PAGBASA I 

1 Tes 5:1-6, 9-11

Pagbasa tikang han Syahan nga Surat ni San Pablo ngadto han mga taga Tesalonica.

Kabugtoan, waray na kinahanglan nga magsurat pa ako ha iyo mahitungod han mga takna ngan mga panahon, kon san-o mahinanabo ini nga mga butang. Kay maaram gud kamo ngahaw nga maabot an Adlaw han Ginoo sugad hin pag-abot hin kawatan ha kagab-ihon. Samtang nasiring an mga tawo, “Malinaw na an ngatanan ngan waray na kataragman,” tigda la nga maabot ha ira an pagkapukan! Diri hira makakalikay; kay sugad ini han kamasakit nga naabot hin babaye nga tipag-aranak.

Kundi, kabugtoan, diri na kamo aada ha kasisidman, sanglit diri na kamo hikakalitan hito nga Adlaw nga maabot sugad hin kawatan. Kamo ngatanan nga mga tawo nga sakop han kapawa, ngan sakop han adlaw; diri kita sakop han kagab-ihon o han kasisidman. Sanglit kinahanglan diri kita mangaturog sugad han iba; kundi kinahanglan mag-agma kita ngan magmalinaw an panhunahuna. Waray kita pilia han Dyos basi mag-antos han iya kapungot, kundi basi angkonon naton an katalwasan pinaagi han aton Ginoo Jesu-Cristo, nga nagpakamatay para ha aton, basi mag-ukoy kita upod ha iya, buhi o patay kita ha pagbalik niya. Tungod hini nga hinungdan, pagdinasigay ngan pagbinuligay kamo sugad gud han iyo binubuhat yana.

An Pulong han Ginoo.

SALMO RESPONSORIO

Sal 27:1, 4, 13-14

(b) Natoo ako nga makita ako han pagkamaupay han Ginoo ha tuna han mga buhi.

1. An Dyos akon kapawa ug katalwasan,

sanglit waray sadang ko nga kahadlokan.

Sinasalipdan ako ha kataragman,

hin kakulba diri ako hisasakban.

(b) Natoo ako nga makita ako han pagkamaupay han Ginoo ha tuna han mga buhi.

2. Usa nga butang an akon pinangangaro,

usa gud la an akon hinahangyo;

nga mag-ukoy ako ha balay han Ginoo,

ngatanan nga adlaw samtang buhi pa ako;

basi mamalandong ako han iya kaupayan,

ngan mangaro han iya kasalagdonan.

(b) Natoo ako nga makita ako han pagkamaupay han Ginoo ha tuna han mga buhi.

3. Maaram ako nga hikikit-an ko pa,

an pagkamaupay han Ginoo yana;

Pagtapod ug paglaom han Ginoo,

ayaw pagturaw, lugod, ha iya tuo.

(b) Natoo ako nga makita ako han pagkamaupay han Ginoo ha tuna han mga buhi.

EBANGHELYO    

Lc 4:31-37

Pagbasa tikang han santos nga ebanghelyo sumala kan Lucas.

Niyan kinadto hi Jesus ha Capernaum, usa nga bungto ha Galilea, diin nagtutdo hiya han mga tawo ha Adlaw nga Iparahuway. Nahipausa hira ngatanan han paagi han iya pagtutdo, kay may gahom an iya mga pulong. May-ada tawo ha sinagoga nga may espiritu hin mahugaw nga yawa, ngan naggoliat hin dako nga tingog: “Jesus nga taga-Nazaret, ano an imo karuyag ha amon? Kinanhi ka ba hin pagpatay ha amon? Maaram ako kon hin-o ka: amo ka an baraan nga surugoon han Dyos!” Ginsugo ni Jesus an espiritu, “Hilom ngan gawas dida ha iya.” Ibinuntad han yawa an tawo ha ira atubangan; ginawas an yawa dida han tawo ngan waray maano an tawo. Nanhipausa hira ngatanan ngan may hinsiring, “Ano ba ini nga mga pulong? Ini nga tawo may gahom ug kusog hin pagsugo han mga magraot nga espiritu hin paggawas, ngan nagawas hira!” Ngan nahibantog an sumat mahitungod kan Jesus ha ngatanan nga dapit didto hito nga tuna.

An Ebanghelyo han Ginoo.