PAGBASA I

Esd 9:5-9

Pagbasa tikang han Basahan ni Esdras.

Han takna na han gab-i nga paghalad, binuhat ako ha akon lingkoran ngan samtang nakakabado pa ako han gisi nga panapton, linuhod ako hin pag-ampo ngan gin-alsa ko an akon mga kamot ngadto han Ginoo nga akon Dyos.

Nagsiring ako, “O Dyos, ikinaaawod ko ngan waray ako nawong hin pag-atubang ha imo. Nagtikahitaas na an tambak han amon sala nga linapos na han amon ulo; naabot na ngani ngadto ha kalangitan. Tikang pa han mga adlaw han amon kaapoy-apoyan ngada yana kami, an imo mga tawo, nagbuhat hin dagko nga mga sala. Tungod han amon mga sala, nahingadto kami, an amon kahadian ug kapadian ha mga kamot hin langyaw nga kahadian; ginpatay, gintikasan, ngan ginbihag kami, ngan naalohan gud kami sugad hinin kamutangan namon yana. Yana, sulod hin haliputay nga panahon, O Ginoo nga amon Dyos, nalooy ka ha amon ngan itinugot mo nga makapalagiw ha pagkabihag ngan mag-ukoy ha kahimyangan in pira ha amon dinhe hini nga baraan nga dapit. Iginlikay mo kami ha pagkaoripon ngan iginhatag mo ha amon in bag-o nga kinabuhi. Mga oripon kami, kundi waray mo kami pabay-i ha pagkaoripon. Nagbuot ka nga umugop ha amon an mga emperador han Persia ngan tumugot ini hira ha amon hin pag-ukoy ngan pagtindog na liwat han imo Templo nga naruba, ngan hin pakaagi han amon katalwasan didto ha Juda ug Jerusalem.

An Pulong han Ginoo.

SALMO RESPONSORiO          

Tob 13:2, 3-4a, 4befghn, 7-8

(b) Dayawon an Dyos! Buhi hiya ha kadayunan.

1. Iya ginkakastigo kita; niyan kinakalooyan liwat kita niya.

Ginpalusad kita niya ngadto han kalibutan han mga patay,

niyan ginbabayaw kita niya tikang ha lubnganan.

Waray tawo nga makakalikay han iya gahom.

(b) Dayawon an Dyos! Buhi hiya ha kadayunan.

2. Mga tawo han Israel,

pagpasalamat kamo ha mga kanasoran,

diin iya ginpadara kamo ngadto ha pagkabihag;

bisan didto iya ginpakita an iya dako nga gahom.

(b) Dayawon an Dyos! Buhi hiya ha kadayunan.

3. Bisan kon nag-uokoy ako ha pagkabihag

didto hin usa nga langyaw nga tuna,

magpapasalamat ako han Ginoo

ngan maghihinabi ako han dako niya nga kusog

ngadto hin usa nga nasod hin mga makasasala.

(b) Dayawon an Dyos! Buhi hiya ha kadayunan.

Nagdadayaw ako han akon Dyos

ngan nagrarayhak han iya pagkaharangdon;

nagpapasidungog an akon kalugaringon han Hadi ha langit.

(b) Dayawon an Dyos! Buhi hiya ha kadayunan.

EBANGHELYO

Lc 9:1-6

Pagbasa tikang han santos nga ebanghelyo sumala kan Lucas.

Gintirok ni Jesus an dose (12) nga mga tinun-an ngan gintagan hira hin gahom hin pagpagawas han ngatanan nga mga yawa ngan pagtambal han mga sakit. Niyan ginsugo niya hin pagwali han Ginhadian han Dyos ngan pagtambal han mga magsakit. Ginsiring niya hira: “Ayaw kamo pagdara hin bisan ano ha iyo paglalaktan: waray tungkod, waray supot para hin limos, waray balon nga pagkaon, waray kwarta, waray bisan usa nga liliwanan. Kon karawaton kamo, pabilin dida hito nga balay ngada han pagbaya niyo han bungto; kon diri kamo karawaton han mga tawo, bayai ito nga bungto, ngan padpara an tapotapo tikang han iyo mga tiil, sugad nga pahimangno ha ira?” Linakat an mga tinun-an ngan nagsudoy han ngatanan nga kabaryohan. Nagwali hira han Maupay nga Sumat ngan nagtambal han mga tawo ha bisan diin nga dapit.

An Ebanghelyo han Ginoo.