PAGBASA I 

Col 2:6-15

Pagbasa tikang han Surat ni San Pablo ngadto han mga taga Colosas.

Mga kabugtoan: Tungod kay ginkarawat man niyo nga Ginoo hi Cristo Jesus, pakig-usa kamo ha iya. Ayaw gud kamo pagbulag ha iya, tindoga an iyo mga kinabuhi dida ha iya, ngan parig-ona gud an iyo pagtoo sugad han igintutdo ha iyo. Ngan ayaw kamo hingalimot hin pagpasalamat. Sanglit pagbantay gud kamo nga waray mag-oripon ha iyo pinaagi hin waray hinungdan nga limbong hin kinaadman hin tawo, nga natikang han mga pagtutdo han mga tawo ngan han mga espiritu nga naghahadi han kalibutan, ngan diri natikang kan Cristo.

Kay aada kan Cristo, ha iya pagkatawo, an hingpit han dyosnon nga kinaiya, ngan iginhatag ha iyo an tim-os nga kinabuhi dida han pakig-usa niyo ha iya. Hiya an gilalabawi han ngatanan nga espirituhanon nga punoan ngan pagburut-an. Natori kamo dida han iyo pakig-usa kan Cristo, diri han pagtori nga ginbuhat hin tawo, kundi an pagtori nga ginbuhat ni Cristo, nga amo an pagkatalwas tikang han gahom hini nga makasasala nga lawas. Kay han pagbunyagi ha iyo, nahilubong kamo upod kan Cristo, ngan dida ha pagbunyag, ginbanhaw man liwat kamo upod kan Cristo, pinaagi han iyo pagtoo han gahom han Dyos, nga nagbanhaw ha iya tikang ha kamatayon. Hadto anay, mga patay kamo ha espiritu tungod han iyo mga sala, ngan tungod kay mga Hentil kamo nga diri sakop han Balaod. Kundi yana, ginbuhi na kamo han Dyos upod kan Cristo. Ginpasaylo kita han Dyos han ngatanan naton nga mga sala. Ginpara niya an ngatanan naton nga mga utang, upod an naggagapos hini nga mga turumanon, ngan ginkuha gud niya ini ngatanan pinaagi hin pagraysangan hini dida ha kros. Ngan dida hito nga kros, ginhukasan ni Cristo hin gahom an espirituhanon nga mga punoan ngan mga pagburot-an. Ginhimo niya hira nga usa nga kiritaon han kadam-an nga mga tawo pinaagi hin pagtugwayi ha ira nga sugad hin mga bihag dida han parada han iya pagdarag-an.

An Pulong han Ginoo.

SALMO RESPONSORIO

Sal 145:1b-2, 8-9, 10-11

(b) Maloloy’on han ngatanan an Ginoo.

1. Isangyaw ko ikaw, O Dyos, ngan hadi ko,

magpapasalamat hin dayon ha imo.

Adlaw-adlaw magpapasalamat ako,

hin waray paghunong ikaw dayawon ko.

(b) Maloloy’on han ngatanan an Ginoo.

2. Ginoo mahigugmaon, maloloy-on,

mahinay masina, may gugma nga dayon.

Maupay ha tanan hiya nga Ginoo,

ha tanan binuhat napaid hin husto.

(b) Maloloy’on han ngatanan an Ginoo.

3. Tanan nga im’ mga binuhat, Ginoo,

mananagdayaw gud ngatanan ha imo.

Ngan pagpapasalamatan ka na hadto,

han ngatanan gud nga imo mga tawo.

An kaharangdon han imo ginhadian

amo gud an ira paghihimangrawan.

Ira igsusumat ngadto han ngatanan

an imo kakusgan, imo kagamhanan.

(b) Maloloy’on han ngatanan an Ginoo.

EBANGHELYO    

Lc 6:12-19

Pagbasa tikang han santos nga ebanghelyo sumala kan Lucas.

Hadto nga panahon sinagka hi Jesus ngadto hin usa nga bukid para hin pag-ampo, ngan mag-aga an iya pag-inampo ngadto sa Dyos. Han pagkaaga, gintawag niya an iya mga tinun-an ngan nagpili hiya hin dose ha ira, nga ginngaranan nga mga apostoles: hira Simon (nga iya liwat ginngaranan kan Pedro) ug Andres nga iya bugto; Santiago ug Juan, Felipe ug Bartolome, Mateo ug Tomas, Santiago nga anak ni Alfeo, ug Simon (nga gintawag, an Bayani), Judas nga anak ni Santiago, ug Judas Iscariote nga naglingo han Ginoo.

Paglugsong nira tikang ha bukid, tinukdaw hi Jesus didto hin usa nga patag nga dapit, upod in damo nga mga tinun-an niya. Nakadto didto in dako nga pundok hin mga tawo nga tikang han bug-os nga Judea, Jerusalem, ngan han mga syudad hirani han baybayon han Tiro ug Sidon. Nagkaabot hira pamati ha iya ngan pagpatambal han ira mga sakit. Nagkaabot liwat an mga sinasangkayan hin magraot nga mga espiritu ngan natambal hira. Nagtalingoha hin pagkamkam ha iya an ngatanan nga mga tawo, kay naguwa tikang ha iya in gahom nga nagtatambal ha ira ngatanan.

An Ebanghelyo han Ginoo.