PAGBASA I 

Zac 8:20-23

Pagbasa tikang han basahan ni Zacarias nga manaragna.

Nasiring an Ginoo nga Labi Kamakagarahum, “Maabot an panahon nga mapakadto ha Jerusalem in mga tawo nga tikang hin damo nga mga syudad. Adton tikang hin usa nga syudad masiring hadton tikang hin lain nga syudad, ‘Magsisingba kami han Ginoo nga Labi Kamakagarahum ngan mag-aampo kami basi pagpakaupayon kami niya. Tana, upod ha amon!’ Mapakadto ha Jerusalem in damo nga mga tawo ngan gamhanan nga mga nasod hin pagsingba han Ginoo nga Labi Kamakagarahum ngan hin pag-ampo basi pagpakaupayon niya hira. Dida hito nga mga adlaw mapakadto hin usa nga Judiyo in napulo nga mga lumalangyaw ngan masiring, ‘Karuyag namon umangbit han iyo kapalaran, kay hinbatian namon nga aada ha iyo an Dyos.’”

An Pulong han Ginoo.

SALMO RESPONSORIO

Sal 87:1b-3, 4-5, 6-7

(b) Aadi ha aton an Ginoo.

1. Ha baraan nga bukid ini pagtindoga.

Syudad Jerusalem iya hinigugma,

labaw bis’ diin ha Israel nga tuna.

Syudad han Dyos, imo na nga pamatian,

Mga butang ur'sahon iya ginyakan.

(b) Aadi ha aton an Ginoo.

2. Paglista ko’n mga nasod nga natuman,

lakip ko’n Ehipto ug Babilonia man.

Ngan masiring ak’ hiunong han Filistia,

hiunong han Tiro ngan hadton Etiopia;

nga hira ngatanan masasakop niya,

masasakop han Jerusalem nga tuna.

Hiunong han Sion ini’n igyayakan:

tanan nasod maiiya ginsakopan;

ngan an Dyos nga amo’n Labaw han ngatanan,

mahatag gud ha iya hin karig-onan.

(b) Aadi ha aton an Ginoo.

3. Malista’n Ginoo han mga katawhan,

Bas’ magin taga-Jerusalem an tanan.

An ngatanan nga didto'n iya urokyan,

magkakaranta ngan magsasarayaw man.

EBANGHELYO    

Lc 9:51-56

Pagbasa tikang han santos nga ebanghelyo sumala kan Lucas.

Samtang nagtitikahirani an mga adlaw nga masaka na hi Jesus ha langit, nagbuot na gud la hiya nga mapakadto hiya ha Jerusalem. May-ada niya mga ginsugo hin pag-una ha iya. Linakat hira ngan kinadto hin usa nga baryo han Samaria hin pag-andam han ngatanan para ha iya. Kundi waray karawata hira han mga tawo didto, kay maaram hira nga tipakadto hi Jesus ha Jerusalem. Han pakasabot hini nira Santiago ug Juan nga mga tinun-an, nagsiring hira, “Ginoo, karuyag ba nimo nga ipalusad namon tikang ha langit in kalayo nga magsunog ha ira?” Liningi hi Jesus ngan ginbusaan hira; ngan nagpadayon hira ngadto hin lain nga baryo.

An Ebanghelyo han Ginoo.