PAGBASA I 

Esd 6:7-8, 12b, 14-20

Pagbasa tikang han Basahan ni Esdras.

Niyan iginpadara ni Emperador Dario ini nga balos: “Ayaw niyo pag-ulanga an trabaho. Papagtindog han Templo han Dyos an gobernador han Juda ngan an mga pangulo nga Judiyo dida han una nga dapit nga iya hinmutangan. Nagsusugo ako ha iyo nga buligan hira niyo hin pagtindog han templo. Kinahanglan nga kabaydan dayon an ira gastos tikang han hinipos nga salapi han hadi nga natirok tikang han mga buhis ha Katundan han Eufrates, basi diri maulang an trabaho. Ako, hi Dario, an nagsugo hini. Kinahanglan pagsugton gud an akon sugo.”

Nagpadayon hin pagtindog han Templo an mga pangulo nga Judiyo sumala han ginsiring ha ira nira Hageo ug Zacarias nga mga manaragna. Nahuman nira an Templo sumala han iginsugo ha ira han Dyos han Israel, ngan nira Ciro, Dario, ug Artajerjes nga mga hadi han Persia. Nahuman nira an Templo dida han ikatulo nga adlaw han bulan Adar, ha ikaunom ka tuig nga pagkahadi ni Dario. An mga tawo han Israel—an kapadian, an mga Levita, ngan an iba pa nga binalik na tikang han ira kahalin—naghalad nga malipayon han templo. Para han paghalad hini nga Templo naghalad hira hin usa kagatos (100) nga mga tudo nga baka, duha kagatos (200) nga mga karnero, ngan upat kagatos (400) nga mga kordero, nga mga unong nga tutuboron ngan hin dose nga lalaki nga mga kanding nga ira halad tungod hin sala, tag-usa ha tagsa nga tribo han Israel. Nagtindog hira hin hugpo hin kapadian ngan mga Levita para han mga buruhaton han Templo ha Jerusalem, sumala han mga tugon nga nahisurat ha basahan ni Moises.

Dida han ikanapulo kag-upat nga adlaw han syahan nga bulan han pagkasunod nga tuig nagsaurog han Paglabay an mga tawo nga binalik tikang han paghalina ha ira. Naglinis han ira kalugaringon an kapadian ngan an mga Levita, ngan malinis na hira sumala han seremonyas. Gin-ihaw han mga Levita an mga hayop nga tutuboron nga unong han Paglabay para han ngatanan nga mga tawo nga binalik tikang ha paghalina ha ira, para han kapadian, ngan para ha ira ngahaw.

An Pulong han Ginoo.

SALMO RESPONSORIO

Sal 122:1-2, 3-4ab, 4cd-5

(b) Pakadto kita nga malipayon ha balay han Ginoo.

1. Nalipay ako han sidngon ako nira,

“Ngat’ han balay han Ginoo kadto kita.”

Jerusalem, aanhi na kami yana,

naninindog sakob han im' mga porta!

(b) Pakadto kita nga malipayon ha balay han Ginoo.

2. Jerusalem, syudad nga nahibalik na,

ngadto hin matahom nga pagkaurosa!

Amo ini an kinakadtoan nira,

nga mga tribo han Israel nga tana.

(b) Pakadto kita nga malipayon ha balay han Ginoo.

3. Kadto hin pagpasalamat han Ginoo,

sumala han iya ha ira ginsugo.

Kahadian han Israel napakadto,

hin paghukom hadton ira mga tawo.

(b) Pakadto kita nga malipayon ha balay han Ginoo.

EBANGHELYO    

Lc 8:19-21

Pagbasa tikang han santos nga ebanghelyo sumala kan Lucas.

Kinadto kan Jesus an iroy ngan kabugtoan niya, kundi waray makahirani ha iya tungod han damo nga mga tawo. May nagsiring kan Jesus, “Aadto ha gawas an iroy ngan kabugtoan mo, ngan karuyag makigkita ha imo.” Nagsiring hi Jesus ha ira ngatanan, “Adton namamati ngan nagtutuman han pulong han Dyos amo an iroy ngan kabugtoan ko.”

An Ebanghelyo han Ginoo.