PAGBASA I 

Zac 2:5-9, 14-15a

Pagbasa tikang han basahan ni Zacarias nga manaragna.

Dida hin lain nga panan-awon hinkit-an ko an tawo nga may dara nga isurukol nga lubid. “Tikain ka?” nagpakiana ako. “Magsusukol ako han Jerusalem,” binaton hiya, “basi hisabotan kon ano an kahilaba ngan kahiluag han syudad.”

Niyan hinkit-an ko nga hinirani ha akon an anghel nga nakighimangraw ha akon, ngan gintapo hiya hin lain nga anghel. Nagsiring an syahan nga anghel ngadto han ikaduha, “Lanata an batan-on nga lalake nga may isurukol nga lubid ngan sumati nga magkakamay-ada damo hin duro nga mga tawo ngan kahayopan didto ha Jerusalem nga diri na ini kapapaderan. Nagsaad an Ginoo nga hiya ngahaw an magigin pader nga kalayo palibot han syudad ha pagpanalipod hini, ngan mag-uokoy hiya didto ha bug-os niya nga gahom.”

Pagkanta nga malipayon, mga tawo han Jerusalem! Makada ako ha iyo hin pag-ukoy.” Hito nga panahon mapasingadto han Ginoo in damo nga mga nasod ngan mahihimo hira nga iya mga tawo. Mag-uokoy hiya dida ha iyo.

An Pulong han Ginoo.

SALMO RESPONSORIO

Jer 31:10, 11-12ab, 13

(b) Babantayan kita han Ginoo

sugad hin magmarangno han iya panon.

1. Kanasoran, pamati kamo ha akon,

ngan igsangyaw an akon mga pulong

didto han hirayo nga kabaybayonan.

Ginpasarang ko an akon mga tawo,

kundi pagtitirokon ko hira,

ngan pagbabantayan ko hira

sugad hin usa nga magmarangno

nga nagbabantay han iya panon.

(b) Babantayan kita han Ginoo

sugad hin magmarangno han iya panon.

2. Ginbuhian ko an mga tawo han Israel,

ngan gintalwas ko hira

tikang hin usa nga gamhanan nga nasod.

Mapakadto hira ngan magkakaranta nga malipayon

didto ha Bukid han Sion,

ngan malilipay hira tungod han akon mga regalo.

(b) Babantayan kita han Ginoo

sugad hin magmarangno han iya panon.

Niyan magsasarayaw ngan magmamalipayon

an kadaragan-an,

ngan magrarayhak an kalalaken-an

nga batan-on ug tigurang.

Pagliliawon ko hira

ngan hihimoon ko nga kalipay an ira kabido,

nga katatawa an ira kasubo.

(b) Babantayan kita han Ginoo

sugad hin magmarangno han iya panon.

EBANGHELYO    

Lc 9:43b-45

Pagbasa tikang han santos nga ebanghelyo sumala kan Lucas.

Dako pa an paghipausa han mga tawo han ngatanan nga ginbuhat ni Jesus, han pagsiring niya ha iya mga tinun-an, “Ayaw hingalimti ini nga akon iginsusumat ha iyo: itutubyan an Anak han Tawo ngadto ha gahom han mga tawo.” Kundi waray hira makasabot kon ano an kahulugan hini, ngan nahadlok hira hin pagpakiana ha iya mahitungod hini nga butang.

An Ebanghelyo han Ginoo.