PAGBASA I 

1 Tim 6:2c-12

Pagbasa tikang han Syahan nga Surat ni San Pablo ngadto kan Timoteo.

Hinigugma: Kinahanglan itutdo ngan igwali mo ini nga mga butang. Adton nagtututdo hin lain nga pagturon-an ngan diri nauyon han matuod nga mga pulong han aton Ginoo Jesu-Cristo ngan han pagturon-an han aton tuloohan oraora gud hin kamapinahatas-on ngan waray hibabroan. Diri tuhay an iya pakiglantugi ngan pakiglaris hiunong hin mga pulong, ngan nagdadara ini hin pangabugho, pagkiglantugi, pagyubit, pagtamay, ngan dayon nga pakiglaris han mga tawo nga waray na maupay nga mga panhunahuna, ngan nawad-an na han kamatuoran. Naghuhunahuna hira nga an toluohan usa nga paagi hin pagparigko. Matuod, nakakapariko gud an toluohan, kon kontento la an tawo han aada na ha iya. Ano an aton gindara han katawo naton nganhi ha kalibutan? Waray! Ano man an aton makukuha hini nga kalibutan? Waray! Sanglit kon may-ada na kita pagkaon ngan panapton, igo na unta ito ha aton. Kundi adton karuyag mariko nasusulay ngan nabibitik hira han damo nga linurong ngan nakakaraot nga mga ungara, nga nagdadanas han mga tawo ngadto ha kapirdehan ngan kabungkagan. Kay tinikangan hin damo kalain nga karat-an an paghigugma han kwarta. Duro gud an pag-irinikohan han iba, ngan binulag hira han pagtoo, ngan nariksi an ira mga kasingkasing tungod hin damo nga mga kabidoan.

Kundi ikaw nga tawo han Dyos, likayi ini ngatanan nga mga butang. Talinguhaa an pagkamatadong, pagkadyosnon, pagtoo, paghigugma, pagpailob, ngan pagkalumo. Dalagan, sugad han imo mahimo dida han paisan-isan han pagtoo, ngan dag-a para ha imo ngahaw an dayon nga kinabuhi; kay gintawag ka han Dyos ngada hini nga kinabuhi, dida han maupay mo nga pagtug-an han pagtoo ha atubangan hin damo nga mga saksi.

An Pulong han Ginoo.

SALMO RESPONSORIO

Sal 49:6-7, 8-10, 17-18, 19-20

(b) Baraan an kablas ha Espiritu; kay ira an ginhadian han langit.

1. Diri ako nahahadlok ha mga panahon hin kataragman,

kon ginlilibotan ako hin yawan-on nga mga kaaway,

hin mga tawo nga nasarig han ira mga manggad,

nga naghahambog han ira dagko nga karikohan.

(b) Baraan an kablas ha Espiritu; kay ira an ginhadian han langit.

2. Diri gud makakatubos an tawo ha iya ngahaw;

diri hiya makakabayad ha Dyos

han prisyo han iya kinabuhi,

kay mahal hin duro an bayad han kinabuhi hin tawo.

Diri manta hiya makakabayad hin igo

pagtalwas ha iya tikang han lubnganan,

basi mabuhi hiya hin kadayonan.

(b) Baraan an kablas ha Espiritu; kay ira an ginhadian han langit.

3. Ayaw kahadlok kon nagririko in tawo,

kon nagtitikadako an iya manggad;

diri hiya makakadara hito kon napatay hiya;

diri maupod ha iya ha lubnganan an iya manggad.

(b) Baraan an kablas ha Espiritu; kay ira an ginhadian han langit.

4. Bisan kon natunga hini nga kinabuhi in usa ka tawo,

ngan gindadayaw hiya kay mainuswagon,

matampo hiya han ngatanan niya

nga kaapoy-apoyan ha kamatayon,

diin nagpapabilin hin kadayonan an kasisidman.

(b) Baraan an kablas ha Espiritu; kay ira an ginhadian han langit.

EBANGHELYO    

Lc 8:1-3

Pagbasa tikang han santos nga ebanghelyo sumala kan Lucas.

Waray pag-iha, nagsudoy hi Jesus han kabungtohan ug kabaryohan, hin pagwali han Maupay nga Sumat mahitungod han Ginhadian han Dyos. Inupod ha iya an dose nga mga tinun-an, ngan pira nga kababayen-an nga gin-upay tikang hin magraot nga mga espiritu ngan mga sakit: hira Maria (nga ginngangaranan nga Magdalena), nga tikang ha iya ginawas in pito nga mga yawa; Juana, nga asawa ni Chuza nga usa nga opisyal han korte ni Herodes; Susana, ngan damo pa nga iba nga kababayen-an nga naggamit han ira kalugaringon nga pinakabuhian hin pagbulig kan Jesus ngan han iya mga tinun-an.

An Ebanghelyo han Ginoo.