PAGBASA I 

1 Tim 3:1-13

Pagbasa tikang han Syahan nga Surat ni San Pablo ngadto kan Timoteo.

Matuod ini nga darahunon: kon karuyag in tawo pagpangulo hin singbahan, naungara hiya hin maupay gud nga buruhaton. Kinahanglan diri sarawayon in pangulo han singbahan; kinahanglan usa la an iya asawa, buotan, nakakapugong han iya kalugaringon, ngan diri masamok; kinahanglan maabiabihon hiya hin mga sumasaka ha iya panimalay; kinahanglan maaram hiya magtutdo; kinahanglan diri hiya parahubog o maisog nga tawo, kundi mapuanguron ngan diri makiawayon; kinahanglan diri hiya makisalapi; kinahanglan nakakagdumara hiya hin maupay han iya kalugaringon nga panimalay, ngan nakakapasunod hiya han iya mga anak hin pagsugot ug pagtahod ha iya. Kay kon diri hiya maaram magdumara han iya kalugaringon nga panimalay, uunanhon man hin pakagmangno niya han singbahan han Dyos? Kinahanglan nga hamtong na hiya ha pagtoo, basi diri hiya pumarayaw ngan paghukman hiya ha karat-an sugad han Yawa. Kinahanglan tawo hiya nga tinatahod han iba nga mga tawo nga diri sakop han singbahan, basi diri hiya maalohan ngan mahulog ha bitik han Yawa.

Kinahanglan liwat nga tangkod ngan may maupay nga pamatasan an mga kabulig han singbahan; kinahanglan diri gud hira maghubog kon mainom hira hin bino, ngan diri halot; kinahanglan nga pagtumanon nira an iginpadayag nga kamatuoran han pagtoo, upod in limpyo nga konsensya. Kinahanglan sarihan hira anay, ngan kon makapasar hira hini makakahimo na hira hin pag-alagad ha singbahan. Kinahanglan liwat maupay an pamatasan han ira mga asawa, ngan diri maglibak; kinahanglan buotan ngan tangkod hira ha ngatanan nga butang. Kinahanglan usa la an asawa han kabulig han singbahan, ngan maupay magdumara han iya mga anak ngan panimalay. Adton may maupay nga buhat nakakaangkon hin maupay nga dungog, ngan nakakaghimangraw hin waray kahadlok hiunong han ira pagtoo kan Cristo Jesus.

An Pulong han Ginoo.

SALMO RESPONSORIO

Sal 101:1b-2ab, 2cd-3ab, 5, 6

(b) Maglalakaton ako ha tuptop nga kasingkasing.

1. Pag-unong, kamatadong ak’ kakantahon,

ha imo, Ginoo, akon aawiton.

Panggawi ko diri magmamasalaypon;

san-o ka pa ngani kakadi ha akon?

(b) Maglalakaton ako ha tuptop nga kasingkasing.

2. Magpuputli ako han akon urokyan;

magraot nga buhat di' ko tutugotan.

(b) Maglalakaton ako ha tuptop nga kasingkasing.

3. Tawo nga matamay akon pupuohon,

nga han iya sangkay naglilinibakon.

Diri manta ako hin tawo mauyon,

hadton parayawan ngan mapahitas-on.

(b) Maglalakaton ako ha tuptop nga kasingkasing.

4. An matinumanon han Dyos karuyag ko,

ngan pauokyon ko ha akon palasyo;

hira nga tinuod nga tangkod nga tawo,

pagsirbe ha akon hira tugotan ko.

(b) Maglalakaton ako ha tuptop nga kasingkasing.

ebanghelyo    

Lc 7:11-17

Pagbasa tikang han santos nga ebanghelyo sumala kan Lucas.

Waray pag-iha kinadto hi Jesus hin bungto nga Nain an ngaran. Inupod ha iya an iya mga tinun-an ngan hin dako nga hugpo hin mga tawo. Han pag-abot niya ha ulpotan han bungto, amo man liwat an paggawas han mga tawo nga naglulubong hin minatay. An minatay amo gud la nga anak hin balo nga babaye, ngan gin-updan an babaye hin damo nga mga tawo tikang ha bungto. Han pakakita ha iya han Ginoo, inalpan an Ginoo hin kalooy ha iya, ngan nagsiring an Ginoo ha iya, “Ayaw pagtangis.” Hinarani hiya ngan gindun-an an lungon, ngan inukoy an magparasag nga mga tawo. Siniring hi Jesus, “Ikaw nga olitawo, nasiring ako ha imo, buhat!” Liningkod an minatay ngan nagtikang hin pagyakan, ngan iginhatag hiya ni Jesus ngadto han iroy niya. Pinangulba an ngatanan, ngan nagdayaw hira han Dyos, “Nagpakita ha butnga naton in dako nga manaragna!” ngan, “Kinanhi an Dyos hin pagtalwas han iya katawhan!” Nahibantog ini nga sumat mahitungod kan Jesus ha bug-os nga Judea ngan ha mga higrani nga katunaan.

An Ebanghelyo han Ginoo.