PAGBASA I

Col 3:1-11

Pagbasa tikang han Surat ni San Pablo ngadto han mga taga Colosas.

Mga kabugtoan: Ginbanhaw na kamo upod kan Cristo, sanglit pangitaa niyo an mga butang nga aadto ha langit, diin nalingkod hi Cristo han iya trono, ha tuo han Dyos. Ikadto an iyo hunahuna han mga butang didto ha langit, diri han mga butang dinhe ha tuna. Kay namatay na kamo, ngan an iyo kinabuhi natatago upod kan Cristo dida ha Dyos. An iyo matuod nga kinabuhi amo hi Cristo, ngan kon magpahayag na hiya, magpapahayag man liwat kamo upod ha iya ngan maangbit kamo han iya himaya!

Sanglit, kinahanglan ilubong na niyo an tunan-on nga mga karuyagon nga nagdudumara ha iyo, sugad han pagkamalaw-ay, pagkamahilas, pagkaipa, maraot nga mga balatian, ngan kahalot (kay usa nga paagi hin pagsingba hin mga diyosdiyos an kahalot). Tungod hini nga mga butang maabot an kapungot han Dyos ngadto hadton mga diri nasugot ha iya. Ngan hadto anay nag-ukoy kamo sumala hini nga mga karuyagon samtang naghadi han iyo kinabuhi ini nga mga karuyagon. Kundi yana kinahanglan isikway na niyo ini ngatanan nga mga butang: kasina, kapungot, ngan an kamadumot. Kinahanglan diri na gud kamo magbiaybiay o magyakan hin maglaw-ay. Diri kamo maggipabuwabuwa, kay ginlubas na niyo an iyo daan nga pagkatawo upod an iya mga ginawian, ngan nagsul-ot na kamo han bag-o nga pagkatawo. Amo ini an bag-o nga pagkatawo nga kanunay ginbabag-o han Dyos, an Magburuhat, sugad han iya kalugaringon nga ladawan, basi mahingpit an iyo pagkilala ha iya. Tungod hini, waray na mga Hentil ngan mga Judiyo, mga tinori ngan diri mga tinori, mga langyaw, mga tapang, mga oripon o talwas nga mga tawo, kundi hi Cristo an ngatanan, ngan hi Cristo aada han ngatanan.

An Pulong han Ginoo.

SALMO RESPONSORiO          

Sal 145:2-3, 10-11, 12-13ab

(b) Malolooyon han ngatanan an Ginoo.

1. Adlaw-adlaw magpapasalamat ako,

hin waray paghunong ikaw dayawon ko.

Pagkadako gudman niya nga Ginoo,

angay hiya pagdayawon hin tutoo.

Diri gud masantop iya pagkadako,

labaw pa gud han ngatanan kahibaro.

(b) Malolooyon han ngatanan an Ginoo.

2. Tanan nga im’ mga binuhat, Ginoo,

mananagdayaw gud ngatanan ha imo.

Ngan pagpapasalamatan ka na hadto,

han ngatanan gud nga imo mga tawo.

An kaharangdon han imo ginhadian

amo gud an ira paghihimangrawan.

Ira igsusumat ngadto han ngatanan

an imo kakusgan, imo kagamhanan.

(b) Malolooyon han ngatanan an Ginoo.

3. Hisabtan han tanan buhat mong’ gamhanan,

ngan an kaanyag gud han im’ ginhadian.

An im’ ginhadian magpapadayon man,

maghahadi ka hin waray kataposan.

(b) Malolooyon han ngatanan an Ginoo.

EBANGHELYO

Lc 6:20-26

Pagbasa tikang han santos nga ebanghelyo sumala kan Lucas.

Siniplat hi Jesus han iya mga tinun-an ngan nagsiring, “Palaran kamo nga mga kablas, kay iyo an Ginhadian han Dyos! “Palaran kamo nga mga ginugutom yana, kay pagbubusgon kamo! “Palaran kamo nga mga nagtatangis yana, kay malilipay kamo! “Palaran kamo kon tungod han Anak han Tawo, pagdumtan, igsalikway, pagyubiton, ngan pakaraoton kamo han mga tawo!

Paglipay kamo kon mahinabo ini, ngan sayaw hin kalipay kay gin-aandam para ha iyo in dako nga balos didto ha langit. Kay ginbuhat han ira nga kaapoy-apoyan an amo ngahaw nga mga butang ngadto han mga manaragna. “Kundi pagkamakaharadlok para ha iyo nga mga riko yana, kay nagkaada na kamo han iyo himyang nga kinabuhi!

“Pagkamakaharadlok para ha iyo nga mga busog yana, kay gugutomon kamo! “Pagkamakaharadlok para ha iyo nga nagtitinawa yana, kay magmamasulub-on ngan magtatangis kamo! “Pagkamakaharadlok kon pagdinayawon kamo han ngatanan nga mga tawo, kay ginsiring han ira mga kaapoy-apoyan ini ngahaw nga mga butang mahitungod han buwaon nga mga manaragna.

An Ebanghelyo han Ginoo.