PAGBASA I 

Esd 1:1-6

Pagbasa tikang han Basahan ni Esdras.

Dida han syahan nga tuig nga emperador han Persia hi Ciro, gintuman han Ginoo an iya ginsiring pinaagi kan Jeremias, an manaragna. Gin-aghat niya hi Ciro nga magpagawas hin usa nga sugo ngan isumat ini niya basi ipasangyaw ha ngatanan nga mga dapit han iya ginhadian: “Amo ini an sugo ni Ciro nga emperador han Persia: Ginhimo ako han Ginoo nga Dyos han Langit, nga pangulo han bug-os nga kalibutan ngan iginhatag ha akon an katungod hin pagtindog para ha iya hin templo ha Jerusalem, didto ha Juda. Maada unta an Dyos ha iyo ngatanan nga mga tawo niya. Mapakadto kamo ha Jerusalem ngan iyo na liwat titindogon an Templo han Ginoo nga Dyos han Israel, an Dyos nga ginsisingba didto ha Jerusalem. Kon may-ada han iya iginhalin nga mga tawo in magkinahanglan hin bulig basi hira makauli, an ira mga amyaw kinahanglan bumulig ha ira. Kinahanglan tagan hira hin salapi ug bulawan, mga garamiton ngan kargahan nga mga hayop, sugad man hin mga halad nga ira dadad-on ngadto han Templo han Dyos ha Jerusalem.”

Niyan nag-andam hin pagkadto ha Jerusalem ngan hin pagtindog na liwat han Templo han Ginoo an mga pangulo han mga banay han mga tribo nira Juda ug Benjamin, an kapadian ngan mga Levita, ngan an ngatanan kanay kasingkasing gin-aghat han Ginoo. Binulig ha ira an ngatanan nira nga mga amyaw hin paghatag ha ira hin damo nga mga butang: salapi nga mga garamiton, bulawan, mga kasangkapan, kargahan nga mga hayop, iba pa nga mga marahalon, ngan mga halad para ha Templo.

An Pulong han Ginoo.

SALMO RESPONSORIO

Sal 126:1b-2ab, 2cd-3, 4-5, 6

(b) Kaorosahon han ginbuhat han Ginoo ha aton.

1. Sugad la adto hin inop,

han pagpabalika ha aton han Ginoo ngadto ha Sion!

Hin kamakusog han aton pagkatatawa,

hin kamalipayon han aton pagkaranta!

(b) Kaorosahon han ginbuhat han Ginoo ha aton.

2. Niyan nagsiring hiunong ha aton

an iba nga mga nasod,

“Nagbuhat an Ginoo hin dagko

nga mga butang para ha ira!”

Tinuod gud nga nagbuhat hiya

hin dagko nga mga butang para ha aton;

hin kamalipayon naton hadto!

(b) Kaorosahon han ginbuhat han Ginoo ha aton.

3. O Ginoo, ibalik kami ha amon tuna,

sugad gud han pagpapabalik hin tubig

ngadto han magmara nga mga salog

pinaagi han imo uran.

Papagbaria hin malipayon,

adton mga nagtangis han pagpugas nira!

(b) Kaorosahon han ginbuhat han Ginoo ha aton.

4. Mabalik ngan magkakanta hin malipayon,

nga nagdadara han binari,

adton mga nagtangis han paggawas nira

nga gindadara an binhe!

(b) Kaorosahon han ginbuhat han Ginoo ha aton.

EBANGHELYO    

Lc 8:16-18

Pagbasa tikang han santos nga ebanghelyo sumala kan Lucas.

Nagsiring hi Jesus ha mga tawo, “Waray nadagkot hin suga ngan tinatahoban o ibinubutang ha ilarom hin higdaan. Lugod, ibinubutang ito niya ha burutangan han suga, basi makakita han kapawa an nasulod nga mga tawo. An bisan ano nga tinago, ipadadayag; ngan an bisan ano nga tinahoban, ipahahayag. “Sanglit, paghirot han iyo pamati; kay adton may-ada, tatagan pa hin dugang; kundi adton waray, kukuhaan pa hiya bisan han gutiay nga iya ginhuhunahuna nga iya.”

An Ebanghelyo han Ginoo.