himaya.

Ug amon liwat dayuday, ginpapasalamatan an Dyos. Kay an pagdad-i namon ha iyo han mensahe han Dyos, iyo ini pinamatian ngan kinarawat, diri nga mensahe hin tawo, kundi sugad nga mensahe gayod han Dyos. Kay nagbubuhat an Dyos dida ha iyo nga mga magtinuohon.

An Pulong han Ginoo.

SALMO RESPONSORIO

Sal 139:7-8, 9-10, 11-12ab

(b) Ginoo, nagbibiling ka ha akon ug nakilala ka ha akon.

1. Ngain man ako papalagiw t

ikang han imo espiritu?

Ngain man ako lilikaw han imo presensya?

Kon kumadto ako ha langit, aadto ka;

kon pumahuway ako ha lubnganan, aadto ka.

(b) Ginoo, nagbibiling ka ha akon ug nakilala ka ha akon.

2. Kon lumupad ako lahos pa han sinirangan,

o mag-ukoy ha gihaharayoi nga lugar

han katundan,

aadto ka didto pagmando ha akon,

aadto ka didto pagbulig ha akon.

(b) Ginoo, nagbibiling ka ha akon ug nakilala ka ha akon.

3. Makakahangyo ako han kasisidman

pagtago ha akon,

o han kapawa nga nagpapalibot ha akon

nga magin kagab-ihon.

Kundi diri masirom ha imo

bisan pa an kasisidman,

ngan sugad gudla han adlaw kalamrag an gab-i.

(b) Ginoo, nagbibiling ka ha akon ug nakilala ka ha akon.

EBANGHELYO    

Mt 23:27-32

Pagbasa tikang han santos nga ebanghelyo sumala kan Mateo.

Nagsiring hi Jesus, “Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Sugad kamo hin mga lubnganan nga pinintaran hin busag, nga maupay pagkit-on ha gawas, kundi puno hin tul-an hin mga patay ngan hin dunot nga mga lawas ha sulod. Ha amo man nga paagi, nakikita han ngatanan nga maupay kamo ha gawas, kundi puno kamo hin mga pagkamalabyaw ngan mga sala ha sakob.

“Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Naghihimo kamo hin makaruruyag nga mga lubnganan para han mga manaragna, ngan gin-aadornohan pa niyo an mga munomento hadton mga mag-upay an kinabuhi, ngan nasiring kamo, ‘Kon kami an nabuhi han panahon han amon mga kaapoy-apoyan, diri unta namon ginbubuhat an ginbuhat nira hin pagpatay han mga manaragna.’ Ha pagyakan niyo hini, inuuyonan niyo nga kamo mga tulin hadton nagpatay han mga manaragna. Sanglit padayona ngan taposa niyo an gintikangan han iyo mga kaapoy-apoyan!

An Ebanghelyo han Ginoo.