PAGBASA I 

Kin 9:13-18b

Pagbasa tikang han Basahan han Kinaadman.

“Hin-o gud an mahibabaro han kaburot-on han Dyos? Diri igo para han buruhaton an tinawo nga pangatadongan, ngan ginlilipat la kami han amon mga pilosopiya, kay binubug-atan an amon mga kalag han amon mga lawas nga may-ada kamatayon. Lumalabay la an tunan-on nga lawas, usa nga pinas-an han maabtik nga hunahuna. An aton la nahihimo amo an pagbanabana hiunong han mga butang ha tuna; kinahanglan manlibasog kita hin pag-aram hiunong han mga butang nga suok ha aton. Sanglit hin-o ngani an makakalaom hin pagsabot han langitnon nga mga butang? Waray pa gud may nahibaro han imo kaburot-on, labot kon tagan mo hiya hin kinaadman nga ipadara mo ngadto ha iya an imo baraan nga espiritu. Dida hini nga paagi nahitultol han matadong nga dalan an mga tawo ha tuna, nahibaro han imo nalilipayan, ngan himyang an kamutangan pinaagi han kinaadman.”

An Pulong han Ginoo.

SALMO RESPONSORIO

Sal 90:3-4, 5-6, 12-13, 14 & 17

(b) Ha ngatanan nga panahon ikaw an amon daranpang, Ginoo.

1. Imo ginsugo pagpabalik an mga tawo,

ha daan niya nga kahimtang nga tapotapo.

Yukot nga mga tuig ha imo pagtan-aw,

sugad la hira hin usa ka adlaw.

Sugad hin kakulop nga linmabay na,

sugad hin takna ha gab-i nga pag-agma.

(b) Ha ngatanan nga panahon ikaw an amon daranpang, Ginoo.

2. Imo mga tawo dinhe kinukuha,

gin-aanod kami sugad la hin baha;

kinabuhi namon diri nag-iiha,

sugad la hin inop kon naaga na.

Sugad la kami hadton mga banwa,

nga natumos dida hiton aga.

Natubo, nabuswak, ngan nabukad hira,

ha pagkagab-i narapdag, nalalaya.

(b) Ha ngatanan nga panahon ikaw an amon daranpang, Ginoo.

3. Itutdo nga lumalabay la an kinabuhi,

basi mamay-ada kinaadman kami.

Tubtob san-o an imo kasina ha amon, Ginoo,

kalooyi an mga surugoon nimo.

(b) Ha ngatanan nga panahon ikaw an amon daranpang, Ginoo.

4. Kada aga pun-a kami han imo gugma,

basi kami ha imo dayuday magkanta.

Ginoo, amon Dyos, ibilin an imo bendisyon,

basi an amon mga buhat magmainuswagon.

(b) Ha ngatanan nga panahon ikaw an amon daranpang, Ginoo.

PAGBASA II          

Flm 9-10, 12-17

Pagbasa tikang han Surat ni San Pablo ngadto kan Filemon.

Kundi an gugma an nagpupugos ha akon hin paghangyo ha imo. Ginbubuhat ko ini bisan kon usa nga sinugo ni Cristo Jesus ako, hi Pablo, nga ito yana binilanggo liwat tungod ha iya. Sanglit nahangyo ako ha imo para kan Onesimo nga akon kalugaringon nga anak dida ha pag-alagad kan Cristo; kay nahimo ako nga iya espirituhanon nga amay samtang priso ako. Ginpapabalik ko hiya yana ngada ha imo, ngan upod ha iya an akon kasingkasing. Karuyag ko unta nga hawiran ko hiya upod ha akon didi, samtang aadi ako ha bilanggoan tungod han Maupay nga Sumat, basi makabulig hiya ha akon liwan ha imo. Kundi, diri ko karuyag nga lugoson ko ikaw hin pagbulig ha akon; kundi karuyag ko nga pagbuhaton mo ini ha imo kalugaringon nga kaburot-on. Sanglit diri ko karuyag pagbuhaton gawas han imo pagtugot. Bangin nahimulag ha imo hi Onesimo hin halipot nga panahon, basi mahibalik hiya ha imo para na ha kadayonan. Ngan yana diri na hiya usa nga oripon, kundi labaw pa gud hin oripon: mahal gud hiya nga bugto dida kan Cristo. Minahal ko gud hiya! Ngan labaw pa nga pagmamahalon mo hiya sugad nga imo oripon ngan bugto na dida ha Ginoo! Sanglit, kon gin-iisip mo pa ako nga imo kausa, karawata hiya sugad hin imo pagkarawat ha akon.

An Pulong han Ginoo.

EBANGHELYO    

Lc 14:25-33

Pagbasa tikang han santos nga ebanghelyo sumala kan Lucas.

Binunyog kan Jesus in damo gud nga mga tawo. Inatubang hira ni Jesus ngan sidngon, “Diri mahihimo nga akon tinun-an bisan hin-o nga mapakadi ha akon, labot kon an iya paghigugma ha akon labaw pa han iya paghigugma han iya mga kag-anak, iya asawa, iya mga anak, iya kabugtoan, ngan han iya kalugaringon man. Diri mahihimo nga akon tinun-an an bisan hin-o nga diri magpas-an han iya kalugaringon nga kros ngan sumunod ha akon. Kon may-ada ha iyo nakahunahuna hin pagtindog hin lantawan, nalingkod hiya anay, paiinoinohon niya kon pira an magagasto, basi makita niya kon may igo ba niya nga kwarta nga ighuhuman han lantawan. Kay kon diri sugaron hini, diri niya mahuhuman an lantawan, katapos niya igpahimutang an patukoran, ngan pagtitinawaan hiya han ngatanan nga makita hini nga kasugaran. Masiring hira, ‘Maupay la ini nga tawo hin pagtikang, diri ngay-an maaram hin paghuman!’ Kon nagawas hin pakig-away in usa nga hadi nga may napulo ka yukot nga mga sondalo, kontra hin iba nga hadi nga may baynte ka yukot nga mga sondalo, malingkod hiya anay, ngan titirutimbangon niya kon may-ada na hiya kapas hin pakig-away hadto nga hadi. Kay kon waray, kinahanglan magpadara hiya hin mga tinaporan hin pakigkita han pangontra nga hadi, basi samtang hirayo pa hiya magsarabot na la hin paagi nga mahusay ug malinawon. Ha amo nga paagi,” gintapos ni Jesus, “waray ha iyo mahihimo nga akon tinun-an, gawas kon isalikway niya an ngatanan nga iya mga butang.

An Ebanghelyo han Ginoo.