PAGBASA I 

Dan 7:9-10, 13-14

Pagbasa tikang han Basahan ni Daniel nga manaragna.

Samtang nagkikinita ako, iginpahimutang in mga trono. Liningkod dida han usa han mga trono an Usa nga Daan Buhi tikang pa ha tinikangan. An iya panapton nabusag sugad hin gapas ngan an iya buhok lubos kabusag sugad hin barahibo hin karnero. Naglalahinggab hin kalayo an iya trono nga natungtong dida hin naglalaga nga mga kaliding, ngan nag-aawas tikang han trono in usa nga sapa hin kalayo. Nakadto in yinukotyukot nga mga tawo nga nag-alagad ha iya ngan naninindog ha atubangan niya in makalilisang kadamo nga mga tawo.

Nagtikang an paghukom ngan ginbuklad an mga basahan. Dida hini nga panan-awon ha gab-i, may-ada usa nga sugad hin tawo pagkit-on. Nagtitipakanhi hiya ha akon, ngan napuputos hiya hin mga dampog. Kinadto hiya han Usa nga Daan Buhi tikang pa ha tinikangan ngan iginpakilala hiya. Gintagan hiya hin pagburot-on, kadungganan, ngan hadianon nga gahom, basi makag-alagad ha iya an katawhan han ngatanan nga kanasoran ngan mga pinulongan. Magpapadayon hin waray kataposan an iya pagburot-an ngan diri gud matatapos an iya ginhadian.

An Pulong han Ginoo.

Kon di’ man ini nga syahan nga pagbasa:

Gnp 12:7-12ab

Pagbasa tikang han basahan han Ginpadayag.

Niyan nahinabo in araway didto ha langit. Hi Miguel ngan an iya mga anghel nakig-away han dragon nga upod liwat han iya sakop nga mga anghel inato, kundi nadaog an dragon ngan hiya ngan an iya sakop nga mga anghel waray na tugoti hin pag-ukoy didto ha langit; ginpaiwas hira. Iginlabog ha gawas an duro kadako nga dragon! Amo hiya adton kadaan nga dako nga halas nga ginngaranan nga Yawa, o Satanas, nga amo an naglimbong han bug-os nga kalibutan. Iginhulog hiya ngadto ha tuna upod an ngatanan nga iya sakop nga mga anghel.

Niyan hinbatian ko in dako nga tingog didto ha langit nga nasiring, “Yana inabot na an katalwasan tikang han Dyos! Yana iginpakita na han Dyos an iya gahom hin ka Hadi! Yana iginpakita na han iya Mesiyas an iya pagkagamhanan! Kay an natindog ha atubangan han Dyos ngan nagsumbong han aton kabugtoan adlaw gab-i ginpaiwas na ha langit. Nagdaog ha iya an aton kabugtoan pinaagi han dugo han Kordero, ngan pinaagi han kamatuoran nga iginpasangyaw nira; ngan andam hira hin paghalad han ira kinabuhi, ngan pagpakamatay. Sanglit, pagkalipay kamo, kalangitan, ngan kamo ngatanan nga nag-uokoy didto!”

An Pulong han Ginoo.

SALMO RESPONSORIO

Sal 138:1-2ab, 2cde-3, 4-5

(b) Ha atubangan han mga anghel, magdadayaw ako ha imo.

1. Nagpapasalamat ak' ha im', Ginoo,

tikang gud han bug-os nga kasingkasing ko.

Nagkakanta ako pagdayaw ha imo,

atubangan han kadiyosan nga palso.

Gin-atubang ko baraan mo nga Templo,

nayukbo nga nadayaw han ngaran nimo.

(b) Ha atubangan han mga anghel, magdadayaw ako ha imo.

2. Tungod han imo gugma nga kadayonan,

ngan han imo pagkamatinumanon man.

Imo ginpakita nga labaw han tanan,

an im’ mga sugo ngan an imo ngaran.

Han akon pagtawag imo ginbaton man,

Im’ ak’ ginpakusog han imo kakusgan.

(b) Ha atubangan han mga anghel, magdadayaw ako ha imo.

3. Ha tuna, Ginoo, tanan kahadian,

magdadayaw ha im’ hira gud ngatanan.

Kay im’ mga saad ira hinbatian,

ira kakantahon imo binuhatan.

Magkanta han dako nim’ nga kagamhanan.

(b) Ha atubangan han mga anghel, magdadayaw ako ha imo.

EBANGHELYO    

Jn 1:47-51

Pagbasa tikang han santos nga ebanghelyo sumala kan Juan.

Han paghikit-i ni Jesus kan Natanael nga nadaop ha iya, naghinabi hiya ha iya, “Iini in tinuod nga taga-Israel, waray gud sadang isuson ha iya.” Nagpakiana hi Natanael ha iya, “Ano hin pakakilala mo ha akon?” Binaton hi Jesus, “Hinkit-an ko ikaw han nakadto ka ha sirong han kahoy nga igos, han waray ka pa tatawga ni Felipe.” Nagsiring hi Natanael, “Magturutdo, ikaw an Anak han Dyos, ikaw an Hadi han Israel!” Ngan nagsiring hi Jesus ha iya, “Natoo ka ba, tungod la nga nagsiring ako ha imo nga hinkit-an ko ikaw ha sirong han igos? Hikikit-an mo in larulabaw pa hini nga mga butang!” Ngan nagsiring hi Jesus ha ira ngatanan, “Susumatan ko kamo hin tinuod: Hikikit-an niyo an langit nga binuksan, ngan masaka-lusad dida han Anak han Tawo an mga anghel han Dyos!”

An Ebanghelyo han Ginoo.