PAGBASA I 

Amos 8:4-7

Pagbasa tikang han basahan ni Amos nga manaragna.

Pamati hini, kamo nga nagtatamak han mga magpakalolooy ngan nagtatalinguha hin pagpuo han mga kablas han nasod. Nasiring kamo ha iyo la ngahaw, “Makuri na kami makahulat nga maliwas na an baraan nga mga adlaw basi makagbaligya kami han amon mga pagkaon. San-o pa katatapos an Adlaw nga Iparahuway basi makagbaligya na liwat kami? Niyan amon pahihitas-on an pagbaligya, magamit kami hin diri husto nga mga taraksan, ngan linastihan nga mga timbangan ha paglimbong han amon mga pumaralit. Mamahalon namon hin pagbaligya han waray pulos nga trigo. Mamimiling kami hin kablas nga tawo nga diri makakabayad han iya mga utang, bisan ngani hin pagpalit hin usa ka padis nga sandalyas, ngan papaliton namon hiya nga usa nga oripon.” Nagsumpa an Ginoo nga Dyos han Israel, “Diri ko gud hingangalimtan an magraot nira nga binuhatan.

An Pulong han Ginoo.

SALMO RESPONSORIO

Sal 113:1-2, 4-6, 7-8

(b) Dayawa an Ginoo nga nabangon han mga kablas.

1. Pagdayawa an Ginoo hin tutoo!

Kamo mga surugoon han Ginoo,

pagdayawa niyo adton iya ngaran,

Pagdayawa yana ngan ha kadayonan!

(b) Dayawa an Ginoo nga nabangon han mga kablas.

2. Ginoo’n naghadi'n tanan kanasoran,

labaw han langit an iya kadungganan.

Waray sugad han aton Dyos nga Ginoo,

igbaw han kalangitan h'ya pagpupuyo;

kundi tikang didto natangbo man hiya,

pagkita han kalangitan ngan han tuna.

(b) Dayawa an Ginoo nga nabangon han mga kablas.

3. Adton mga pobre iya inaalsa

tikang hadton tapotapo hinin tuna;

adton kablasanon binabangon niya

tikang hadton mga kakurian nira.

Ngan gintampo nira han mga punoan,

ngan mga prinsipe han iya katawhan.

(b) Dayawa an Ginoo nga nabangon han mga kablas.

PAGBASA II          

1 Tim 2:1-8

Pagbasa tikang han Syahan nga Surat ni San Pablo ngadto kan Timoteo.

Sanglit, una ha ngatanan, nag-aaghat ako nga ihalad niyo ngadto sa Dyos an mga pangamuyo, mga pag-ampo, ngan mga pagpasalamat para han ngatanan nga mga tawo; para han mga hadi ngan han ngatanan nga iba nga mga pamunoan, basi mag-ukoy kita hin mamingaw ngan malinawon nga kinabuhi, dida ha pag-alagad han Dyos ha matadong nga pamatasan. Maupay ngan nakakalipay ini han Dyos nga aton Magtaralwas, nga naruruyag nga matalwas an ngatanan nga mahibaro han kamatuoran. Kay uusa la an Dyos, ngan uusa la an makakag-usa han Dyos nga han mga tawo; amo ini hi Cristo Jesus nga nagtubyan han iya kalugaringon hin pagtubos han ngatanan nga mga tawo. Amo ito an kamatuoran nga ha igo nga panahon tatalwason han Dyos an ngatanan nga mga tawo kon umabot na an gintalaan nga panahon. Amo ini an hinungdan nga ginsugo ako nga apostol ngan magturutdo han mga Hentil, hin pagsangyaw han mensahe han pagtoo ngan kamatuoran. Nagsusumat ako han kamatuoran, diri ako nagbubuwa!

Karuyag ko nga mag-ampo an kalalaken-an ha ngatanan nga dapit, kalalaken-an nga hinalad ngadto han Dyos, nga binayaw an ira mga kamot ha pag-ampo hin waray kasina o pagkaaway-away.

An Pulong han Ginoo.

EBANGHELYO    

Lc 16:1-13

[ Lc 16:10-13 ]

Pagbasa tikang han santos nga ebanghelyo sumala kan Lucas.

Nagsiring hi Jesus ha iya mga tinun-an, “May-ada hadto usa nga riko nga may-ada niya tinaporan. Nasumatan ini nga riko nga tawo, nga ginkikinaragan la han tinaporan an kwarta han iya agaron. Sanglit iginpatawag ini nga tinaporan ngan ginsiring, ‘Ano ba ini nga akon hinbabatian hiunong ha imo? Hala, tuhayi daw ako han ngatanan nga akon igintapod ha imo, kay diri ka na magigin tinaporan ko.’ Nagsiring ha iya ngahaw ini nga tinaporan, ‘Ta, kukuhaan na daw ako han akon agaron han akon pagkatinaporan. Ano daw an sadang ko buhaton? Diri man ako mailob hin paghornal kay maluyahon ako, ngan makaarawod in pakilimos. Yana, maaram ako kon ano an akon bubuhaton, basi kon mawaray na ako trabaho, mamamay-ada ako kasangkayan nga makarawat ha akon ha ira panimalay.’ Sanglit iginpatawag niya an ngatanan nga nakautang han iya agaron. Ginsiring niya an syahan, ‘Pira an imo nautang han akon agaron?’ ‘Usa ka gatos ka baril nga lana hin olibo,’ nagbaton hiya. Nagsiring ha iya an tinaporan, ‘Iya, iini an imo resibo. Lingkod ngan liwata. Ibutang nga kalim-an (50) la ka baril.’ Nagpakiana an tinaporan ha lain nga nakautang, ‘Ikaw, pira man an imo nautang?’ ‘Usa ka gatos ka bakid nga trigo,’ nagbaton hiya. Nagsiring ha iya an tinaporan, ‘Iya, iini an imo resibo. Lingkod ngan liwata. Ibutang nga kawaloan (80) la.’ Nagdayaw ha iya an agaron hini nga diri tangkod nga tinaporan tungod han iya kamaaram; kay an mga tawo hini nga kalibutan labi pa kamaaram hin pagdumara han ira mga buruhaton kay han mga tawo nga sakop han kapawa.” Ngan nagpadayon hi Jesus hin pagsiring: “Sanglit susumatan ko kamo: gamit hin manggad nga kalibutanon hin pagkabig hin kasangkayan, basi kon maubos na an manggad, kakarawton kamo didto han dayon nga urokyan. [ Adton kasasarigan hin gudti nga butang, kasasarigan man liwat hin dagko nga mga butang; adton diri tangkod hin talagudti nga butang, diri liwat tangkod ha mga dagko nga butang. Sanglit kon diri ka kasarigan hin pagdumara hin manggad nga kalibutanon, uunanhon hin pagtapori ha imo hin matuod nga manggad? Ngan kon diri ka kasarigan han mga butang hin iba, hin-o man in mahatag ha imo han imo kalugaringon nga mga butang? “Waray surugoon nga maooripon hin duha nga agaron, kay mahinanabo nga iya pagdudumtan an usa, ngan paghihigugmaon niya an ikaduha; magmamatinumanon hiya ha usa, ngan pagtatamayon niya an ikaduha. Diri mahihimo nga dunganon in pagsirbe han Dyos ngan han kwarta.” ]

An Ebanghelyo han Ginoo.