PAGBASA I 

Amos 6:1a, 4-7

Pagbasa tikang han basahan ni Amos nga manaragna.

Hin kamakaharadlok para ha iyo nga an kinabuhi himyang didto ha Sion. Hin kamakaharadlok para ha iyo nga nahundaray dida han iyo magtahom nga mga higdaan, nga nagkikinaon hin karne han mga nati nga baka ug karnero. Sugad kan David naruruyag kamo hin pagkomposo hin mga kanta, ngan pagtokar hini dida hin mga arpa. Nagpatakas kamo hin pag-inom hin bino ngan nagamit kamo han gimamaupayi nga mga pahamot, kundi waray kamo pagmasulob-on han karuba han Israel. Sanglit uunahon kamo hin paghalina nga mga bihag. Matatapos an iyo mga pangaon ngan mga bangkite.

An Pulong han Ginoo.

SALMO RESPONSORIO

Sal 146:7, 8-9, 9-10

(b) Pagdayawa an Ginoo, O kalag ko!

1. Naghuhukom hiya ngan inuogopan,

adton ginsasakit ngan ginlulupigan.

Adton gutom hin pagkaon gintatagan,

mga priso iya gud ginbubuhian.

(b) Pagdayawa an Ginoo, O kalag ko!

2. Iya ginpapakita an mga buta,

iya ginbabangon adton natutumba.

Magtadong katawhan iya hinigugma,

mga dumuruong ginmamangnoan n’ya.

(b) Pagdayawa an Ginoo, O kalag ko!

3. An Ginoo naugop han mga balo ug mga ilo,

kundi ginpapara an dalan han maghuka.

Hadi gud hin kadayonan an Ginoo,

maghahadi gudman, O Sion, an Dyos mo.

Para han ngatanan nga panahon ito,

pagdayawon, pagdayawon an Ginoo!

(b) Pagdayawa an Ginoo, O kalag ko!

PAGBASA I I

1 Tim 6:11-16

Pagbasa tikang han Syahan nga Surat ni San Pablo ngadto kan Timoteo.

Kundi ikaw nga tawo han Dyos, likayi ini ngatanan nga mga butang. Talinguhaa an pagkamatadong, pagkadyosnon, pagtoo, paghigugma, pagpailob, ngan pagkalumo. Dalagan, sugad han imo mahimo dida han paisan-isan han pagtoo, ngan dag-a para ha imo ngahaw an dayon nga kinabuhi; kay gintawag ka han Dyos ngada hini nga kinabuhi, dida han maupay mo nga pagtug-an han pagtoo ha atubangan hin damo nga mga saksi. Ha atubangan han Dyos nga nahatag hin kinabuhi ha ngatanan nga mga butang, ngan ha atubangan ni Cristo Jesus nga nagtug-an hin maupay ha atubangan ni Poncio Pilato, nagsusugo ako ha imo: Sugta an kasugoan, ngan tumana hin hingpit tubtob han Adlaw han pagpakita han aton Ginoo Jesu-Cristo. Ha igo nga panahon igpapadayag hiya han Dyos, an darayawon ngan amo la nga Magburuot, an Hadi han mga hadi, ngan Ginoo han mga ginoo. Hiya la an waray kamatayon, ngan nag-uokoy ha kapawa nga waray gud nakakahirani. Waray pa nakakita ha iya, ngan waray gud makakakita ha iya. Ha iya an kadungganan ngan an dayon nga kagamhanan! Amen.

An Pulong han Ginoo.

EBANGHELYO    

Lc 16:19-31

Pagbasa tikang han santos nga ebanghelyo sumala kan Lucas.

Nagsiring hi Jesus ngadto han mga Parisiyo, “May-ada hadto usa nga riko nga nagbabado han gimamahali nga mga panapton ngan nagpapatakas han iya mga bahandi ha adlaw-adlaw. May-ada man liwat usa nga makililimos nga Lazaro an ngaran, nga lukop an iya lawas hin mga katol. Agsob hiya dad-on ngadto han porta han riko, kay hingyap niya nga makakaon hiya han mga natataktak nga pagkaon tikang han lamesa han riko. Nadaop bisan an mga ayam hin pagdilap han iya mga kaduntan. Namatay an makililimos ngan gindara han anghel ngadto ha sapit ni Abraham, didto han kombite ha langit. Namatay man liwat an riko ngan iginlubong, ngan nahingadto hiya ha dako nga kasakitan ha impyerno. Paghangad niya, hinkit-an niya hi Abraham hirayo ha iya, ngan nasapit hi Lazaro ha iya. Sanglit ginoliat hiya, ‘Amay nga Abraham! Kalooyi gad ako, ngan ipadara ngadi hi Lazaro hin pagtunlob han iya tudlo ha tubig, basi pahagkotan an akon dila, kay ginsasakit ako dida hini nga kalayo!’ Kundi nagsiring hi Abraham, ‘Panumdom, anak ko, nga han buhi ka pa, nahiagom ka na han ngatanan nga mag-upay nga mga butang, samtang hi Lazaro, nahiagom la han ngatanan nga magraot; kundi yana nagpapahimulos na hiya han mga kalipayan didi, samtang aada ka ha kasakitan. Labot la hito ngatanan, may hiluag nga wada ha butnga naton, sanglit diri makakahimo nga an karuyag tumabok didi hin pagkadto ha iyo, sugad man an karuyag tumabok didto hin pagkadi ha amon.’ Nagsiring an riko, ‘Amay, kon amo man ito, nakikimalooy ako ha imo nga sugoon mo hi Lazaro ngadto ha balay han akon amay, diin may-ada ko lima pa nga kabugtoan nga kalalaken-an. Pakadtoa gad hiya hin pagpahimangno ha ira, basi diri liwat hira mahinganhi hini nga dapit han kasakitan.’ Nagsiring hi Abraham, ‘Aadto na hira Moises ngan an mga manaragna nga magpapahimangno han imo kabugtoan. Kinahanglan mamati hira han ira igsisiring.’ Nagbaton an riko, ‘Diri pa ito igo, amay nga Abraham! Kundi kon may mabanhaw ngan kumadto ha ira, mabaya gud hira han ira mga sala.’ Kundi nagsiring hi Abraham, ‘Kon diri hira mamati kan Moises ngan han mga manaragna, diri hira malulukmay, bisan pa kon may mabanhaw tikang han mga minatay.’”

An Ebanghelyo han Ginoo.