PAGBASA I 

Col 1:21-23

Pagbasa tikang han Surat ni San Pablo ngadto han mga taga Colosas.

Mga kabugtoan: Hadto anay hirayo kamo han Dyos, ngan mga kaaway kamo niya, tungod han magraot nga mga butang nga iyo ginbuhat ngan ginhunahuna. Kundi yana, tungod han kamatayon ha kros han iya Anak, ginsangkay kamo han Dyos, basi dad-on kamo nga santos, putli, ngan waray dum-it ngadto ha iya atubangan. Matuod, kinahanglan magpadayon kamo nga matinumanon dida hin marig-on ngan waray pagkawaring nga patukoranan, ngan diri kamo tumugot nga magruhaduha kamo ha iyo paglaom nga nakarawat niyo han pakabati niyo han Maupay nga Sumat. Tungod hini nga Maupay nga Sumat nahimo ako, hi Pablo, nga usa nga surugoon hini nga Maupay nga Sumat nga iginwali ha ngatanan dinhe ha kalibutan.

An Pulong han Ginoo.

SALMO RESPONSORIO

Sal 54:3-4, 6 & 8

(b) An Dyos an akon parabulig.

1. O Dyos, talwasa ako pinaagi han imo gahom;

talwasa ako pinaagi han imo kusog!

Pamatii an akon pag-ampo, O Dyos;

pamatii an akon mga pulong!

(b) An Dyos an akon parabulig.

2. Maaram ako nga an Dyos an akon parabulig,

nga an Ginoo an akon paragpanalipod!

Ginoo, malipayon ako

nga maghahalad ha imo hin halad-sinunog;

magpapasalamat ako ha imo, kay maupay ka.

(b) An Dyos an akon parabulig.

EBANGHELYO

Lc 6:1-5

Pagbasa tikang han santos nga ebanghelyo sumala kan Lucas.

Usa ka Adlaw nga Iparahuway, naglatas hi Jesus ha kaumhan hin trigo. Nagtikang an iya mga tinun-an pangutos hin mga uhay han trigo, ginkurukuso ha ira mga kamot, ngan nangaon han trigo. Nagsiring in pira nga mga Parisiyo, “Kay ano nga ginbubuhat niyo an igindidiri han aton Balaod hin pagbuhat ha Adlaw nga Iparahuway?” Ginbaton hira ni Jesus, “Waray ba niyo mabasa an ginbuhat ni David han paggutoma ha iya ngan an iya mga kaupod? Sinulod hiya ha balay han Dyos, kinuha hiya han tinapay nga iginhalad sa Dyos, kinaon hiya, ngan iginpakaon liwat ini han iya mga tawo. Kundi igindidiri han aton Balaod an pagkaon han tinapay nga ginhalad ngadto sa Dyos, labot han kapadian.” Ngan gintapos ni Jesus hin pagsiring, “An Anak han Tawo amo an Ginoo han Adlaw nga Iparahuway.”

An Ebanghelyo han Ginoo.