PAGBASA I 

Hag 2:1-9

Pagbasa tikang han basahan ni Hageo nga manaragna.

Dida han ikakaruhaan kag-usa (21) nga adlaw han ikapito nga bulan hito ngahaw nga tuig, naghimangraw na liwat an Ginoo pinaagi kan manaragna Hageo. Ginsiring niya hi Hageo nga maghimangraw hiya kanda Sorobabel nga gobernador han Juda, Josue nga Labaw nga Padi, ngan han mga tawo, hin pagsiring ha ira, “May-ada ba usa ha iyo nga nahinumdom pa kon ano an kamatahom han Templo hadto anay? Ano na man ini yana ha iyo pagkita? Daw sugad hin waray la ini. Kundi yana ayaw la kamo kahulop. Pagtrabaho la kamo kay kaupod ako niyo. Han paggawas niyo ha Ehipto, nagsaad ako nga dayuday maupod ako ha iyo. Kaupod pa gihapon ako niyo, sanglit ayaw kamo kahadlok. “Diri maiha, pagbabay-ogon ko an langit ug tuna, an kamad-an ug dagat. Pupukanon ko an ngatanan nga kanasoran, ngan pagdadad-on ko nganhi an mga manggad hini, ngan mapupuno hin manggad an Templo. Akon an ngatanan nga salapi ug bulawan han kalibutan. Malabaw kamatahom an bag-o nga Templo kay han daan, ngan didto tatagan ko an akon mga tawo hin kauswagan ug kalinaw.” An Ginoo nga Labi Kamakagarahum an nagyakan.

An Pulong han Ginoo.

SALMO RESPONSORIO

Sal 43:1, 2, 3, 4

(b) Paglaum han Ginoo; magdadayaw ako ha iya, an akon magtaralwas ug akon Dyos.

1. O Dyos, ipahayag nga diri ako salaan,

ngan panalipdi an akon hingyap

kontra han mga diri dyosnon;

talwasa ako han buwaon ngan magraot nga mga tawo!

(b) Paglaum han Ginoo; magdadayaw ako ha iya, an akon magtaralwas ug akon Dyos.

2. Ikaw amo an akon mananalipod;

kay ano nga ginpabay-an mo ako?

Kay ano nga magpapadayon ako pag-antos

han pagkabangis han akon mga kaaway?

(b) Paglaum han Ginoo; magdadayaw ako ha iya, an akon magtaralwas ug akon Dyos.

3. Pasigaha an imo kapawa ngan an imo kamatuoran;

pagmandoan unta ako nira

ngan pabalikon ha Sion, nga imo baraan nga pungtod,

ngan ha imo Templo, nga imo gin-uokyan.

(b) Paglaum han Ginoo; magdadayaw ako ha iya, an akon magtaralwas ug akon Dyos.

4. Niyan mapakadto ako ha imo altar, O Dyos;

ikaw an burabod han akon kalipayan.

Patotokaron ko an akon arpa

ngan magkakanta ako ha imo,

O Dyos, nga akon Dyos.

(b) Paglaum han Ginoo; magdadayaw ako ha iya, an akon magtaralwas ug akon Dyos.

EBANGHELYO    

Lc 9:18-22

Pagbasa tikang han santos nga ebanghelyo sumala kan Lucas.

Usa ka panahon han nag-uusaan hi Jesus hin pag-ampo, dinmaop an mga tinun-an ha iya. Ginpakianhan hira niya, “Hin-o man ako, sumala han siring han mga tawo?” Binaton hira, “May nasiring nga amo ka hi Juan nga Parabunyag. Nasiring an iba nga hi Elias ka, samtang nasiring naman an iba nga nabanhaw in usa han kamaihaan na nga mga manaragna.” Ginpakianhan hira niya, “An ha iyo, hin-o gud ako?” Binaton hi Pedro, “Amo ka an Mesiyas han Dyos.” Niyan gintugon gud hira ni Jesus nga diri magsumat bisan kan kanay, ngan nagpadayon, “Kinahanglan mag-antos an Anak han Tawo, ngan igsalikway han katigurangan, han mga puno han kapadian, ngan han mga magturutdo han Balaod. Papatayon hiya, ngan babanhawon ha ikatulo ka adlaw.”

An Ebanghelyo han Ginoo.