PAGBASA I 

1 Tim 6:13-16

Pagbasa tikang han Syahan nga Surat ni San Pablo ngadto kan Timoteo.

Hinigugma:  Ha atubangan han Dyos nga nahatag hin kinabuhi ha ngatanan nga mga butang, ngan ha atubangan ni Cristo Jesus nga nagtug-an hin maupay ha atubangan ni Poncio Pilato, nagsusugo ako ha imo: Sugta an kasugoan, ngan tumana hin hingpit tubtob han Adlaw han pagpakita han aton Ginoo Jesu-Cristo. Ha igo nga panahon igpapadayag hiya han Dyos, an darayawon ngan amo la nga Magburuot, an Hadi han mga hadi, ngan Ginoo han mga ginoo. Hiya la an waray kamatayon, ngan nag-uokoy ha kapawa nga waray gud nakakahirani. Waray pa nakakita ha iya, ngan waray gud makakakita ha iya. Ha iya an kadungganan ngan an dayon nga kagamhanan! Amen.

An Pulong han Ginoo.

SALMO RESPONSORIO

Sal 100:1b-2, 3, 4, 5

(b) Pakadto nga malipayon ha atubangan han Ginoo.

1. Pagrayhak ha Ginoo, bug-os nga tuna.

Hin malipayon an Ginoo singbaha;

ngan pumakada ha atubangan niya,

upod in malipayon nga mga kanta!

(b) Pakadto nga malipayon ha atubangan han Ginoo.

2. Ayaw gud kalimot nga Dyos an Ginoo!

Amo hiya adton ha aton naghimo.

Hiya an tag-iya ha aton nga tawo,

katawhan kita niya, iya karnero.

(b) Pakadto nga malipayon ha atubangan han Ginoo.

3. Sulod kita ngadto hadton Templo niya,

upod adton mga pagpasalamat ta.

Upod an pagdayaw in' nga dapit sudla!

Pagpasalamat ngan pagdayawa hiya!

(b) Pakadto nga malipayon ha atubangan han Ginoo.

4. An Ginoo hin pagkamaupay gudman,

buhi an iya gugma ha kadayonan;

amo man an iya kamatinumanon,

ha kagihaponan gud nagpapadayon.

(b) Pakadto nga malipayon ha atubangan han Ginoo.

EBANGHELYO    

Lc 8:4-15

Pagbasa tikang han santos nga ebanghelyo sumala kan Lucas.

Abotkiabot an mga tawo ngadto kan Jesus tikang ha usa ngadto han sunod nga bungto, ngan han pagtirok na hin dako nga hugpo hin mga tawo, iginsumat ni Jesus ini nga pananglitan: “Ginawas in usa ka tawo pagsabod han iya binhe. Samtang iginsasabod niya ha tuna an binhe, nagkataktak in pira han mga binhe ha ligid han dalan, diin natamakan ini, ngan pinanuktok han katamsihan. Nagkataktak in pira han mga binhe ha batoon nga tuna, ngan han pagtubo na han mga tanom, nagkalalaya hira, kay mamara man an tuna. Nagkataktak an iba han mga binhe ha katunokan, nga tinubo tampo han mga tanom, ngan naambongan an mga tanom. Ngan nagkataktak man an iba nga mga binhe ha maupay nga tuna; tinubo an mga tanom, ngan namunga hin tag usa ka gatos (100) ka lugas an kada usa.” Ngan gintapos ni Jesus pagsiring, “Sanglit, pamati kamo, kon may-ada niyo mga durunggan!”

Nagpakiana kan Jesus an iya mga tinun-an kon ano an kahulogan hini nga pananglitan. Binmaton hi Jesus, “Iginhatag ha iyo an paghibaro han mga tinago han Ginhadian han Dyos; kundi han iba, pinaagi la hin mga pananglitan, basi kon magtan-aw man hira, diri makakita; ngan kon mamati man hira, diri makasabot.

“Amo ini an kahulogan han pananglitan: an pulong han Dyos amo an binhe. An mga namamati amo an binhe nga nataktak ha ligid han dalan, kundi naabot an Yawa ngan inaagaw an mensahe tikang ha ira mga kasingkasing, basi diri hira tumuo ngan matalwas. An binhe nga nataktak ha batoon nga tuna amo an namamati, kundi diri gud ini nakakapanggamot; natoo hira hin madaliay la, ngan nabaya kon naabot na an panahon hin pagsulay ha ira. An binhe nga nataktak ha katunokan amo an mga namamati, kundi nalambongan ngan nalumos hira han mga karinggalan, mga manggad, ngan mga kaliawan hini nga kinabuhi, ngan natataktak dayon an ira bunga. An binhe nga nahulog ha maupay nga tuna, amo adton namamati han mensahe ngan gintitipigan nira ha maupay ngan masinugtanon nga kasingkasing, ngan nagpapadayon hira tubtob nga makapamunga.

An Ebanghelyo han Ginoo.