PAGBASA I 

Num 21:4b-9

Pagbasa tikang han Basahan han Numero.

Kundi dida ha dalan nagnginurutob an mga tawo, ngan nagyakan hira kontra han Dyos ngan kan Moises. Nagsiring hira, “Kay ano nga ginpagawas mo kami ha Ehipto basi magkamatay dinhe hini nga kamingawan nga waray pagkaon o tubig? Sinusumhan na kami hini nga ginhatag nga pagkaon!” Niyan ginpadara han Ginoo in maglara nga mga halas ngada han mga tawo, ngan damo nga mga Israelita in pinangagat ngan nagkamatay. Kinmadto kan Moises an mga tawo ngan nagsiring, “Nakasala kami han amon pagngurutob kontra han Ginoo ngan kontra ha imo. Yana pag-ampo gad han Ginoo nga kuhaon ini nga kahalasan.” Sanglit igin-ampo ni Moises an mga tawo. Niyan ginpahimo han Ginoo hi Moises hin usa nga halas nga bronse ngan iginpabutang ini ha igbaw hin hilaba nga palo, basi an bisan hin-o nga kagton han halas kon makatan-aw hini mauupay hiya. Sanglit naghimo hi Moises hin usa nga halas nga bronse ngan ibinutang ini ha igbaw hin hilaba nga palo. An bisan hin-o nga ginkagat, natan-aw la han halas ngan nauupay.

An Pulong han Ginoo.

SALMO RESPONSORIO

Sal 78:1bc-2, 34-35, 36-37, 38

(b) Ayaw hingalimti an mga buhat han Ginoo.

1. Akon mga tawo, pamati han akon pagturon-an,

ngan tigamni an akon mga ginyayakan;

Kay akon igtutug-an yana ha iyo,

an kadaanan nga mga misteryo.

(b) Ayaw hingalimti an mga buhat han Ginoo.

2. Kundi kon ginpapatay niya an iba,

may nagbabasol, nabalik ha iya;

nagbabasol hira ngan nag-aampo pa,

hin tinuodtuod ngadto ha iya.

Nanumdom hira nga an Dyos ira darangpan,

ngan an Labi Kamakagarahum ha ira natabang.

(b) Ayaw hingalimti an mga buhat han Ginoo.

3. Kundi an ira mga pulong puros buwa,

an ginyakan nira mga ulog-ulog la.

Nagpadayon hira hin kamalingoon,

ug han ginsaaran diri matinumanon.

(b) Ayaw hingalimti an mga buhat han Ginoo.

4. Kundi maloloy-on an Dyos han iya katawhan,

iya ginpapasaylo an ira mga kasal-anan;

waray man niya puoha an ngatanan,

agsob nga an iya kasina iya ginpupudngan.

(b) Ayaw hingalimti an mga buhat han Ginoo.

PAGBASA II          

Flp 2:6-11

Pagbasa tikang han Surat ni San Pablo ngadto han mga taga Filipo.

Dayuday may-ada niya kinaiya han Dyos, kundi waray hiya makahuna-huna hin pagtupong han Dyos pinaagi hin kusog. Lugod, ha iya kaburot-on, itinubyan niya an ngatanan nga pagka-Dyos, ngan kinuha hiya han kinaiya hin surugoon. Natawo hiya sugad ha aton, ngan pinakita hiya nga sugad hin tawo. Nagpaubos hiya ngan nagsugot tubtob ha kamatayon—an kamatayon ha kros. Tungod hini, gin-undong hiya han Dyos ngadto han gihahataasi nga langit, ngan ihinatag ha iya an ngaran nga labaw han iba nga mga ngaran. Ha pagpasidungog han ngaran ni Jesus, maluhod an ngatanan nga aadto ha langit an aanhi ha tuna, ngan aadto ha kahiladman, ngan ha dayag magpapasangyaw nga hi Jesu-Cristo amo an Ginoo, ha pagpasidungog han Dyos nga Amay.

An Pulong han Ginoo.

EBANGHELYO    

Jn 3:13-17

Pagbasa tikang han santos nga ebanghelyo sumala kan Juan.

Nagsiring hi Jesus ngadto kan Nicodemo, “Waray pagud nakasaka ha langit labot han Anak han Tawo nga linmusad tikang ha langit!” Sugad nga gin-isa ni Moises didto ha kamingawan an halas nga bronse, kinahanglan man liwat nga isahon an Anak han Tawo hin sugad nga paagi, basi makaangkon han dayon nga kinabuhi an ngatanan nga natoo ha iya.

Kay ginhigugma gud han Dyos an kalibutan, nga iginhatag niya an iya bugtong nga Anak, basi diri unta mamatay an ngatanan nga nasarig ha iya, kundi makaangkon han dayon nga kinabuhi. Kay waray magsugo an Dyos han iya Anak nganhi hin paghukom han kalibutan, kundi hin pagtalawas han kalibutan.

An Ebanghelyo han Ginoo.