PAGBASA I 

1 Tes 3:7-13

Pagbasa tikang han Syahan nga Surat ni San Pablo ngadto han mga taga Tesalonica.

Kabugtoan, ha butnga han amon mga kakurian ngan pag-antos, nadasig kami tungod han iyo pagtoo, kay yana nakakaginhawa na kami hin maupay kay marig-on an iyo pagtindog dida ha pag-alagad han Ginoo. Yana makakagpasalamat na kami han Dyos tungod ha iyo. Nagpapasalamat kami tungod han amon kalipay ha atubangan han amon Dyos tungod ha iyo. Kinasingkasing an amon pangamuyo ha iya adlaw-gab-i, nga magkirigta kita ngan makahatag kami han ginkikinahanglan han iyo pagtoo. Ihatag unta ha amon han aton Dyos ngan Amay ngan han aton Ginoo nga Jesus an higayon hin pagduaw ha iyo! Patuboon unta han Ginoo an iyo paghigugmaay ha iyo ngahaw ngan ha ngatanan nga mga tawo, ngan masugad unta ito kadako han amon paghigugma ha iyo. Dida hini nga paagi, paririg-onon niya an iyo mga kasingkasing, ngan mahihingpit ngan mababaraan kamo ha atubangan han aton Dyos ngan Amay, kon umabot na an aton Ginoo nga Jesus upod an ngatanan nga mga sakop niya.

An Pulong han Ginoo.

SALMO RESPONSORIO

Sal 90:3-5a, 12-13, 14 and 17

(b) Pun-a kami han imo gugma Ginoo,

ngan mag-aawit kami hin kalipay.

1. Imo ginsugo pagpabalik an mga tawo,

ha daan niya nga kahimtang nga tapotapo.

Yukot nga mga tuig ha imo pagtan-aw,

sugad la hira hin usa ka adlaw.

Sugad hin kakulop nga linmabay na,

sugad hin takna ha gab-i nga pag-agma.

(b) Pun-a kami han imo gugma Ginoo,

ngan mag-aawit kami hin kalipay.

2. Itutdo nga lumalabay la an kinabuhi,

basi mamay-ada kinaadman kami.

Tubtob san-o an imo kasina ha amon, Ginoo,

kalooyi an mga surugoon nimo.

(b) Pun-a kami han imo gugma Ginoo,

ngan mag-aawit kami hin kalipay.

3. Kada aga pun-a kami han imo gugma,

basi kami ha imo dayuday magkanta.

Ginoo, amon Dyos, ibilin an imo bendisyon,

basi an amon mga buhat magmainuswagon.

(b) Pun-a kami han imo gugma Ginoo,

ngan mag-aawit kami hin kalipay.

EBANGHELYO    

Mt  24:42-51

Pagbasa tikang han santos nga ebanghelyo sumala kan Mateo.

Nagsiring hi Jesus ha iya mga tinun-an, “Sanglit, pagbantay, kay diri kamo maaram kon san-o nga adlaw an pagkanhi han iyo Ginoo. Hinumdomi ini niyo: kon maaram la an amay han panimalay han takna han pag-abot han kawatan, mag-aagma manta hiya ngan diri matugot nga makasulod han iya balay an kawatan. Sanglit, tungod hini, kinahanglan nga dayuday andam liwat kamo, kay maabot an Anak han Tawo ha takna nga diri niyo hiya pamumulaton.

“Sanglit, hin-o man an buotan ngan maaram nga surugoon? Amo hiya an gintaporan han iya agaron hin panimangno han iba nga mga surugoon, ngan paghatag ha ira pagkaon ha igo nga panahon. Pagkamalipayon hito nga surugoon, kon ha pag-oli han iya agaron, hiabotan hiya nga nagtutuman hini! Susumatan ta kamo hin tinuod, itatapod han agaron ngada hini nga surugoon an ngatanan niya nga katigayonan. Kundi kon maraot hiya nga surugoon, masiring hiya ha iya ngahaw, ‘Maiha pa umoli an akon agaron.’ Ngan magtikang hiya pagtubal han iya mga igkasi-surugoon, ngan magpapatakas hin pagkaon ngan pag-inom upod han mga parahubog. Niyan maoli an agaron hini nga surugoon ha adlaw nga waray niya pagpapaabota, ngan ha takna nga diri hiya maaram. Tatadtaron hiya han iya agaron, ngan paaagomon hiya han dadangatan han mga salingkapaw. Didto magtatangis hiya ngan manliligot hiya an iya mga ngipon.”

An Ebanghelyo han Ginoo.