PAGBASA I

Sir 3:17-18, 20, 28-29

Pagbasa tikang han Basahan han Sirac.

Anak, pagpaubos ha ngatanan nga imo ginbubuhat, ngan maruruyag an mga tawo hini nga imo buhat labaw hin mga regalo. Kon ikaw magtikadako ha imo pagkatawo, labi na nga magpaubos ka; ngan malilipay ha imo an Ginoo. Gamhanan an Ginoo ngan ginpapasidunggan hiya hadton mga mapainubsanon. Waray tambal han mga kakurian nga aada han mga mapahitas-on, ginmamot na gud hin maupay dida ha ira an pagkamaraot. Mahibabaro an mag-aram nga mga tawo tikang han mga darahonon ngan mga pananglitan. Namamati hira hin maupay kay karuyag nira hin pag-aram. An paglimos makakagbayad hin mga sala sugad nga an tubig nakakaparong hin naglalarab nga kalayo.

An Pulong han Ginoo.

SALMO RESPONSORiO          

Sal 68:4-5, 6-7, 10-11

(b) Tungod han imo kalooy, Ginoo, nag-andam ka hin pahuwayan hadton mga kablas.

1. Kundi magmamalipayon an magtadong,

ha prisensya han Dyos hira malipayon.

An ira kalipay nga pagbabation,

rayhak nga matuod, waray na matupong.

Pagkanta ha Dyos dayawa'n iya ngaran,

an nasakay ha dampog angay kantahan;

An Ginoo amo adton iya ngaran,

pagmalipayon ha iya atubangan!

(b) Tungod han imo kalooy, Ginoo, nag-andam ka hin pahuwayan hadton mga kablas.

2. Ikaw an Dyos nga amo an nagpupuyo,

adton hadton imo baraan nga templo,

amay nga napaid hadton mga ilo,

ngan nananalipod hadton mga balo.

An minimingaw tinatagan puroy-an,

ngan an mga priso ira katalwasan.

Kundi adton mga masupilon gudman,

adto pagpupuyo dit’ ha kamingawan.

(b) Tungod han imo kalooy, Ginoo, nag-andam ka hin pahuwayan hadton mga kablas.

3. Imo ginpabunok in banos nga uran,

ngan ginpatambok mo uga nga kaumhan.

Didto na pagpuyo an imo katawhan,

ha kamaupay mo kablas nabuligan.

(b) Tungod han imo kalooy, Ginoo, nag-andam ka hin pahuwayan hadton mga kablas.

PAGBASA II

Heb 12:18-19, 22-24a

Pagbasa tikang han Surat ngadto han mga Hebreo.

Mga kabugtoan: Waray kamo makahirani sugad han mga tawo han Israel ngadto hin usa nga butang nga aaboton niyo ngadto han iya nagdidilaab nga kalayo didto ha Bukid Sinai, han kasisidman ngan han kadulman, han bagyo, han tunog hin trompeta, ngan han usa nga tingog sugad han ginbuhat han mga tawo han Israel. Han pakabati han mga tawo han tingog, nakimalooy hira nga diri na pabation hira hin lain pa nga pulong. Lugod, hinmarani kamo han Bukid Sion ngan han syudad han buhi nga Dyos, an langitnon nga Jerusalem, upod han iya yinukot nga mga anghel. Hinmarani kami han malipayon nga katirok han mga suhag nga mga anak nga kalalaken-an han Dyos, kanay mga ngaran nahisurat na ha langit. Hinmarani kamo han Dyos nga amo an maghurukom han ngatanan nga mga tawo, ngan hinmarani kamo han mga espiritu han mga tawo nga magtadong nga nahingpit na. Hinmarani kamo kan Jesus nga amo an naghikay han bag-o nga ginsaaran, ngan han iginsablig nga dugo nga nagsasaad hin labaw pa kamaupay nga mga butang kay han dugo ni Abel.

An Pulong han Ginoo.

EBANGHELYO

Lc 14:1, 7-14

Pagbasa tikang han santos nga ebanghelyo sumala kan Lucas.

Usa ka Adlaw nga Iparahuway, kinadto hi Jesus hin pagkaon ha balay hin usa nga tinahod nga Parisiyo, ngan gin-ininaw hiya han mga tawo.

Hinkit-an ni Jesus nga an mga dinapit nagpipili han gimaupayi nga mga lingkoran, sanglit iginsumat niya ini nga pananglitan ha ira ngatanan: “Kon dapiton kamo ngadto hin kombite hin pagkasal, ayaw paglingkod didto han syahan ug gimamaupayi nga lingkoran. Bangin may gindapit nga mas dungganan pa kay ha imo, ngan masiring ha imo an nagdapit ha iyo nga duha, ‘Asay hiya palingkora hini nga lingkoran.’ Niyan maawod ka ngan malingkod ka didto han giuubosi nga lingkoran. Lugod, kon dapiton ka, kadto ngan lingkod ha giuubosi nga lingkoran, basi kon dumaop an nagdapit ha imo ngan sidngon ka, ‘Sangkay, balhin ngadto han syahan ug gimamaupayi nga lingkoran.’ Mapapasidunggan ka hini ha atubangan han ngatanan nga mga dinapit. Kay adton nagpapadako han iya kalugaringon pauubson; ngan adton magpaubos han iya kalugaringon padadakoon.” Ngan ginsiring ni Jesus an tagbalay, “Kon mananagtawo ka, ayaw asay pagdapita an imo kasangkayan, o imo kabugtoan, o imo kauropdan, o imo riko nga mga kahigrani, kay bubulson ka nira hin pagdapita, ngan dida hini, mababaydan ka han imo ginbuhat. Kundi, kon mananagtawo ka asay lugod dapita an mga kablas, an mga lulid, an mga piay, ngan an mga buta. Ngan magmamalipayon ka, kay diri man hira makakabalos ha imo. Babaloson ka han Dyos kon mabanhaw na an mag-upay nga mga tawo.”

An Ebanghelyo han Ginoo.