PAGBASA I 

Jer 1:17-19

Pagbasa tikang han Basahan ni Jeremias nga manaragna.

Pag-andam, Jeremias; kadtoa ngan pagsumati hira han ngatanan nga ipinapagsumat ko ha imo. Ayaw kahadlok ha ira yana, kay kon diri, ikaw lugod an akon paghahadlokon kon kaupod ka na nira. Pamati, Jeremias! Makontra ha imo an ngatanan dinhe hini nga tuna—an kahadian han Juda, an mga opisyal, an kapadian, ngan an mga tawo. Kundi yana nga adlaw tatagan ko ikaw hin kusog hin pag-ato ha ira; masusugad ka hin usa nga pinarig-on nga syudad, hin usa nga puthaw nga harigi, ngan hin usa nga bronse nga pader. Diri hira makakapirde ha imo kay aada ako ha imo hin pagpanalipod ha imo. Ako nga Ginoo an nagyakan.”

An Pulong han Ginoo.

SALMO RESPONSORIO

Sal 71:1-2, 3-4a, 5-6ab, 15ab & 17

(b) Tikang pa ha tiyan han akon iroy, ikaw na an akon kusog.

1.  Ginoo, talwas ako dida ha imo;

ayaw gud ipapirde ako!

Buligi ngan bawia ako, kay matadong ka.

Pamatii ngan talwasa ako!

(b) Tikang pa ha tiyan han akon iroy, ikaw na an akon kusog.

2. Magin marig-on ka nga akon salipdanan,

ngan marig-on nga kuta

nga arayopan pagsalipod ha akon;

ikaw an akon arayopan ngan panalipod.

Bawia ako, O Dyos ko,

tikang han magraot nga mga tawo,

tikang han gahom han magbangis

ngan yawan-on nga mga tawo.

(b) Tikang pa ha tiyan han akon iroy, ikaw na an akon kusog.

3. Nalaom ako ha imo gudla, O Ginoo nga Dyos;

sinmarig ako ha imo tikang han bata pa ako.

Tinapod ako ha imo ha bug-os ko nga kinabuhi;

pinanalipdan mo ako tikang pa han akon katawo.

(b) Tikang pa ha tiyan han akon iroy, ikaw na an akon kusog.

4. Igsusumat ko an imo pagkamatadong;

maghihimangraw ako ha bug-os nga adlaw

han imo katalwasan,

bisan kon labaw ito han akon masasabtan.

Gintutdoan mo ako tikang pa

han akon kabatan-on,

ngan iginsusumat ko pa gihapon

an imo urosahon nga mga buhat.

(b) Tikang pa ha tiyan han akon iroy, ikaw na an akon kusog.

EBANGHELYO    

Mc 6:17-29

Pagbasa tikang han santos nga ebanghelyo sumala kan Marcos.

Hi Herodes ngahaw an nagpadakop kan Juan; iya iginpagapos ngan iginsulod ha bilanggoan. Ginbuhat ini ni Herodes tungod kan Herodias nga iya gin-asawa. Hi Herodias asawa ni Felipe nga bugto ngahaw ni Herodes. Waray hunong hin pagsinaway ni Juan kan Herodes, “Diri matadong nga buhat an pag-asawa mo han asawa han imo bugto!” Sanglit nagdumot hi Herodias kan Juan ngan karuyag niya patayon, kundi waray hiya makahimo tungod kan Herodes. Nahadlok hi Herodes kan Juan kay maaram hiya nga maupay ngan baraan nga tawo hi Juan, sanglit ginpabantayan hiya niya. Karuyag niya mamati kan Juan, bisan kon nagugupong hiya ha kada pakakabati niya kan Juan. Ha kataposan nakahigayon hi Herodias hin pagpatay kan Juan. Naghatag hi Herodes hin dako nga kombite dida han iya kaadlawan, han mga punoan han kasondalohan, ngan han mga dagko nga pagkatawo ha Galilea. Sinakob ngan sinayaw an anak nga babaye ni Herodias Nakalipay hiya kan Herodes ngan han mga dinapit ngada han kombite. Nagpakiana han daragita an hadi, “Ano an imo karuyag aroon? Ihahatag ko ha imo in bisan ano nga imo karuyag.” Pinaagi hin damo nga panumpa, nagsiring ha iya na hadi, “Nagsasaad ako nga tatagan ta ikaw han imo karuyag aroon, bisan pa an katunga han akon ginhadian.” Ginawas an daragita ngan pinmakiana han iroy niya kon ano an iya aaroon. Binaton an iroy niya, “An ulo ni Juan nga Parabunyag.” Kinadto dayon han hadi an daragita ngan nangaro, “Karuyag ko nga ihatag mo ha akon an ulo ni Juan nga Parabunyag nga sinangga hin plato!” Nabido kaupay an hadi; kundi waray hiya makabaribad, kay nagsaad hiya ha atubangan han iya nga dinapit. Sanglit ginsugo niya in gwardya han bilanggoan nga dad-on an ulo ni Juan. Linakat an gwardya, kinadto ha bilanggoan, ngan ginpugotan hi Juan. Gindara niya an ulo nga sinangga hin plato, ngan iginhatag niya han daragita, ngan ihinatag han daragita ngadto han iroy niya. Pakabati hini han mga tinun-an ni Juan, kinadto hira pagkuha han iya lawas ngan iginlubong nira.

An Ebanghelyo han Ginoo.